Amsawal n ufaylu:صورة تاغنجا لطقوس تسليت ن أنزار.jpg

ⵜⴰⵖⵏⵊⴰ ⵏ ⵓⵏⵥⴰⵕ / ⵜⴰⵙⵍⵉⵜ ⵏ ⵓⵏⵥⴰⵕ

ⵜⴰⵎⵢⵓⵔⵜ ⵜⴰⵙⵍⵉⵜ ⵏ ⵓⵏⵥⴰⵕ / ⵜⴰⵖⵏⵊⴰ :

ⵜⴳⴰ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⵢⴰⵜ ⵜⵎⵢⵓⵔⵜ ⵍⵍⵉ ⵢⵓⵜⵏ ⵙ ⵉⵥⵓⵕⴰⵏ ⵖ ⵓⵎⵣⵔⵓⵢ, ⴷ ⵜⵓⵙⵙⵏⴰ ⵏ ⵉⵎⴰⵣⵉⵖⵏ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ.ⵜⴳ ⵜⴰⵎⵢⵓⵔⵜ ⵍⵍⵉ ⵉⵜⵜⵉⴷⵔⴰⵙⵏ ⵉⵎⵉⴽⴽ ⵙ ⵉⵎⵉⴽⴽ, ⴰⵔ ⵜⵜⴰⴼⵓⴹ ⵣⵖ ⴳⵔ ⵜⵎⵢⵓⵔⵉⵏ ⵏ ⵓⵎⴰⵣⵉⵖ(عادة طقوسية مهددة بالانقراض).
 ⵜⵜⵢⴰⵡⵙⵙⴰⵏ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ( ⵜⴰⵖⵏⵊⴰ ) ⵖ ⵡⴰⴽⴰⵍ ⵏ ⵜⵎⴰⵣⵖⴰ ⴰⴽⴽⵯ, ⵜⵖⴰⵎⴰ ⵜⴳⴰ ⵜⴰⵎⵢⵓⵔⵜ ⵏ ⵎⵉⴷⴷⵏ ⵉⵎⴰⵣⵉⵖⵏ ⵉⵙⴰⵡⴰⵍⵏ ⵜⴰⵎⴰⵣⵉⵖⵜ, ⴰⵡⴷ ⵡⵉⴷ ⵜⵄⵕⵕⴱⵏⵉⵏ ⵉⵣⴷⵖⵏ ⵖ ⵜⵙⴳⴳⵉⵡⵉⵏ ⵏ ⵜⵎⴰⵣⵖⴰ ⵉⵙⴰⵡⴰⵍⵏ ⴷⴷⴰⵔⵉⵊⴰ.
 ⵜⴳⴰ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⵢⴰⵜ ⵜⵎⵢⵓⵔⵜ ⴱⴰⵀⵔⴰ ⵉⴳⴰⵏ ⵜⴰⵣⴰⵢⴽⵓⵜ ⵉⵣⴷⵉⵏ ⴷ ⵓⵙⴳⴷ ⴷ ⵜⵓⵜⵜⵔⴰ ⵏ ⵓⵏⵥⴰⵕ, ⴰⵔ ⵜⵜ ⵉⴷ ⴽⵜⵜⵉⵏ ⵉⵎⴰⵣⵉⵖⵏ ⵖ ⵜⵉⵣⵉ ⵖ ⵉⵣⵡⴰ ⵡⴰⴽⴰⵍ, ⴷⵔⵓⵙⵏ ⵡⴰⵎⴰⵏ, ⵉⵏⵖ ⵉⵔⵉⴼⵉ ⵜⴰⵢⵔⵣⴰ ⴰⵡⴷ ⵉⵙⵙⴽⵯⵍⴰ, ⴰⵡⴷ ⵉⵎⵓⴷⴰⵔ ⴷ ⵓⴼⴳⴰⵏ.
 ⵎⵎⵔⵡⴰⵙⵏⵜ ⵜⵖⴰⵔⴰⵙⵉⵏ ⵍⵍⵉ ⵙⴰ ⵣⵣⵔⴰⵢⵏ ⵉⵎⴰⵣⵉⵖⵏ ⵜⴰⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ (ⵜⴰⵖⵏⵊⴰ ) ⵖ ⵡⴰⴽⴰⵍ ⵏ ⵜⵎⴰⵣⵖⴰ ⴰⴽⴽⵯ, ⵉⴷⵔⵓⵙ ⵓⵥⵉⵍⴰⵍ ⵏⴳⵔ ⵜⴰⵎⵢⵓⵔⵜ ⵏ ⴽⵔⴰ ⵏ ⵓⴷⵖⴰⵔ ⴷ ⵜⴰⵢⵢⴰⴹ ⵉⵍⵍⴰⵏ ⵖ ⵓⵙⴳⴰ ⵢⴰⴹⵏⵉⵏ.
  ⵜⴰⵎⵢⵓⵔⵜ ⴰⴷ ⵣⵎⵎⵉⵎⵏ ⵜⵜ ⴽⵉⴳⴰⵏ ⵏ ⵉⴷⵍⵉⵙⵏ ⵏ ⵉⵎⴰⵔⴰⵜⵏ ⵏ ⵓⵎⵣⵔⵓⵢ, ⴷ ⵜⵙⵓⵙⵢⵓⵍⵓⵊⵉⵜ, ⴷ ⵜⵓⵙⵙⵏⴰ, ⴷ ⵜⵙⴽⵍⴰ. ⴱⴷⵔⵏ ⵙ ⵓⵣⵓⵣⵣⵔ ⴰⵏⴰⵡⵏ ⵏ ⵜⴼⴼⵓⴳⵍⵉⵡⵉⵏ, ⴷ ⵜⵖⴰⵔⴰⵙⵉⵏ ⵙⴰ ⵣⵣⵔⴰⵢⵏ ⵉⵎⴰⵣⵉⵖⵏ ⵜⴰⵎⵢⵓⵔⵜ ⴰⴷ, ⵥⵍⵉⵏ ⵏⴳⵔ ⵜⵎⵢⵓⵔⵜ ⴷ ⵜⴰⵢⵢⴰⴹ ⵖ ⵜⵎⵏⴰⴹⵉⵏ ⵏ ⵜⵎⴰⵣⵖⴰ, ⴼⵙⵉⵏ ⵜⵉⵎⴰⵜⴰⵔⵉⵏ ⵏ (Mythe) ⵍⵍⵉ ⴷⵉⵙ ⵜⵓⵙⵉ ⵜⴰⵎⵢⵓⵔⵜ ⴰⴷ ⵏ ⵜⴰⵖⵏⵊⴰ.

- ⵜⴰⵙⵍⵉⵜ ⵏ ⵓⵏⵥⴰⵕ (قوس قزح) : ⵜⴰⵙⵍⵉⵜ ⵏ ⵓⵏⵥⴰⵕ : ⵉⴳⴰ ⵜⵜ ⵖ ⴷⴰⵔ ⵉⵎⴰⵣⵉⵖⵏ (قوس قزح), ⵜⴰⴳⵓⵔⵉ ⵏ ⵜⵙⵍⵉⵜ ⵏ ⵓⵏⵥⴰⵕ ⵙ ⵜⵓⵜⵍⴰⵢⵜ ⵏ ⵜⵄⵕⴰⴱⵜ ⵉⴳⴰ ⵜⵜ (عروس المطر) .

