Aliksir n tudrt

Aliksir n tudrt (Talatint tamuẓunt: elixir vitae), ittussan ula s uliksir n tɣlalt, iga yan wuddis nna yakkan tudrt tar tamttant nɣ d timẓi tamɣlalt i wanna t iswan. Ittuɣal is ar isjji uliksir ad kraygat tamaḍunt. Tg tuskra nns awttas imqqurn n kigan n yimsximitn zɣ mnnawt tsutin d tmizar d tdlsiwin. {{

Umiy n wawtil umlil zɣ Tasnimiyt tacinwit, ar iskar aliksir n tudrt ɣ wayyur

Tasnaẓuṛt

Tkka d tguri n uliksir taguri taɛṛabt الإكسير nna isnumkn tamtta tuddist nɣ d tamssuyt nna yakkan tudrt tamɣlalt nɣ d ar tsjji kraygat tamaḍunt, nɣ d aẓṛu n yiflsufn. Zɣ tguri ξηρίον (xēríon, “takka isɣarn aggasn”), zɣ ξηρός (xērós, “qqar”).

Amzruy

Misubutamya tazaykut

Ittubdar uliksir n tudrt ɣ wumiy n Gilgamic( zɣ tyifḍt tiss snat dat Σisa) lliɣ t tssiwd tiwsri t id ittaẓn ḍarat tmttant n ugmatmddakkʷl nns Inkidu. Iddu ar isiggil Utnabictim, yan ittussan ɣ tsnimiyt tamisubutamiyt mas injm i yan ungay imqqurn d uznn wakucn kfin as ilmma tudrt tamɣlalt. Yazn Wutnabictim Gilgamic ad yafi yan umɣay ɣ wasa n yilel, macc icca as t yan ulgmaḍ ur ta t issmris. Iga wumiy ad yan ufrrz azayku n maxx aylliɣ ar ssnfaln yilgmaḍn ihrraḍ nnsn, aylli ittyawẓṛan is iga asmaynu until.

Ccinwa

Amuddu amzwaru n Cu Fu(Xu Fu s tnglizt) s udrar n yimɣlaln. Zɣ dar Utagawa Kuniyoshi

.

Kigan n yinbbaḍn n Ccinwa tazaykut ad isggln iliksir n tudrt fad ad lkmn tudrt tar tamttant. Γ uzmz n Qin, yuzn Qin Shi Huang amsiximi amẓṛṭaw Xu Fu s yilln n iming nttan d 500 n uɛzri d 500 n tɛzrit fad ad afin aliksir ɣ udrar n Binglay, macc yurri d s yifassn xwanin. Iffuɣ daɣ s umuddu yaḍnin nttan d 3000 n yiɛzray d tɛzray, macc awd yan d gisn yurrin (ar ittini wumiy mas ufan Jabun.

Flsn yicinwitn izaykutn is d wanna iccan kra n waṛẓan ittmaṭaln zun d zun d jade, cinnabar, nɣ d hematite rad as kfin kra ɣ tmmuṭla nnsn. Ar ttinin yicinwitn izaykutn mas imyalla wurɣ, acku iɣʷla d ur ar t tettkka tanigt; ukan tamssqt n tissi n wurɣ rad d tbag ɣ Ccinwa ɣ wattayn n tgira n tsuta tiss kraḍt dat Σisa. Arra uyxim acinwi akk ittussan ilan s yism Danjing yaojue(Tinflayin Tidslanin n Yiklasikn n Tximit") ittussaɣn i Sun Simiao (attayn n 581– attayn n 682 ḍaṛat tlalit) yan uwzzan ɣ tsnijjit ittussann s "Ugllid n Tsnijjit" dar wid t id cukkanin, ar isawal s usnɣd f uɣnaw n uliksir n tudrt (isawl f mnnaw yifrdisn imirin zun d azwwaq, lkbrit d tkwwut), ɣik ann d wiyyaḍ ṛwanin i kra n tmuḍan nɣ d ar ttussmrisn ɣ tuska n yiẓṛan ɣʷlanin.