Breaking Bad

Breaking Bad (s Tclḥit: iffuɣ aɣaras, iḍṣṛ, yumẓ gar abrid) iga yan isddi amarikan izrayn ɣ tiliẓṛi, win ḍṛama d win tirmgut, d win imccuṛḍa (tabulisit) lli ikcmn ɣ neo-western isnflul t uṣinariṣ Vince Gilligan. Ibḍa isddi ad s smmus n imirn, d 62 n isdditn ittkkan kuyat gisn kra n 47 n tusdadin, ittyawzuzzar s yat tklit ɣ wassf n 20 n innayr 2008 ar assf n 29 Cutambir n 2013 ɣ usaru n AMC lli illan ɣ Mirikan d Kanaḍa.

Tasrslt ad ar tettals i tnfust n Walter White (Bryan Cranston), yan uslmad n tcimit ilan yat tskflt yattuyn ɣ twssna, ig bab n twja. Lliɣ issn is yuḍn s gar aṭṭan (afurray) n turin ɣ usra nns amggaru, iddm amaḍal n trmgut afad ad ilil imal n twja nns ɣ mad iẓlin s iqariḍn ur ta immut. F ɣmkann, issnti ad d iṭṭay mitamfitamin, ar tt izznza, yaws as ɣ mayad yan ɣ Imḥḍaṛn nns iqburn lli t igan d Jesse Pinkman (Aaron Paul). Tanfust ad tzri ɣ tɣrmt n Albuquerque lli d yuckan ɣ Nyumiksiku.

Iɣ yad yiwi imir amzwaru timrarutin cwanin dar imzɣann, kkuẓ imirn lli t id iḍfarn munn fllasn imzɣann akkʷ is fulkin, ssimɣurn bahra manmk a s ttyaswaɣ ula tirra n usinaryu nns d iwrikn lli gis llanin, ula manik a s hḍṛn imsgbarn nns. Yawi imir wis smmus score n 99 f 100 ɣ wansa n 'Metacritic'. Ɣ usggʷas n 2013, tsti t tmrslt n 'Writers Guild of America' ad ig wis 13 ɣ tsrsal lli cwanin ɣ tirra ɣ umzruy n tiliẓṛi. Tasɣunt n 'The Hollywood Reporter' tsnmala dɣ nttat Breaking Bad d tsrslt tis snat lli akkʷ imuccdn ɣ tmazirt n Marikan tiɣʷrdin n tsrslt n Friends (Imddukkal), tsti tt daɣ tsɣunt n 'Esquire' ad tg tsrslt tis snat lli kullu ifulkin ɣ mad iẓlin s ddrrama tiɣʷrdin n Les Soprano. Ɣ usggʷas n 2023, munn imzɣann ad gn Breaking Bad d tsrslt n tiliẓṛi da kullu icwan ɣ 25 usggʷas ad igguran, ɣ yan sondage da iskr wansa n "Rotten Tomatoes".