 ⵉⴳ (قوس قزح) ⵖ ⵜⵓⵜⵍⴰⵢⵜ ⵏ ⵜⵎⴰⵣⵉⵖⵜ ⵜⴰⴷ - مؤنث  (عروس المطر- عروس أنزار), ⵜⴳ ⵜⵙⵍⵉⵜ ⵖ ⵜⵎⵢⵓⵔⵜ ⴰⴷ ⵖ ⴷⴰⵔ ⵉⵎⴰⵣⵉⵖⵏ ⵜⴰⵎⴰⵜⴰⵔⵜ ⵏ ( ⴰⴽⴰⵍ ), ⵣⴷⵉⵏ ⵜⵜ ⴷ ⵓⵏⵥⴰⵕ.
 ⴰⵏⵥⴰⵕ : ⵉⴳⴰ ⵖ ⴷⴰⵔ ⵉⵎⴰⵣⵉⵖⵏ ⵓⵔⵜⴰ ⵜⵍⵍⵉ ⵜⵍⴰⵍⵉⵜ ⴰⴽⵓⵛ ⵏ ⵡⴰⵎⴰⵏ (اله المطر), ⴰⵔ ⵜⵜ ⵉⵏⵉⵏ ⵉⵎⴰⵣⵉⵖⵏ ⴰⵎⴰⵏ ⵏ ⵓⵏⵥⴰⵕ. ⵉⴳ ⵓⵏⵥⴰⵕ ⵖ ⵜⴰⵎⵢⵓⵔⵜ ⵏ ⵜⵖⵏⵊⴰ ⴰⵎⴰⵜⴰⵔ ⵏ ⵉⴳⵏⵏⴰ.
 ⵜⴰⵖⵏⵊⴰ : ⴰⵖⵏⵊⴰ ⵏ ⵓⴽⵛⵛⵓⴹ ⵎⵇⵇⵓⵕⵏ (مغرفة كبيرة من الخشب), ⵖ ⵜⵎⵢⵓⵔⵜ ⵏ ⵜⵖⵏⵊⴰ ⵏ ⵓⵏⵥⴰⵕ ( ⵜⴰⵙⵍⵉⵜ ⵏ ⵓⵏⵥⴰⵕ ) ⴰⵔ ⵣⴷⴰⵢⵏ ⴰⵖⵏⵊⴰ ⴷ ⵓⵖⴰⵏⵉⵎ ⵉⵖⵣⵣⵉⴼⵏ ⵉⴹⵏⵉⵏ, ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵙⵍⵉⵜ ⵉⵍⴰⵏ ⴽⵉⴳⴰⵏ ⵏ ⵉⴽⵯⵍⴰⵏ, ⴰⴳⵯⵍⵏ ⴰⵙ ⵜⵉⵣⵕⵣⴰ ⵏ ⵏⵇⵇⵕⵜ.
 ⵜⴰⵎⵢⵓⵔⵜ ⴰⴷ ⵏ ⵜⵙⵍⵉⵜ ⵏ ⵓⵏⵥⴰⵕ ⵜⴳⴰ  ⴰⵙⵙⴽⵜⵉ/ⴰⴽⵜⵜⴰⵢ, ⵏ ⵜⵎⵖⵔⴰ ⵍⵍⵉ ⵜⴱⴷⵔ ⵜⵎⴰⵛⴰⵀⵓⵜ, ⵍⵍⵉⵖ ⵙⵜⴰⵀⵍⵏ ⵎⵉⴷⴷⵏ ⵢⴰⵜ ⵜⵔⴱⵉⵜ ⵜⴰⴼⴰⵍⴽⴰⵢⵜ ⵉ ⵓⵏⵥⴰⵕ, ⵙⵙⵍⵙⵏ ⵉ ⵜⵙⵍⵉⵜ ⵖ ⴰⴽⵓⴷ ⴰⵏⵏ ⵜⵉⵎⵍⵙⴰ ⵉⵕⵛⵎⵏ ⵙ ⴽⵉⴳⴰⵏ ⵏ ⵉⴽⵯⵍⴰⵏ. ⵜⴳ ⵜⵎⵢⵓⵔⵜ ⴰⴷ ⵓⵍⴰ ⵜⵓⵜⵜⵔⴰ ⵏ ⵎⵉⴷⴷⵏ ⵉ ⵡⴰⴽⵓⵛ ⵏ ⵡⴰⵎⴰⵏ, ⵃⵎⴰ ⴰⴷ ⴷ ⵉⴽⵜⵉ  ⴰⴽⴰⵍ ⵙ ⵉⵎⵉⴽⴽ ⵏ ⵓⵏⵥⴰⵕ.
                                               ⵍⵉⵜⵉⵀⴰⵍ
     ⵜⴰⵙⵍⵉⵜ ----------------------------------ⴰⵎⴰⵏ - ⴰⵏⵥⴰⵕ------------------------ ⴰⵏⵥⴰⵕ 
ⵜⴰⵎⴰⵜⴰⵔⵜ ⵏ ⵡⴰⴽⴰⵍ                                    =                           ( ⴰⴽⵓⵛ ⵏ ⵡⴰⵎⴰⵏ)
                                                ⵜⵓⵔⵓⵜ                          ⴰⵎⴰⵜⴰⵔ ⵏ ⵉⴳⵏⵡⴰⵏ
                                                ⵜⵓⴷⵔⵜ
                                                ⴰⴱⵓⵖⵍⵓ

• ⵥⵕ, ⵖⵔ ⵓⴳⴳⴰⵔ ⵖ ⵓⴷⵍⵉⵙ ⵏ (Emile laoust), ⵍⵍⵉ ⵉⵍⴰⵏ ⴰⵣⵡⵍ ⵏ : Mots et choses berbéres , ⵍⵍⵉⵖ ⵉⵣⵓⵣⵣⵔ ⴰⵡⴰⵍ ⴼ ⵜⴰⵎⵢⵓⵔⵜ ⵏ ⵜⴰⵖⵏⵊⴰ ⵏ ⵓⵏⵥⴰⵕ : https://qdoc.tips/queue/mots-et-choses-berberes-emile-laoust-3-pdf-free.html • ⵥⵕ, ⵖⵔ ⵓⴳⴳⴰⵔ ⵖ ⵓⴷⵍⵉⵙ ⵏ ⵎⵓⵃⵎⵎⴰⴷ ⵓⵙⵓⵙ, ⴽⵓⴽⵔⴰ كوكرا في الميثولوجيا الأمازيغية, لمحمد أوسوس, صفحة 120, الفصل السادس  : https://akalpress.com/4086-%D9%83%D9%88%D9%83%D8%B1%D8%A7-%D9%81%D9%8A-%D8%A7%D9%84%D9%85%D9%8A%D8%AB%D9%88%D9%84%D9%88%D8%AC%D9%8A%D8%A7-%D8%A7%D9%84%D8%A3%D9%85%D8%A7%D8%B2%D9%8A%D8%BA%D9%8A%D8%A9-%D9%85%D8%AD%D9%85%D8%AF/

- ⵜⴰⵙⵍⵉⵜ ⵏ ⵓⵏⵥⴰⵕ ( ⵖ ⵜⵎⴰⵛⴰⵀⵓⵜ / الأسطورة ) :

