Axurzal

Axurzal nɣ Iɣctr nɣ Aɣrchiw nɣ Akʷrẓkal iga yan wanaw n ibaɣuɣn imẓẓin, ar ittddr g tnzruft tamqqrant g yiẓẓlmḍ n tfṛiqt d kra n tsgiwin g tnzruft n tmizar n waɛṛabn g ugmmuḍ anammas.

Ar tlkkm tiɣzi n iɣctr gr 24 cm d 40 cm, d ar tlkkm taẓḍuyt nns gr 1 ar 1,5 kilugram, d iṭṭaf yan ucṭṭab ilkkmn ar azgn n tfkka nns, d kra n imzgan imqquṛnin bahra, ar tlkkm tiɣzi nnsn ar 14 cm, d mayan afad ad-as ttawsn ad issidrus tirɣi n tfkka nns iɣ tɣʷli d ar tt isiṣmiḍ s idammn, d ula ar as ttawsn ad issfld i umussu n ungisn nns g yiḍ. Aklu nns iga zund aklu n umlal n tnzruft, ar as ittaws afadd ad iḥḍḍu d ad inttl, d ar t iḥbbu ddu iḍaṛṛn nns kra n wazzar ar t ifrg g tirɣi n umlal g uzal, d ar iḥṭṭu tirɣi n ibaciln nns g ḍyyḍ, d ar tlkkm tazzla nns ar 40 km g tsragt.

Ar ictta iɣctr aynna yufa zzɣ imudar d immɣayn, ar bahra ittmussu g ḍyyḍ afad ad gis igʷmmr ibuxxucen, d imḥrurdn d wanawn wiyyaḍ .. zund: tiqqlatin - tammurɣi - iɣrdmiwn - igḍaḍ d tiglay nnsn - d ar ictta igumma - d tuga - d iẓuṛan n kra n immɣayn ... d iẓḍaṛ ad iddr yan uzmz iɣzzifn bla aman iḥ as-tn laḥ. Ar ittddr umudr ad g trubba mẓẓinin ar lkkmn t gr mraw ar smmus d mraw n ubaɣuɣ, d ar ttilin g igʷḍyan immu tlkkm tadrut nnsn ar mraw n imitru. Ar ilkkm utwal n iɣcetr kra n 12 ar 16 n usggʷas.