Lyubuld Justinar
Lyubuld Fikṭuṛ Justinar ilul ɣ Nujunt siɣ Sin ɣ wass n 14 Mayyu 1878 immut ɣ Bariz ass n 8 Fbṛayṛ 1959, iga yan usrdas d yan umsmazɣ Afransis lli yiwin aɣan imqqurn n laliju n waddur, yura kigan n warratn slawan f Tclḥit d tudrt n iclḥiyn, ibidd f tɣawsiwin n tmizar n Sus kra n 30 n usggʷas, ɣayann a f illa mad as yaqqran s "uqbṭan Aclḥi".
| Lyubuld Fikṭuṛ Justinar | |
|---|---|
 | |
| afgan | |
| Anaw nɣ asrtu | awtm  |
| Tamazirt n tɣlant | Fṛansa |
| Ism amzwaru | Yves |
| Asakud n tlalit | 14 Mayyu 1878 |
| Ida n tlalit | Nogent-sur-Seine |
| Assf n tmttant | 8 Bṛayṛ 1959 |
| Ida n tmttant | tasunḍt tis smmust n Bariz |
| Arraw | Pierre Justinard |
| Tawuri d mad isala | Asrdas |
| Iɣra ɣ | Tinml Tasrdast Timẓlit n San Sir |
| Idra ɣ umnzaɣ n | Journées sanglates de Fès, Première Guerre mondiale |
| Iga yan ugmam ɣ | Académie des sciences d'outre-mer |
| Tismɣurin yuwi | grand-croix de la Légion d'honneur, croix de guerre 1914-1918, médaille commémorative du Maroc, médaille coloniale, commandeur de l'ordre du Ouissam alaouite |
Yucka d tiklit izwurn s tmazirt n lmɣrib ɣ usggʷas 1911, ikka tt inn yucka d f usmmigl n wutuy n tsrdast n Mulay Ḥfiḍ ɣ Fas, yufa imil is d tagrumma da f illa ad iglli gis ɣar irgazn sɣ tmazirt n Sus sɣ dar ilmd tutlayt taymmat lli tt igan d Taclḥit, ukan lliɣ tt iɣʷi, ittut s tayri nns, yura adlis izwurn n ulmmud n tutlayt Taclḥit: Manuel Berbère Marocain, dialecte Chleuh (1914). ur gis ibdir tajrrumt d umawal hlli, is gis irna ula kra n tmrawin n umiyn mi issfld sɣ dar isrdasn nns lli ganin iclḥiyn, ɣikann a s rad issnti ɣaylli f inna nttan "chères études berbères" (tiɣudiw iɛzzan n tmaziɣt).
Ɣ uskka n imnɣi imqqurn, yan usmmigl iɣzzifn ɣ wagʷns n tmizar n Sus rad yili gr 1916 ar 1921, rad t yajj ad ismuccd ɣaylli isala ɣ Tclḥit d umarg, aḥwac a sɣ d ismun tiyytin ggutnin n inḍḍamn d id mafawal. Imgr mnnawt gisnt d igzzumn ɣ umarg, issuɣl tn s ixf nns, fad ad gisn ifsr kra slawan ɣ tsɣunt n Hisbiris.