ⵏⵏⴰⵏ ⵉⵎⵔⵣⵓⵜⵏ ⵍⵍⵉ ⵉⵙⵉⴳⴳⵉⵍⵏ ⵙ ⵓⵥⵓⵕ ⵏ ⵜⵎⵢⵓⵔⵜ ⴰⴷ ⵏ ⵜⵙⵍⵉⵜ ⵏ ⵓⵏⵥⴰⵕ, ⵎⴰⵙ ⵜⵙⵙⴼⴰⵍ ⵙ ⵢⴰⵜ ⵜⵎⴰⵛⴰⵀⵓⵜ ⵉⵍⵓⵍⵏ ⵖ ⵉⴷⵓⵔⴰⵔ ⵏ ⵍⴰⵡⵔⴰⵙ (ⵖ ⴷⵣⴰⵢⵔ). ⵜⵉⵍⵉ ⵜⴷⴷⵔ ⵖ ⵉⵍⵙ ⵏ ⵓⵎⴰⵣⵉⵖ ⵣⵖ ⵜⴰⵙⵓⵜⵉⵏ  ⵏⵏ ⵢⴰⴳⴳⵓⴳⵏ ⴰⵔ ⵖⵉⵍⴰⴷ. ⴱⴷⵔⵏ ⵜⵜ ⵎⵉⴷⴷⵏ ⵖ ⵜⵎⴰⵣⵖⴰ ⴰⴽⴽⵯ.
 ⵜⵙⵙⴼⴰⵍ ⵜⵎⴰⵛⴰⵀⵓⵜ ⵙ ⵜⴰⵢⵔⵉ ⵏ ⵡⴰⴽⵓⵛ ⵏ ⵡⴰⵎⴰⵏ (ⴰⵏⵥⴰⵕ ), ⵍⵍⵉⵖ ⵉⵥⵕⴰ ⵢⴰⵜ ⵜⵔⴱⵉⵜ ⵜⴰⴼⴰⵍⴽⴰⵢⵜ ⵉⵍⵍⵉⵙ ⵏ ⵉⴷⵓⵔⴰⵔ ⵏ ⵍⴰⵡⵔⴰⵙ, ⴰⵔ ⵜⵜⵓⵔⴰⵔ ⵖ ⵡⴰⵎⴰⵏ ⵏ ⵡⴰⵙⵉⴼ ⵜⵃⵎⵍ  ⴱⴰⵀⵔⴰ ⴰⵎⴰⵏ, ⴰⵔ ⵜⵙⵙⵉⵔⵉⴷ ⵓⴷⵎ ⵏⵏⵙ, ⴷ ⵉⴼⴰⵙⵙⵏ ⵏⵏⵙ, ⴷ ⵉⴹⴰⵕⵏ ⵏⵏⵙ, ⵉⵥⵕ ⵜⵜ ⵉⵃⵎⵍ ⵜⵜ. ⵜⴰⵔⴱⵉⵜ ⵜⴳⴰ ⵙ ⵉⵙⵎ (ⵜⴰⵙⵍⵉⵜ). ⵢⵉⵔⵉ ⵓⵏⵥⴰⵕ ⵜⴰⴼⵔⵓⵅⵜ ⴰⴷ, ⵜⵊⴷⵔ ⵜⴰⵢⵔⵉ ⵏⵏⵙ ⵓⵍ ⵏⵏⵙ, ⵉⴳⴳⵯⵣ ⴷ ⵓⵏⵥⴰⵕ ⵣⵖ ⵉⴳⵏⵡⴰⵏ ⵙ ⵡⴰⴽⴰⵍ, ⵉⵙⵉⴳⴳⵍ ⵜⵜ ⵉ ⵍⵉⵜⵉⵀⴰⵍ, ⵎⴰⵛⵛ ⵜⴰⵙⵍⵉⵜ ⵜⵓⴳⵉⵜ, ⵜⴽⵙⵓⴹ ⴰⵢⵜ ⵜⵇⴱⵉⵍⵜ ⵏⵏⵙ, ⵡⴰⵅⵅⴰ ⵜ ⵓⴽⴰⵏ ⵜⵔⴰ ⴰⵡⴷ ⵏⵜⵜⴰⵜ.
 ⵍⵍⵉⵖ ⵜⵓⴳⵉ ⵜⵉⵙⵍⵉⵜ ⴰⵏⵥⴰⵕ ⵙ ⵍⵉⵜⵉⵀⴰⵍ, ⵉⵖⴰⵎⴰ ⵓⵏⵥⴰⵕ ⴰⴽⵓⴷ ⴰⵏⵏ ⵉⴷⴷⵔ ⵖ ⵓⵏⴽⴽⵉⴷ, ⵜⵉⵍⵉ ⵜⵛⴰⴳⴰ ⵖ ⵓⵍ ⵏⵏⵙ, ⵉⵜⵜⵓ ⴰⴽⴰⵍ, ⵉⴱⴱⵉⵏ ⵓⵏⵥⴰⵕ ⴼ ⵜⵓⴷⵔⵜ ⵖ ⵉⴳⴳⵉ ⵡⴰⴽⴰⵍ. ⵉⵏⵖ ⵉⵔⵉⴼⵉ ⵎⵉⴷⴷⵏ, ⵉⵣⵓ ⵡⴰⴽⴰⵍ, ⴷⵔⵓⵙⵏ ⵡⴰⵎⴰⵏ, ⵉⵍⵉ ⴼⴰⴷ ⵉⴳⴳⵓⵜⵏ ⵖ  ⵉⵙⵙⴽⵯⵍⴰ ⴷ ⵜⴰⵢⵔⵣⴰ ⴷ ⵉⵎⵓⴷⴰⵔ, ⵜⵖⵓⴼ ⵜⵓⴷⵔⵜ.
ⵜⴰⵙⵍⵉⵜ ⴰⵡⴷ ⵏⵜⵜⴰⵜ ⵎⵎⵕⵥⴳⵏ ⵓⵙⵙⴰⵏ ⵏⵏⵙ, ⵙⵙⵓⵜⵔⵏ ⵜⵜ ⵎⵉⴷⴷⵏ ⴰⴷ ⵜⴰⵀⵍ ⵙ ⵓⵏⵥⴰⵕ (ⴰⴽⵓⵛ ⵏ ⵡⴰⵎⴰⵏ), ⵜⵉⵔⵉ ⵎⴰⵢⴰⵏ ⵙ ⵜⵓⵎⵔⵜ ⴳⴳⵓⵜⵏ.
 ⵍⵍⵉⵖ ⵉⵍⴽⵎ ⵡⴰⵙⵙ ⵏ ⵜⵎⵖⵔⴰ, ⵙⵙⵍⵙⴰⵏ ⵉ ⵜⵙⵍⵉⵜ ⵜⵉⵎⵍⵙⴰ ⵖ ⵍⵍⴰⵏ ⴽⵉⴳⴰⵏ ⵏ ⵉⴽⵯⵍⴰⵏ, ⴰⴳⵯⵍⵏ ⴰⵙ ⵉⵥⵕⵥⴰ ⵏ ⵏⵇⵇⵕⵜ ⴷ ⵜⵣⴱⴳⴰⵜⵉⵏ ⵏ ⵓⵔⵖ, ⵉⴳⴳⵯⵣ ⴷ ⵓⵏⵥⴰⵕ ⵣⵖ ⵉⴳⵏⵡⴰⵏ ⵉⵙⵙⵓⵙⵎⵜ ⵡⴰⵙⵙ ⴰⵏⵏ, ⵉⵜⴰⵀⵍ ⵜⵜ ⵢⴰⵡⵉ ⵜⵜ ⵖⵍⵉⵏ ⵙ ⵉⴳⵏⵡⴰⵏ, ⵜⵕⵥⵎ ⵜⴰⴳⵓⵜ ⵉ ⵡⴰⵎⴰⵏ ⵉⵍⵉ ⵓⵏⵥⴰⵕ ⵉⵙⵓ ⵡⴰⴽⴰⵍ, ⵜⴱⵓⵖⵍⵓ ⵜⵓⴷⵔⵜ.

