Ɛica tugi innas
Ɛica tugi innas yat taddmint nɣ d umiy ittussann ɣ tdlsa taclḥit, ar tsawal f tullist n yat tfruxt bahra ifulkin mu ism Ɛica d tusmit n innas tt ur irin.
Taddmint
[ssnfl | Snfl asagm]Tunɣilt ittyawnnan ɣ Ayt Baɛmṛan:
Ndi, yat tmɣart aya iẓẓayn yaẓn ad taru, ad ukan tlkm twnfukt ar tettasi yat tẓuḍt n tglay tml tt inn i tafukt tɣr as:“ a Lalla Fuka, is d kmmin ad ifulkin; nɣ d nkkin; nɣ d taẓuḍt ad nɣ aylli illan ɣ uḥlig inw?”, s iɣ as d tsadmr tafukt: “ fulkiɣ nkkin; tfalkit kmmin; tfalki taẓuḍt nna; taf anɣ Ɛica ɣ uḥlig nnm”. Ur jju tssusim tmrarut ad tmɣart ann, mqqar d; ar takar tamyurt ann aylliɣ turu Ɛica illis, tafruxt aɣar ayyur ɣ ufulki nns.
Kra s ar zzrayn wussan ar tettgalla tmɣart ar nn tgr Ɛica nns ɣ kra n tagant tfl tt inn, macc ar as bdda ittagʷi yimrri nns; nɣ tt izzwzwa inna as ar d timɣur, ar yan wassf ɣ ɣinn ur illi; tkf tmɣart yat tzikrt i Ɛica tnna as ad tcukku tirbatin ddanin s tagant ad d zddmnt. Tddu Ɛica ar tsiggil tirbatin, ar taqqra ar as d tetturray ttɣlaɣal tɣal is d nttntin, tcukku imsli aylliɣ tt laḥ ɣ ugʷns n tagant, ḍṛnt tillas iliḥ tifawt.
Is tt ukan umẓnt tillas; tɣʷli Ɛica yat targant tsaxx nn gis, ar tssflad i yimslitn n yimudar ar ttazzaln ɣ tagant, ur tssin aylliɣ d yiwi uɣaras yan waɣʷẓn, iliḥ mani ɣ ar ittskkiyyus amr ddu targant ann ɣ tḥḍa. Iskkus waɣʷẓn iqqd i takat, isdu nn d ugjja ar ittniddum, tmun as takat d yihdumn nns ur tt iẓṛi. Tanni Ɛica timjṛit ann tɣr as d: “ Xuxxu ittniddumn; fuffu icca taḥtta nnk!”, tals as aylliɣ d idiw, isillf s yihdumn tns takat, ar imuqqul iggammi mani d srs ikka yimsli ann, iwrri daɣ iskkus ar daɣ ittniddum, tmun as daɣ takat d yihdumn, tɣr as daɣ Ɛica: “Xuxxu ittniddumn; fuffu icca taḥtta nnk!”, idiw daɣ isillf issns takat, yall tinxar nns ar ikʷṭṭa, yagʷz ilmma aḍu inna: “aḍu n bnadm u bnadm aya!”, inkr ar ittcubbu; kraygat mani is nn gis yugga iliḥ as tt, tɣr as d ilmma Ɛica tsgullu t ur tt ictta iɣ as d tnfalal, iggall ilmma ikf as anmitar, tkksr d srs ilmma zɣ targant, iẓṛ tt isshtr t ufulki nns, iggall a sar tt issidr aɣar s tirmt iɣusn. Iṛẓm ṛbbi yan ugjja i Ɛica ar t tkccim ar gis tḥḍḍu, ar as d ittawi waɣʷẓn lli tirmt iɣusn ijjan ar tt tctta ar ictta nttan miḍṛus, qqaman s ɣik ann wahli yan uzmz.
Yan wassf ɣ d iffuɣ ugldun ad igʷmr, ikcim tagant ar ittlli ar ittcubbu, ur issin aylliɣ nn immaqqar d ugjja ɣ tlla Ɛica, yafi tt inn tṛẓm i wazzar nns iḍlan tt akk iḥbun, ar txxmc trar t id aɣar amazzr, tsshtr t s ufulki nns yiri tt zɣ ɣ akud ann. Iwrri s ubrgmmi nns dar babas inna as mas rad itihl, iɣr babas agllid i yimsnarn d ismgan d twiwin ad salan ad tili tmɣra, ukan ur ssinn man ta a rad yawi ugldun. Iddu ugldun s tagant ibbi d agjja ɣ tḥḍa Ɛica yasi t id s ubrgmmi, yini i ku yan is d agjja ad a rad yawi! Ar ḍssan middn ɣ ugldun, lli iran ad itihl agjja, inin ma s inufl, aylliɣ inna i twiwin ad nawlnt agjja awin t as nn mad ictta, awa is nn ukan kcimn t afin t nn Ɛica tṛẓm i wazzar nns tt akk iḥbun, ṛẓin kullu yifcka lli usint s ufulki nns, azzlnt awint d wiyyaḍ ṛẓin nit daɣ, aylliɣ tt ttrnt ad tḥbu azzar nns ad asn sul ur ttkaṭṭayn yifcka. Tawi ilmma Ɛica agldun ddrn ɣ tmaxirt aylliɣ midn wussfan.
Nnan, lliɣ islla yan ismg i mayann iggall ɣd nttan ar d itihl agjja lli rad as sul ig tarbit tafalkayt, iddu ibbi d agjja yasi t id ɣ iggi n iɣir nns, nttan ur issin is gis tḥḍa tblinka, tqqs as tblinka tnɣ t.