Tiggura n Trudant

Tkka tt inn tɣrmt n Trudant tga tamaẓunt tasrtant d tdamsant n Sus d iffus n Lmɣrib, ar tt lkkmnt irffakn n isbbabn da d ttackanin sɣ tmizar n isggann, mdin as walln n isbbabn n iṛmmuyn sɣ mnnawt tmizar zun d Fransa d Ingliz d Hulanḍa d Ṣbanya, tssn nit ɣ tasut tis 16 yan ubuɣlu ɣ tmguri n ṣṣkaṛ lli tt inn ikkan ar ittyazan s luṛub, s imrkidu nns tettyawssan Trudant, ffin fllas isbbabn sɣ tuggt n tsgiwin.

Bab Tamẓḍawt (ism aqbuṛ) niɣ d Bab Lqsba niɣ d Bab n ssnsla

Tiɣrmt ad ar daɣ tskan is tga yan udasil asrdas n umdday d umatr n iɣarasn n irffakn, yuman mayann s ugadir nns da ilan sa kilumiṭṛ, d yat tzuri n sa mitru, zrint gis smmust tiggura mqquṛnin ad tnt igan d: Bab lxmis d Bab tarɣunt d Bab tamẓḍawt (Lqsba) d Bab ayt bununa d Bab ẓẓṛgan, gint yan uzgzl n yan umzruy aẓuṛaw, ig yan usmad amsdag da ɣ dran mnnaw iwunak sɣ imṛabḍn ar isɛdiyn.

Tilalin n tiggura

Tilalt Tasrdast

Kkant tt inn tiggura n Trudant ṭṭafnt mnnawt twuriwin gisnt tawuri tasrdast, d ɣayad ad tmmala tigtti n issutuln d lqwit n isaragn. , ur iml ad ikcm yan nnican Tarudant, d iɣ ikcm yan aggur amzwaru iqqan d ad izri ɣ yan usaka idln fad ad iffuɣ s usarag amzwaru.

Kra iga tt aggur llan dars sa iganziwn d iɣ illa kra n wazzaɣ ula kra n unttag, ar zwar ttqqnnt tiggura n tɣrdin fad s win dat afad ad sglfn imntagn gr snat tiggura, d ɣikad a s ar ittnfalal utwal icṛmḍn dar willi skrnin agadir ad.

Tilalt n waẓẓayn

Gan waẓẓayn yat ɣ twuriwin n tiggura ad slawan akkʷ lliɣ tga tiɣrmt ad d tasrst tamzwarut n irffakn da d ttackanin sɣ tnzruft d tmizar n isggann, tssrxu tɣrmt tawuri ad, acku iɣrd gis usnm n ubrid n ukccum n ikabaṛn d iḍi n waẓẓayn sɣ dar uwank.

Tilalt n uɣlas

Ur bxiln willi skrnin agadir n Trudant ad fkin yat tilalt tuɣlist i tiggura ad, ukan lliɣ ar ikccm unrzaf tiɣrmt ad sɣ tiklit izwurn ar ittafa agayyu nns is ijla gr tiggura d isaragn ad ggutnin s ɣmkad ar ittyawmnad unrzaf tettyawssan tmagit nns d umnid.

Bab Tamẓḍawt (ssnsla)

Iga yad asdrm amzwaru n tɣrmt sɣ uzmz n wisɛdann, ism ad n "ssnsla" ur igi aqdim ur illi ar yat tmiḍi n isggʷasn ayad, d ur ittyawbdar ɣ kra n tsaɣult iṛun, ukan ikka tt inn waggur ad iga tanqqiḍt tamzwarut n tiḍaf, mnid nit n trga n tfllagt dar ism ad nit n ssnsla, gis sin igjda n ssima, ilint ɣ uflla nnsn snat twinas n wuzzal qqnnt akkʷ s yan usrsl izurn afad ad sɣin i wanna d yuckan s lmdint ad ibidd, glin as mani d ikka d mani s ira d ma iga.

Aggur ad iga daɣ asdrm n imckan imaddudn d tmldiwin n usfuglu d tgummiwin n isrdasn yili gr snat tiggura ann yan usarag ddu itran, tasna nns gis kra n 88m². Ɣ umnaḍ n iẓẓlmḍ illa yan uskfl atrar gin t i imallayn ar sis ɣlin s yan isimna ɣ uflla ar gis ttamẓn tiwlafin, ifk asn yat tmuɣli ifulkin i tɣrmt. Tanila n iẓẓlmḍ ar gis ittnafalal sɣ usaggʷ n ugadir ixf ann umlil n udrar n Drn, ɣ iming llan wayniwn zgzawnin, ɣ iffus llan imttuln n iziyyatn d igran n waḍil d ṛṛmman d wazar, ɣ tagut tlla tigmmi n lbaṛuḍ s ismna nns.

Bab n ayt Bununa

Illa f wasif n imntagn (wad lwaɛr), ism ad izdi d yat twja izdɣn ɣ Trudant, tg sɣ indlas ann ɣ ẓẓan iṛmmuyn sɣ wandalus, illa ɣ ugns n waggur yat tsaragt tazgrart ilan 24m² n tasna, ig slaɣ nttan lli f ittyawbna yan usayrar amẓẓiy ikṛuṛẓn.

Bab lxmis

Illa ɣ iming aẓlmaḍ n tɣrmt, innuṛẓm f usmḍl lli igan aqbuṛ ɣ dɣinn, izwur akkʷ azmz wisɛdan s ixf nns, mklli d yuckan ɣ udlis n الفوائد الجمة في إسناد علماء الأمة lli igan win Buzid Ɛbd Rrḥman u tmanart, imma iɣrɣr n ɣikkad lli d yurrin iga yan isimna isggmn, ikka tt inn iga kra n imttuln n tyirza d ukfas, gis yat tsaragt tamggansut yazufn dars 78m². Tili daɣ gis yat tmzgida mẓẓiyn tettyawsmma "timzgida n gr tiggura" tlla gis yat talimamt ikrin bḥra yuda wasa nns i tzgda n ṭṭalb, tg yan ugzzum ɣ taggst n ugadir. Tiɣrdin nns illa yan wadur i kra n sin d mraw n imẓẓulla, d yat tanut niɣ d yat tanuṭfi kkan tt inn ar d gis ttagmn.

Bab Tarɣunt

Ar as daɣ ttinin "Bab Lɣzu" (Aggur n uslak) acku izdi d wazzaɣn kkanin tiqbilin n waɛrabn d tiffaɣ n ayt tɣrmt bac ad tn sbiddn ɣ tmrarut,