- ⵜⴰⵎⵢⵓⵔⵜ ⵏ ⵜⵓⵜⵜⵔⴰ ⵏ ⵓⵏⵥⴰⵕ ⵖ ⵜⵎⴰⵣⵖⴰ (ⵜⴰⵙⵍⵉⵜ ⵏ ⵓⵏⵥⴰⵕ / ⵜⴰⵖⵏⵊⴰ) :

 ⵜⵜⵢⴰⵡⵙⵙⴰⵏ ⵜⴰⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ, ⵖ ⵜⵎⴰⵣⵖⴰ ⴰⴽⴽⵯ, ⵖ ⴽⵓ ⵜⴰⵎⵏⴰⴹⵜ, ⵉⵍⵍⴰ ⵎⴰ ⵖ ⵜⵜⵢⴰⵡⵙⵙⴰⵏ ⵙ ⵜⴰⵖⵏⵊⴰ, ⵉⵍⵉ ⵎⴰⵖ ⵜⵙⵙⵏ ⵎⵉⴷⴷⵏ ⵙ ⵜⴰⵖⵏⵊⴰ ⴰⵡⴷ ⵜⴰⵙⵍⵉⵜ ⵏ ⵓⵏⵥⴰⵕ, ⵜⴳⴰ ⵜⴰⵎⵢⵓⵔⵜ ⴰⴷ ⵜⵓⵜⵜⵔⴰ ⵏ ⵓⵏⵥⴰⵕ.
  ⵖ ⴽⵔⴰ ⵉⴳⴰ ⵜⵜ ⴰⴷⵡⵡⴰⵕ ⵏⵉⵖ ⵜⴰⵇⴱⵉⵍⵜ ⴰⵔ ⵜⵜ ⵎⵓⵏ ⵢⴰⵜ ⵜⵔⴰⴱⴱⵓⵜ ⵏ ⵉⴼⵔⴰⵅ ⵎⵥⵥⵉⵏ ⴷ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ, ⵣⴷⵉⵏ ⴰⵖⵏⵊⴰ ⵎⵇⵇⵓⵕⵏ ⴷ ⵓⵖⴰⵏⵉⵎ ⵉⵖⵣⵣⵉⴼⵏ ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵙⵍⵉⵜ ⴰⵙⵉⵏ ⵜⵜ ⴰⵔ ⵙⵉⵙ ⵜⴽⴽⴰⵏ ⴰⴷⵡⵡⴰⵕ ⵜⵉⴳⵯⵎⵎⴰ ⴷ ⵉⵙⵡⴰⴽ ⴰⵔ ⵜⵜ ⴰⵎⵥⵏ ⵜⴰⵡⴼⴽⵉⵡⵉⵏ ⵣⵖ ⴷⴰⵔ ⵎⵉⴷⴷⵏ, ⴰⵔ ⵜⵏ ⵜⵕⵓⵛⵛⵏ ⵎⵉⴷⴷⵏ ⵙ ⵡⴰⵎⴰⵏ, ⵉⵖ ⵙⵎⵓⵏⵏ ⵜⴰⵡⴼⴽⵉⵡⵉⵏ ⵣⵖ ⴷⴰⵔ ⵉⵎⵣⴷⴰⵖ ⴷⴷⵓⵏ ⵙⵙⵓⵜⵍⵏ ⵜⴰⵖⵏⵊⴰ ⵏ ⵓⵏⵥⴰⵕ ⵉ ⵉⴳⵯⵔⵔⴰⵎⵏ, ⴰⵔ ⵙⵎⵓⵔⵉⴳⵏ ⵉⵣⵍⴰⵏ ⵙ ⵜⵎⴰⵣⵉⵖⵜ ⵏⵉⵖ ⴷⴷ ⵙ ⴷⴷⴰⵔⵉⵊⴰ. ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ ⵉⵥⵍⵉ ⵉⵣⵍⵉ ⵍⵍⵉ ⵜⵜ ⵉⵏⵉⵏ ⵜ ⵜⵎⵖⴰⵔⵉⵏ ⴰⵙⵙ ⴰⵏⵏ, ⵎⴰⵛⵛ ⵉⵣⵍⴰⵏ ⴰⴽⴽⵯ ⴳⴰⵏ ⵜⵓⵜⵜⵔⴰ ⵉ ⵕⴱⴱⵉ ⴰⴷ ⴰⵙⵏ ⴷ ⵉⴼⴽ ⴰⵏⵥⴰⵕ. ⴷⴷⵓⵏ ⵙ ⵉⴳⴳⵉ ⵏ ⴽⵔⴰ ⵏ ⵜⵡⵔⵉⵔⵜ ⵉⵍⵍⴰ ⵖ ⵜⴰⵎⴰ  ⵏ ⴽⵔⴰ ⵏ ⵡⴰⵙⵉⴼ, ⵏⵉⵖ ⴽⵔⴰ ⵏ ⵜⵔⴳⴰ, ⵏⵉⵖ ⵜⴰⵎⴷⴰ ⵏ ⵡⴰⵎⴰⵏ ⵏⵉⵖ ⴷⴷ ⴽⵔⴰ ⵉⴼⵔⵉ, ⵙⵔⵙⵏ ⵉⵙⴳⴳⵯⵉ ⵏ ⵜⵡⴰⴼⴽⵉⵡⵉⵏ, ⵙⵙⵏⵓⵏ ⵜ ⵜⵎⵖⴰⵔⵉⵏ ⵜⴰⴳⵯⵍⵍⴰ ⵏ ⵓⵡⵔⵔⵏ ⵏ ⵓⵣⵏⴱⵓ ⵏⵉⵖ ⵉⴱⵔⵉⵏ ⵏ ⵓⵙⵏⴳⴰⵔ ⵏⵉⵖ ⵡⵉⵏ ⵜⵎⵥⵉⵏ, ⵏⵉⵖ ⵉⵖ ⵓⵎⵙⵏ ⵜ ⴰⴱⴰⵜⵜⴰⵍ. ⵛⵛⵏ ⵎⵉⴷⴷⵏ  ⴷⵔⵓⵏ ⵜⵉⵔⵎⵜ ⵏ ⵜⵎⵢⵓⵔⵜ ⵏ ⵡⴰⵙⵙ ⴰⵏⵏ, ⵙⵙⵓⵜⵔⵏ ⵜ ⵜⵎⵖⴰⵔⵉⵏ ⴷ ⵜⴰⵣⵣⴰⵏⵉⵏ ⵣⵖ ⴱⴰⴱ ⵏ ⵉⴳⵏⵡⴰⵏ ⴷ ⵡⴰⴽⴰⵍ ⴰⴷ ⴰⵙⵏ ⴷ ⵉⴼⴽ ⴰⵏⵥⴰⵕ, ⵉⴱⵓⵖⵍⵓ ⵡⴰⴽⴰⵍ ⵜⵣⴷⴷⵉⴳ ⵜⵓⴷⵔⵜ.
ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ ⵜⵥⵍⵉ ⵜⵖⴰⵔⴰⵙⵜ ⵏⵏⵙ ⵖ ⵜⵎⵍⵙⵉⵜ ⵍⵍⵉ ⵙⵙⵍⵙⴰⵏ ⵉ ⵜⵖⵏⵊⴰ, ⴷ ⵡⴰⵏⴰⵡⵏ ⵏ ⵜⵉⵔⴰⵎ ⵙⵙⵏⵡⴰⵏ, ⴷ ⵉⴷⵖⴰⵔⵏ ⵏ ⵜⵎⵢⵓⵔⵜ. ⵎⴰⵛⵛ ⵜⴰⵎⵢⵓⵔⵜ ⵜⴳⴰ  ⵢⴰⵜ ⵖ ⴷⴰⵔ ⵉⵎⴰⵣⵉⵖⵏ ⴰⴽⴽⵯ ⵖ ⵡⴰⴽⴰⵍ ⵏ ⵜⵎⴰⵣⵖⴰ.

