Takṛknnayt tazggʷaɣt

Tikṛknnayin tizggʷaɣin n idammn (érythrocytes) nttnti ad ittasin amgusmam (uksijin) sɣ turin ar iẓḍwan n tɣssa. Ar ttyarunt tkṛknnayin zggʷaɣnin ɣ wadif anɣsan, ɣ tudrt nnsnt ar ttkkant ma ittggan 120 n wussan (kkuẓ iyyirn). Dɣ ayann a f ar ittili f wadif anɣsan ad bdda iskar tikṛknnayin zggʷaɣnin timaynutin, afad ad ssnfalnt xtilli ussrnin nɣ d xtilli ftanin ɣ unṣaḍ n idammn. Mayad ar isɣawsa s yan wadif idusn d yan unck ittudun n ifrdisn yaḍnin, zun d uzzal, d usmam afuli (acide folique), ula Bitamin B12.

Agu ɣ ittidrus wuṭṭun n tkṛknnayin zggʷaɣnin, ar d ittili waṭṭan n tgnẓit n idammn (Animiya). Llan yadlli mnnaw isragn dar waṭṭan ad, wan: Anṣaḍ n idammn (ingasn, anṣaḍ n idammn ɣ uslda anfrad), arddal n tkṛknnayin ad s mgal-iɣssiwn (anticorps) niɣ iɣ illa kra n umalad ɣ talɣa nnsnt, ula iɣ tlla kra n tmukrist ɣ imuglubin niɣ s iba n inzimn.

Llan imntal yaḍnin i tmuḍan n tkṛknnayin zggʷaɣnin zun d: tagnẓit n wuzzal, ɣ usmam afuli niɣ d ɣ bitamin B12. Ar d daɣ ttilin s tamuɣt da ikkatn adif n iɣsan (s iriyyn, niɣ d ulukimiya / afurray n idammn), ula tiṛmi isuln n tgẓẓal iɣ ur ar bahra fttunt mzyan, d ula timuḍan n iẓwiẓẓiwn sulnin.

Tazzit n tkṛknnayin zggʷaɣnin

Tikṛknnayin tizzggaɣin n idammn ṭṭafnt yat turrut izgan, tili gr 7 ar 8 µm. Mayad ad gisnt iskrn d "isḍḍaṛn iẓḍawann" lli ɣrdnin afad ad tn nsmzazal d tidda n tuggt n tɣrasin yaḍnin ɣ turmitin n kraygat ass. Waxxa ɣikann, ṭṭafnt yat talɣa iẓlin ur irwasn tuggt n tɣrasin n tɣssa n ufgan.

Ɣ umzwaru, tiɣrasin ad lant yat talɣa mu snat tiwuṛḍa (biconcave), s ɣmkad nit, trwas s kra idrnan (ccfnj). nnsnt tḍni uggar n tuẓẓumt nnsnt. Ɣaylli issflin ar adag ismni amakay n tilmct tawɣrast. Issrxu ɣikad ammakka n urrign d usmattay.