Lusyus Siniɣa Amẓẓiy

Lusyus Annayus Siniɣa, daɣ ittyawssann s Siniɣa Amẓẓiy, ilul ɣ wattayn n usggʷas 4 izwarn tlalit ɣ Qrḍuba, ɣ Ṣbanya n ɣassad. Iga yus n Sinika Amaqqur, yan mafawal izukmin. Ɣ mẓẓi nns, ismd tiɣri nns ɣ Ruma, ilmd tadiwant d tflsaft, slawan akkʷ Tasṭuwiyt. Ur tgi tudrt nns tin talwit, ɣ wussan n tnbaḍt n umnkud Kludyus, ittyawzwag s Kursika ad gis ikk mnnaw isggʷasn fad ad d sul iwrri s Ruma, ig ɣinn aslmad d umsdag n umnkud Niru. Tiwi as d tizi ad tagrgist d waddur, tawi as d daɣ azawar. Ittyawssan Niru tigira n ɣayad is iga yan ɣ inbbaḍn lli akkʷ ganin d ingma n Ruma. Asafla n mddn uhmn i manmk a s izḍar yan uflsaf asqqaf (aṣtuwiy) ad isniri kra n unbbaḍ ixʷcnn zun d ɣwad. Ɣ usggʷas 65 nnif i tlalit, yiwi tumla is ikcm ɣammas n kra n tnbbaṛt, imagl Sinika ad inɣ ixf nns s ixf nns. Iskr tt sul. Ar bahra tettyawmnad tmttant nns is tga ɣmklli n tigawt tamggarut n tmariwt tasṭuwit.^[1]

Yura mnnaw igamman iflsafn d 124 n tbratin f tmsastanin tiɣaranin, "Amsiri aɣaran" (Epistulae Morales).

Tudrt nns

Ilul Sinika ɣ Kurduwa, ɣ Hisbanya (Ṣbanya), ɣ usggʷas wis kkuẓ dat n tlalit, ikka d yat tawja iggrgsn tili aẓur aṭalyani, ɣaylli as ifkan s tuɣad tawdant tarumanit. Llan dars sin aytmas, innas Hilfya, d babas ittyawssann Sinika Amqqur lli igan amara d uslmad n tdiwant. Ikka Sinika isggʷasn n usmuttg nns ar yaqqra tajrrumt d tdiwant ɣ Ruma, issnyaf gis taflsaft, idru ɣ igrawn f tsqqaft (taṣtuwit), yat tflsaft tagrikit d imcackan d urfsu nns lli ittilin ɣ igamman nns akkʷ. S mk nna inna yan ɣ inḍfarn nns, Ibbiktit, iqqan d ad iddr ufgan yat tudrt irggign n ufra d talwit d umslag, d tawant n uswingm, tẓḍar ad tt ittaɣ yan s tnbaḍt nns f ixf nns.

S tdusi nns iṛmin, Sinika idda s Miṣṛ bac ad izdɣ dar xaltis, ur ta d yurri s Ruma ɣ usggʷas 31 n tlalit. Mkann d yurri s tmdint, yiwi d ism n yan mafawal amaynu, ismd tizi nns s twuri. Maccan, imnaggar d imnkudn wan Kaligula (lli inbḍn sɣ 37 ar 41 n tlalit) d Klud (sɣ 41 ar 54 n tlalit). Inna yan mas ikcm ɣ yat tzdayt n usmṛḍn d Julya Luvilla, ultmas tamẓẓiyt n Kaligula, ɣayann a f ittyawzwag s Kursika ɣ usggʷas 41 n tlalit.

Macc, ɣ usru n uzwag nns, ur gis iɣama bla immuss; is ismd tiɣri nns n tflsaft, yara yan umdadday n iḍrisn n twssna d yan usrsl n igamman.

Ɣ usggʷas 49 n uzmz nnɣ, rurn t id daɣ s Ruma s twisi n Agripina Tamẓẓiyt, ultmas n Kaligula d innas n umnkud aṛuman d imaln lli t igan d Nirun. Ɣ udlis nns "Inmɣisn", isawl Tasit f udwal nns.

Isuɣal

↑ "Quote of the day by Seneca: 'He suffers more than necessary, who suffers before it is necessary'- life lesson on why worrying early only increases pain by Stoic philosopher". The Economic Times. 2026-02-28. ISSN 0013-0389. Retrieved 2026-03-01.

[1] "Quote of the day by Seneca: 'He suffers more than necessary, who suffers before it is necessary'- life lesson on why worrying early only increases pain by Stoic philosopher". The Economic Times. 2026-02-28. ISSN 0013-0389. Retrieved 2026-03-01.

[1]