• ⵥⵕ ⵢⴰⵜ ⵜⵏⴼⵓⵍⵜ ⵢⵓⵔⴰ ⵎⵓⵃⵎⵎⴰⴷ ⵓⵙⵓⵙ ⵖ ⵡⴰⵏⵙⴰ ⴰⴷ ⴰⵍⵉⴽⵜⵕⵓⵏⵉ ⵙ ⵜⵓⵜⵍⴰⵢⵜ ⵏ ⵜⴰⵄⵕⴰⴱⵜ ⵉⵙⴰⵡⴰⵍⵏ ⴼ ⵜⵎⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⴷ (Mythe) ⵙⵉⵙ ⵉⵥⵍⵉⵏ : https://www.folkculturebh.org/ar/?issue=14&page=showarticle&id=37

ⴽⵔⴰ ⵏ ⵉⵣⵍⴰⵏ ⵜⵜ ⵉⵏⵉⵏ ⵜ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ, ⵖ ⵡⴰⵙⵙ ⵏ ⵜⴰⵙⵍⵉⵜ ⵏ ⵓⵏⵥⴰⵕ ⵉⵖ ⵓⵙⵉⵏ ⵜ ⵜⴰⵖⵏⵊⴰ, ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ :
    ⵜⵍⵖⵏⵊⴰ ⵏ ⴰⵢⵜ ⵕⴱⴱⵉ
     ⵡⴰⵍⵍⵉ ⵉⵣⵣⴳⴰⵏ ⵉⴼⴽ ⴰⵎⴰⵏ
   ⵕⵥⵎ ⴷ ⴰ ⵜⴰⴳⵓⵜ ⵉ ⵡⴰⵎⴰⵏ
   ⴳⴰⵏ ⵜ ⵜⵎⵥⵉⵏ ⴰⵙⴰⵖⵓⵔ
   ⴰⵏⵥⴰⵕ ⴰ ⴱⴰⴱⴰ ⵕⴱⴱⵉ
   ⴰⴷ ⵎⵖⵉⵏ ⵜ ⵜⵎⵥⵉⵏ
   ⵍⴽⵎⵏ ⵜ ⴰⴷⵎⵔ ⵏ ⵡⴰⵢⵢⵉⵙ.
 

• ⵖⵔ ⵢⴰⵜ ⵜⵓⵍⵍⵉⵙⵜ ⵜⴰⵙⴽⵍⴰⵏⵜ, ⵉⵙⴰⵡⴰⵍⵏ ⴼ ⵜⴰⵖⴰⵔⴰⵙⵜ ⵙⴰ ⵙⴼⴼⵓⴳⵍⵓⵏ ⵎⵉⴷⴷⵏ ⵜⴰⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ :

