Bihi Ajallaḍ

Bihi Ajallaḍ iga yan unḍḍam Aclḥi bahra ittyawssann ɣ isksawn, ilul yadlli ɣ usggʷas 1950 ɣ wusun n twalin tagrawt n lalla ɛziza, tamnaḍt n cicawa, inkr d ɣ yat tmazirt lli nn ibbin f lmdint, lliɣ imẓẓi ur tt yiwi ɣ tɣri, ur iri tinml, ittut f umarg ar ifttu s isuyas n uḥwac, ar issflid i inḍḍamn, ar ittḥwwac, irwas nit is d ikkusa amarg sɣ dar babas lli igan dɣ nttan yan unḍḍam asksiwi, inna tuggt n umarg ɣ uzmz n usdurri afransis.

Ɣ usnti n twada nns, ikka tt inn ar ittlmad tanḍḍamt ɣ isuyas, ar ittals i iwaliwn da ittini babas ar ifttu s tmɣriwin d iḥwacn, ad ukan inna kra n wawal ar t ttallɣn mddn ar t ssimɣurn ɣaylli gis igan anaruz afad ad ig ula nttan anḍḍam. Asggʷas n 1973 ad igan asra ɣ yumẓ ujallaḍ tabrida n tnḍḍamt d tmdyazt, awal izwurn is t inna iga t lliɣ iksa ulli, yaf nn kra n mddn ɣ unrar kkan aylliɣ iqqn rrwa, ar sul ttasin imadaɣn.

Ajallaḍ zun d amaka n inḍḍamn, izri dɣ nttan ɣ tɣarast n usiggl n tikki n wawal, irzf nn yan ugrram ɣ zzawit n uskkif, lliɣ nn ign ibdd srs yan ufgan isrs as yat talfanidt n fliyyu ɣ imi nns, lliɣ d inkr ɣ tuẓẓumt n wass yaf ixf nns ar issumum kra. Tigira n twargit ad yufa nn bihi ixf nns iga dars umarg zun d iɣ ar issa waman.

Iswa d unḍḍam ad ɣ taysi n babas, ɣmklli d iswa ɣ yan ida ittyawssann s umarg, inyalkam d imdyazn mqqurnin lli turu tsga nns wan Ɛumar brɣut, d ḥasan u lḥaj ɣ unẓuḍt d Lɛrbi ɛjjaj d utwili ɣ usrratu d ḥmad u bihi u talmst. Ad ur ittu yan is d timktit n tmazirt nns iṛcm gis yan ism da igan tamatart niɣ d inigl n umarg, iga tt lalla ɛziza tasksiwit, yat ɣ igrramn lli ittyawssann s ifi n wawal dar imaziɣn n udrar n Drn d Sus,