  “ ⴼⵜⴰⵏ ⵜ ⵙⵎⵎⵓⵙⵜ ⵜⵎⵖⴰⵔⵉⵏ ⵜⵉⵡⵙⵙⴰⵔⵉⵏ ⵙ ⵉⵡⴰⵍⴰ ⵢⴰⵏ ⵓⵚⵎⴹⵍ ⵏ ⵢⴰⵏ ⵓⴳⵯⵔⵔⴰⵎ ⵉⵍⵍⴰ ⵖ ⵜⵓⵥⵥⵓⵎⵜ ⵏ ⵜⴰⴳⴰⵏⵜ ⵏ ⵜⵙⴳⴰ ⵏ ⵓⴷⵡⵡⴰⵕ. ⴰⵔ ⵙⴰⵡⴰⵍⵏⵜ ⴳⵏⵜ ⴽⵓⵍⵍⵓ ⴰⵡⴰⵍ ⴼ ⵜⴳⵔⵙⵜ ⴷ ⵓⵏⵥⴰⵕ ⵍⵍⵉ ⵉⴼⵓⵍⴽⵉⵏ ⵉ ⵜⴰⴷⴷⴰⴳⵉⵏ ⵏ ⵍⵉⵜⵛⵉⵏ.
 ⴰⵔ ⵉⴼⵜⵜⵓ ⵓⵙⵔⴷⵓⵏ ⴰⵔ ⵉⴽⴽⴰⵜ ⵙ ⵓⵛⵡⵡⴰⴹ ⵏⵏⵙ, ⵣⵓⵏⴷ ⵉⵖ ⵉⵔⴰ  ⴰ ⵢⴰⵢⵍⵍ ⴰⵎ ⵉⴳⵉⴷⵔ ⵉⵜⵜⴽⴽⴰⵏ ⵉⴳⵏⵡⴰⵏ ⵉⵛⴰⵢⴼ ⴼ ⵉⴷⵓⵔⴰⵔ, ⵉⵟⴼⴰⵕⵜⵏ ⵜ ⵣⵖ ⵜⵖⵯⵔⴷⵉⵏ ⵏⵏⵙⵏ ⵜ, ⵢⵓⵙⵉ ⴽⵉⴳⴰⵏ ⵏ ⵉⴼⵛⴽⴰⵏ, ⴷ ⵜⵉⵇⵯⵍⵍⴰⵛ ⵏ ⵡⴰⵎⴰⵏ, ⵜⵉⵍⵉ ⵢⴰⵜ ⵜⵎⵖⴰⵔⵜ ⵜⵙⵙⵓⴷⴰ ⵉⴳⴳⵉ ⵏⵏⵙ, ⵉⵖ ⵢⴰⵥ  ⵓⵙⵔⴷⵓⵏ ⴽⵔⴰ ⵏ ⵓⵙⴰⵡⵏ ⴰⴷ ⴷⵉⵙ ⵉⵖⵍⵉ ⵙ ⵜⵉⵣⵣⵍⴰ ⵜⴳⴳⵯⵉⵣ ⵜⵎⵖⴰⵔⵜ ⴰⵏⵏ ⵣⵖ ⵉⴳⴳⵉ ⵏⵏⵙ, ⵜⴽⵚⵓⴹ ⴼ ⵓⵙⵔⴷⵓⵏ ⴷ ⴼ ⵉⵅⴼ ⵏⵏⵙ ⴰⴷ ⵣⵖ ⴳⵉⵙ ⵓⵔ ⵜⴹⵕ.
  ⵍⵍⵉⵖ ⵍⴽⵎⵏ ⵜ ⵖⵉⵏ ⵙⵔⵙⵏ ⵜ ⵉⴼⵛⴽⴰⵏ ⴷ ⵉⵇⵯⵍⵍⴰⵛ ⵏ ⵡⴰⵎⴰⵏ ⵙ ⵡⴰⴽⴰⵍ, ⵜⴼⵜⵓ ⵢⴰⵜ ⴳⵉⵙⵏ ⵜ ⴰⵔ ⵜⵙⴳⴰⴷⴷⴰ ⵉⵥⵕⴰⵏ ⴰⴷ ⴳⵉⵙⵏ ⵜⵙⴽⵔ ⵜⴰⴽⴰⵜ, ⴷ ⵢⴰⵜ ⵢⴰⴹⵏ ⴰⵔ ⵜⵙⵎⵓⵏⴰ ⵉⵔⵓⴽⵓⵜⵏ ⵖ ⵢⴰⵏ ⵓⵙⴳⴰ, ⴷ ⵓⴷⵖⴰⵔ ⴰⵏⵏ ⵉⵔⴽⴰ ⴱⴰⵀⵔⴰ, ⴰⵙⴳⴳⵯⴰⵙ  ⴰ ⵢⴰⴷ ⵓⵔ ⵊⵊⵓ ⵢⵓⵔⵙ, ⵍⵍⵓⵣⵣⴰⵏ ⴽⵓⵍⵍⵓ ⴳⵉⵙ ⵉⵥⵕⴰⵏ, ⵙⵎⵓⵏⵏ ⵜ ⵉⵥⵕⴰⵏ  ⴰⵔⵙⵏ ⵜ ⴰⴽⴰⵍ.
 ⴰⴷⵖⴰⵔ ⴰⵏⵏ ⵉⴳⴰ ⵢⴰⵏ ⵓⵙⴰⵢⵙ ⴰⵎⵥⵥⵢⴰⵏ ⵖ ⵎⵏⵉⴷ ⵏ ⵜⴳⴳⵓⵔⵜ ⵏ ⵓⴳⵯⵔⵔⴰⵎ ⵖ ⵉⴳⴳⵉ ⵏ ⵢⴰⵜ ⵜⵡⵔⵉⵔⵜ. ⵢⴰⵜ ⵜⵎⵚⵕⵉⵜ ⵜⵓⵎⵍⵉⵍⵜ ⵉⵖⵯⵔⴱⴰⵏ ⵏⵏⵙ ⵍⴰⵏ ⵍⵊⵉⵔ ⵣⵖ ⵓⴳⵯⵏⵙ ⴰⵡⴷ ⴱⵕⵕⴰ, ⵉⴳⵏ ⵖ ⵜⵓⵥⵥⵓⵎⵜ ⵏ ⵜⵎⵚⵕⵉⵜ ⴰⵏⵏ ⵢⴰⵏ ⵓⵚⵎⴹⵍ ⵏ ⵢⴰⵏ ⵓⵔⴳⴰⵣ. ⴰⵔ ⵜⵜ ⵉⵏⵉⵏ ⵎⴰⵙ ⵉⴳⴰ ⴰⴳⵯⵔⵔⴰⵎ, ⵉⴳ ⵣⵖ ⵉⴷ ⴱⴰⴱ ⵏ ⵕⴱⴱⵉ, ⵉⴼⴼⵖ  ⵜⵎⴰⵣⵉⵔⵜ ⵏⵏⵙ ⵉⴼⵍ ⵜⵜ ⵉⵏⵏ ⵉⴼⵍ ⵏⵏ ⵜⴰⵔⵡⴰ ⵏⵏⵙ ⵉⵎⵇⵇⵓⵕⵏ ⵉⵜⴰⵀⵍⵏ, ⵉⴼⵍ ⵏⵏ ⴰⴽⴰⵍ ⵏⵏⵙ ⴷ ⵡⴰⵢⴷⴰ ⵏⵏⵙ, ⵉⵣⵓⴳ ⵖ ⵜⵓⴷⵔⵜ. ⵢⴰⵛⴽⵉⴷ ⵙ ⵓⴷⵖⴰⵔ ⴰⵏⵏ ⵉⴳⴳⴰⵡⵔ ⴳⵉⵙ ⵖ ⵜⵓⵥⵥⵓⵎⵜ ⵏ ⵜⴰⴳⴰⵏⵜ ⴰ ⵉⵍⵍⵉⵖ ⴳⵉⵙ ⵉⵎⵎⵓⵜ. ⴷ ⵍⵍⵉⵖ ⵉⴷⴷⵔ, ⵎⵏⵛⴽⴽ ⵏ ⵎⵉⴷⴷⵏ ⵣⵖ ⵓⴷⵡⵡⴰⵕ ⴰⵏⵏ ⵜ ⵢⴰⵥⵏ ⵖ ⵜⴰⴳⴰⵏⵜ ⴰⵏⵏ ⴰⵔ ⴰⵙ ⵜⵜⴰⵡⵉⵏ ⵜⵉⵔⴰⵎ ⴷ ⵜⵖⴰⵡⵙⵉⵡⵉⵏ ⴷ ⵜⵉⵔⵣⵣⵉⴼⵉⵏ ⵍⵍⵉⵖ ⴰⵙⵏ ⵢⴰⴳⵯⵉ ⴰⴷ ⵉⴷⴷⵔ ⴳⵔⴰⵜⵙⵏ ⵖ ⵓⴷⵡⵡⴰⵕ. ⵓⴷⵎ ⵏⵏⵙ ⵉⴼⴰⵡ ⵉⴽⵍⵍⵉ ⵏⵏⴰⵏ, ⴷⴰⵔⵙ ⴰⵜⵉⴳ ⴰⴽⵙⵡⴰⵜ ⵓⵔ ⵉⴳⵉ ⵡⴰⴷ ⵉⵡⴹⴹⵕⵏ ⴷ ⵓⵔ ⵉⴳⵉ ⴰⵏⴰⴼⴰⵍ, ⵉⵎⵉ ⵏⵏⵙ ⴰⵔ ⵉⵙⴰⵡⴰⵍ ⵙ ⵜⴼⵓⵥⴰⵕⵜ ⴷ ⵓⵎⴷⵢⴰⵣ ⴷ ⵡⴰⵡⴰⵍ ⵢⵓⵖⴷⵏ ⴷ ⴽⵉⴳⴰⵏ ⵏ ⵉⵏⵣⵉⵜⵏ ⵉⵖ ⵉⵙⴰⵡⵍ. ⵉⴳ ⴰⴼⴳⴰⵏ ⵉⵖⵓⵙⵏ ⴷ ⴷⴰⵔ ⵜⵍⵍⴰ ⵜⴰⵡⵙⵙⵏⴰ ⴳⴳⵓⵜⵏ. ⵢⴰⵏ ⵓⵔⴳⴰⵣ ⴰⵎⵕⵡⴰⵚⵓ ⴰⵡⵙⵙⴰⵔ ⴱⵓ ⵜⵎⴰⵔⵜ ⵜⴰⵛⵎⵔⴰⵔⵜ, ⵜⵉⵎⵍⵙⴰ ⵏⵏⵙ ⵖⵓⵙⵏ ⵜ, ⵜⴳ ⵜⵎⵚⵕⵉⵜ ⴰⵏⵏ ⵜⵉⴳⵎⵎⵉ ⵏⵏⵙ ⵓⵔ ⵜⴰ ⵉⵎⵎⵓⵜ ⵉ ⵜⵜⵓⵎⴹⴰⵍ ⵖ ⵓⴳⵯⵏⵙ ⵏⵏⵙ.
 ⴳⴳⵉⵡⵔⵏⵜ ⵎⴰⵕⵕⴰ ⵏⵏⵙⵏ ⵜ ⴰⵔ ⵜⵇⵇⵍⵏ ⵜ ⴰⴷⴷ ⵍⴽⵎⵏ ⵜ ⵜⵎⵖⴰⵔⵉⵏ ⵢⴰⴹⵏ ⴷ ⵢⵓⵛⴽⴰⵏ ⵣⵖ ⵓⴷⵡⵡⴰⵕ.
 ⵢⴰⵏ ⵉⵎⵉⴽⴽ ⴰⵔ ⴷⵉ ⵜⵜⴰⴳⴳⵯⴰⵏ ⵜ ⴽⵔⴰ ⵏ ⵜⵔⵓⴱⴱⴰ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ ⴹⴼⴰⵕⵏⵜⵏ ⵉⵛⵉⵔⵔⴰⵏ ⵉⵎⵥⵥⵢⴰⵏⵏ. ⴷ ⵜⴼⵔⵅⵉⵏ ⵓⵙⵉⵏ ⵜ ⵢⴰⵏ ⵓⵖⴰⵏⵉⵎ ⵉⵖⵣⵣⵉⴼⵏ ⵉⴹⵏⵉⵏ (ⵜⴰⵖⵏⵊⴰ), ⵙⵙⵍⵙⵏⵜ ⴰⵙ ⵍⵇⴹⵉⴱ ⴰⵣⴳⴳⵯⴰⵖ ⴷ ⴽⵔⴰ ⵏ ⵜⵎⵍⵙⴰ ⴷ ⵜⵣⴱⴳⴰ, ⴰⵔ ⵜⵜⵉⵏⵉⵏ ⵉⵣⵍⵉ ⵏ ⵡⴰⵙⵙ ⴰⵏⵏ :

- ‘’ ⵜⵜⵍⵖⵏⵊⴰ ⵏ ⴰⵢⵜ ⵕⴱⴱⵉ ⵡⴰⵍⵍⵉ ⵉⵣⵣⴳⴰⵏ ⵉⴼⴽ ⴰⵎⴰⵏ...’’

  ⵍⵍⵉⵖ ⴷ ⵍⴽⵎⵏ ⵜ ⴳⴳⵉⵡⵔⵏ ⵜ ⵖ ⵓⵙⴰⵢⵙ, ⵙⵙⴼⴰⵍⵏ ⵜ ⴰⴷ ⵙⵙⵏⵓⵏⵜ ⵜⵉⵔⵎⵜ ⵏ ‘’ⵜⴰⴳⵯⵍⵍⴰ‘’ ⵙⵎⵓⵏⵏ ⵜ ⵉⴽⵛⵛⵓⴹⵏ ⵙⵙⵔⵖⵏ ⵜ ⵜⴰⴽⴰⵜ, ⴰⵔ ⵔⵡⵡⵉⵏ ⵜ ⴰⴳⴳⵯⵔⵏ ⵙ ⵓⴼⴼⴰⵍ ⵏ ⵜⴳⵯⵍⵍⴰ.
 ⴽⵔⴰ ⴳⵉⵜⵙⵏ ⵜ ⴰⵔ ⵙⵙⵏⵡⴰⵏ ⵜ ⵜⴰⴳⵯⵍⵍⴰ, ⴷ ⵜⵉⵢⵢⴰⴹ ⴼⵜⴰⵏ ⵜ ⴰⴷ ⴰⴳⵯⵎⵏ ⵜ ⴰⵎⴰⵏ ⵣⵖ ⵡⴰⵙⵉⴼ ⵍⵍⵉ ⴰⵙⵏ ⵜ ⵢⴰⵥⵏ, ⴷ ⵉⴼⵔⴰⵅ ⵉⵎⵥⵥⵢⴰⵏⵏ ⴰⵔ ⵜⵜ ⵓⵔⴰⵔⵏ ⴰⵔ ⴷⵉⵙⵏ ⵜⵜ ⵉⵏⵉⵏ ⵉⵣⵍⴰⵏ ⵏ ⵜⴼⴼⵓⴳⵍⴰ ⵏ ⵜⴰⵖⵏⵊⴰ, ⵜⵉⵍⵉ ⴳⵉⵜⵙⵏ ⵢⴰⵜ ⵜⵎⵖⴰⵔⵜ ⵜⴰⵡⵙⵙⴰⵔⵜ ⵜⴳⴳⵉⵡⵔ ⵜⴰⵎⴰ ⵏⵏⵙⵏ ⴰⵔ ⵜⵏ ⵜⵙⵎⴰⴳⵍ ⵜⴷⵔⵓ ⴷⵉⵙⵏ ⵜⴰⵡⵡⵓⵔⵉ ⵏⵏⵙⵏ, ⵜⵙⵔⵙ ⵜⴰⵎⴰ ⵏⵏⵙ ⵢⴰⵏ ⵓⵖⵏⵊⴰ ⴰⵎⵇⵇⵔⴰⵏ ⵏ ⵓⴽⵛⵛⵓⴹ ⴰⵣⴰⵢⴽⵓ, ⴰⵔ ⵜⵇⵇⵍ ⴰⴷ ⵜⴰⵛⴽ ⵜⵡⴰⵍⴰ ⵏⵏⵙ.
 ⵍⵍⵉⵖ ⵏⵏ ⴳⴰⵏⵜ ⵜⵉⵔⵎⵜ ⴰⴷ ⵜⵏⵡⵡⴰ, ⴼⵍⵏ ⵜⵜ ⵖ ⵓⴷⵖⴰⵔ ⵏⵏⵙ ⵉⴳⴳⵉ ⵏ ⵜⴰⴽⴰⵜ ⴼⵜⵓⵏ ⵜ ⴳⴳⵯⵣⵏ ⵜ ⵙ ⵡⴰⵙⵉⴼ ⴷ ⵜⵎⵖⴰⵔⵜ ⵜⴰⵡⵙⵙⴰⵔⵜ ⵜⵣⵡⴰⵔ ⴰⵙⵏ ⵜ ⵜⵓⵙⵉ ⴷⵉⵙ ⴰⵖⵏⵊⴰ ⴰⵎⵇⵔⴰⵏ. ⵍⵍⵉⵖ ⵍⴽⵎⵏ ⵜ ⵜⴰⵎⴰ ⵏ ⵡⴰⵙⵉⴼ ⴱⴷⴷⵏ ⵜ, ⵙⵙⴼⴰⵍⵏ ⵜ ⵖ ⵜⵉⵡⴰⵜⵔⵉⵡⵉⵏ ⴷ ⵉⵙⵙⵓⵜⵓⵔⵏ ⵏ ⵓⴼⵓⵍⴽⵉ ⵣⵖ ⵕⴱⴱⵉ, ⵜⴱⴷⴷ ⵜⵡⵙⵙⴰⵔⵜ ⵉⴽⵯⵏⴰⵏ ⴰⵔ ⴰⴽⴰⵍ ⵜⵙⵡⴰⵍⴰ ⵏⵏ ⵜⵉⵎⵥⴰⴹⵉⵏ ⵏⵏⵙ ⵙ ⵉⵡⴰⵍⴰ ⴰⵙⵉⴼ ⵜⵙⵙⴰⴽⵯⵉ ⵏⵏ ⴰⵖⵏⵊⴰ ⵖ ⵡⴰⵎⴰⵏ ⵙ ⵜⵖⵯⵔⴷⵉⵏ ⵏⵏⵙ ⵖ ⵢⴰⵏ ⵓⵎⴷⴰ ⵖ ⴱⴷⴷⵏ ⵡⴰⵎⴰⵏ ⴰⵔ ⵣⵖ ⴳⵉⵙ ⵜⵜ ⴼⴼⵓⵖⵏ ⵙ ⵜⴱⵉⵥⵥⵉⵔⵜ, ⵉⴹⵕ ⵓⵖⵏⵊⴰ ⵖ ⵉⴳⴳⵉ ⵏ ⵓⵎⴷⴰ ⴰⵙⵉⵏ ⵜ ⵡⴰⵎⴰⵏ ⵢⴰⴳⵯⵎ ⴰⵎⴰⵏ, ⵜⵓⵔⴰⵔⵜ ⴰⴷ ⵜⴼⴽⴰ ⵓⴷⵎ ⵏ ⵓⴼⵓⵍⴽⵉ ⴷ ⵎⴰⵙ ⵉⴳⴰ ⵓⵙⴳⴳⵯⴰⵙ ⵡⴰⴷ ⵉⵖⵓⴷⴰⵏ, ⴷ ⵜⴰⵢⵔⵣⴰ ⴷ ⵓⵊⵊⵉⴳ ⵏ ⵍⵍⵓⵣ ⵔⴰⴷ ⴱⵓⵖⵍⵓⵏ. ⵎⵔⴰ ⴷⴷ ⵉⵙ ⵓⵔ ⵢⵓⴳⵎ ⵓⵖⵏⵊⴰ ⴰⵎⴰⵏ, ⵔⴰ ⵉⴳ ⵎⴰⵢⴰⵏ ⵜⴰⵎⴰⵜⴰⵔⵜ ⵓⵔ ⵉⴼⵓⵍⴽⵉⵏ ⵉⵎⵎⴰⵍⵏ ⵎⴰⵙ ⵔⴰ ⵉⵀⵔⵛ ⵓⵙⴳⴳⵯⴰⵙ. 
  ⵖⴰⵎⴰⵏ ⵜ ⵜⴼⵔⵅⵉⵏ ⴰⵔ ⵜⵜ ⵓⵔⴰⵔⵏ ⵜ ⵙ ⵓⵖⵏⵊⴰ ⵖ ⵡⴰⵎⴰⵏ ⵏ ⵓⵎⴷⴰ ⵡⴰⵙⵉⴼ, ⵉⵡⵔⵔⵉⵏ ⵜ ⵜⵎⵖⴰⵔⵉⵏ ⵙ ⵓⴳⵯⵔⵔⴰⵎ ⵖ ⴹⴰⵕⴰⵜ ⵎⴰⴷ ⵜⵏⵜ ⵉⵙⵙⵓⵙⵎ ⵎⴰⵢⴰⵏ ⴼⴽⵏ ⵜ ⵜⵉⵡⴰⵜⵔⵉⵡⵉⵏ ⵏⵏⵙⵏ ⵜ ⴷ ⵓⵙⵙⵓⵜⵔ ⵏⵏⵙⵏ ⵜ ⵉ ⵉⵎⴰⵍ. ⴳⴳⵉⵡⵔⵏ ⵜ ⴰⵔ ⵛⵜⵜⴰⵏ ⵜ ⵜⴰⴳⵯⵍⵍⴰ, ⵍⵍⵉⵖ ⵢⴰⴷ ⵥⵍⵉⵏ ⵜ ⵜⴰⵖⴰⵎⵉⵏ ⵏ ⵜⵎⵖⴰⵔⵉⵏ ⵍⵍⵉ ⵓⵔ ⵢⵓⴼⵉⵏ ⴰⴷ ⴷⵉⵙⵏ ⵜ ⵉⵍⵉⵏ ⵜ , ⴷ ⵜⵉⵡⵙⵙⴰⵔⵉⵏ ⵍⵍⵉ ⵢⵓⴹⵏⵏ ⵖ ⵜⴳⵯⵎⵎⴰ ⵏⵏⵙⵏ ⵜ, ⴷ ⵜⵉⵢⵢⴰⴹ ⵍⵍⵉ ⵉⵔⴰⵏ ⴰⴷ ⴰⵡⵉⵏ ⵜ ⵉ ⵉⵔⴳⴰⵣⵏ ⵏⵏⵙⵏ ⵜ ⴽⵔⴰ ⵣⵖ ⵜⴳⵯⵍⵍⴰ ⵏ ⵜⴰⵖⵏⵊⴰ.
 ⵎⴰⵢⴰⴷ ⴰ ⵉⴳⴰⵏ ⵜⴰⵎⴰⵏⴷⴰⵏⵜ ⵏ ⵜⵎⵢⵓⵔⵜ ⵏ ⵜⴰⵖⵏⵊⴰ ⵏ ⵓⵏⵥⴰⵕ ⵍⵍⵉⵖ ⵜⵎⵎⵔⴽⴽⵙ ⵜⴰⵢⵔⵉ ⵏ ⵡⴰⴽⴰⵍ ⴷ ⵓⴼⴳⴰⵏ.”
        ⵜⵓⵍⵍⵉⵙⵜ ⵏ ⵓⴷⵍⵉⵙ ⴰⵙⴽⵍⴰⵏ ⵏ ⵜⵓⵍⵍⵉⵙⵉⵏ ⵜⵉⵎⴰⵣⵉⵖⵉⵏ, ⵏ ⵓⵎⴰⵔⴰ ⵍⵎⵙⵄⵓⴷⵉ ⵎⵓⵃⵎⵎⴰⴷ, ⵉⵍⴰⵏ ⴰⵣⵡⵍ ⵏ : ⵉⵅⴼ ⵏ ⵓⵏⴳⵉ, ⴷ ⵉⵙⵙⵓⴼⵖ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵖ 2021, ⵜⴰⵏⴼⵓⵍⵜ/page 63.
 ⵥⵕ ⴰⴷⵍⵉⵙ ⵏ ⵜⵓⵍⵍⵉⵙⵉⵏ : https://amadalamazigh.press.ma/%D9%8A%D8%AE%D9%81-%D9%86-%D9%88%D9%86%D9%83%D9%8E%D9%8A-%D9%85%D9%86%D8%A8%D8%B9-%D8%A7%D9%84%D8%B3%D9%8A%D9%84-%D8%A5%D8%B5%D8%AF%D8%A7%D8%B1-%D9%82%D8%B5%D8%B5%D9%8A-%D8%A3%D9%85%D8%A7%D8%B2/

https://www.e-slu.ma/livres/ixf-n-ungi/ https://ar.wikipedia.org/wiki/%D9%85%D8%B3%D8%AA%D8%AE%D8%AF%D9%85:EL-MASOUDYMOHAMED