Faḍma Farras
Faḍma Faṛas, tga illis n Ayt Ammr ɣ tmazirt n Iḥaḥan, tẓṛa tifawt ass n 04 uktubṛ ɣ usggʷas n 1991, tɣra gis tamẓ tugga n lbakalurya ɣ usggʷas n 2010, ilmma tɣr ɣ tsdwit n ibn zuhr tamẓ gis tugga nns ɣ tutlayt n taɛrabt ɣ usggʷas n 2013, ilmma tamẓ daɣ acbar n tɣri tsnti tiɣri nns usaka n tɣuriwin tamaziɣt tamẓ gis tugga ɣ usggʷas n 2016, ur tbd Faḍma Farras tsnti ilmma tiɣri nns tiklit yaḍn ɣ umastr tamz gis tugga nns ɣ usggʷas n 2019.
Tg ɣ usggʷas n 2020 tamzrawt tamrzut g usaka n dduktura g tɣiwant n tskla d tmassanin tinafganin; tasdawit n ibn zuhr g ugadir. Tg awd tamarat s tmaziɣt. Yat g inbdadn n tzlɣa n imaratn s tmaziɣt tirra. Tiwi tasmɣurt n Lmɣrib n udlis g usggʷas n 2018؛ anaw n wallas ittyaran s tmaziɣt. Mk lli tiwi tasmɣurt n tussna tamaziɣt lli isnmala usinag agldan n tussna tamaziɣt g 2016؛ anaw n tmdyazt. Tiwi awd tasmɣurt n tzlɣa n tirra g usggʷas n 2015 g wanaw n wungal.
Yan usmaql ɣ udlis nns[ssnfl | Snfl asagm]
Faḍma Farras tga yat tɛrrimt istin ad ttara s tutlayt tamaziɣt gr tutlayin ann yaḍn afad ad tsslkm isyafatn d tufrayin nns i ugdud amaziɣ, mayann af tssnti abrid nns s ungal ad Ddaw ucḍaḍ n tcaga nnm (2015), ilmma tṣṣḍfr as d idlis n yaḍn g yigr n tullist zun d Tikrkas d uggar (2016) d Izwuln n tffuɣla ɣ usggʷas n 2018, g igr n tmdyazt tura Uddimn n marur (2016). Faḍma Farras g tgira n isggʷasn ad tskr yat tgrawla f ungaln lli g tura Askʷti n tlkawt (2017) d ungal yaḍn Igʷntrn d ifaɣrn (2018), g tgira n issgʷasn lli izrin 2020 ilul d dar s yan ungal yaḍn tga as s wassaɣ Ibiw n tarir d wayyaḍ yaḍn tga as s wasaɣ Tiffilla n tmagust, tizi nna nḍfṛ tirra n massa ar tt inn n nttafa mas d ar ttara g tugtt n isntal macc Faḍma Farras tsti ad bahra ttara f twtmt d tmukrisin lli g ar tnggḍ.
Azwl iga yat tisit lli d immaln mad iḥḍan g tirra n uḍṛiṣ ig yan itri immaln uɣaras lli yumẓ umara g tirra nns, ig d nusi taguri n ucḍaḍ rad aɣ tmmal mas d iga t "akʷba, igiwal" ɣilli g ar nsrus azzan tizi nna nra ad as nfk tibbit ad issumm akʷfay, tacaga tga tt "tirgitt, takat" lli ingḍn tzdɣ g wul n kra n yan, "ddaw n ucḍaḍ n tcaga nnm" iga yan uzwl lli imalan mas d ungal ad rad isawl f twtmt d tirgin d uẓbbaṛ lli ttasi sg tlalit ar kiɣ tt tiwi tmttant, igiwal ann lli g ar d ttssumum tagat d takat.
Tiwlafin lli tggan imsnfluln g udlis nnsn, ar tasin tugtt n inumak lli izdin d udlis lli turan g ugʷns n udlis nns , ɣik ann d massa Faḍma Farras lli istin ad tg g ungal nns yan udrar d yat taddagt illan aklu asggan g mnid nns n yat twtmt d yan uwtm izdin tinfurin nns , nufaṛ ad nini mas d tawlaft ad ar takka yan unamk mas d tayri ɣ uzmz ad ar tt ssntaln ur tfaw mk lli nufaṛ ad akkʷ nini mas d tgʷdl .
Tsti tmarat g ungal ad ad ttara f twtmt lli g nn tẓli ad tg "natir" taṣḍ t n ungal ad nnsafad ad tsslkm tabrat lli f tura aḍṛiṣ nns lli g ar tssutur g tmɣart ad tskr tagrawla f tmyurin d iswingimn lli igan abluẓ f twtmt d tnna mas d iqqan tt d ad tall ixf nns d uswir nns gr iwtman, d tg "natir ills isawaln g udɣar n tmɣarin lli g nn tunni mas d ultmas "tifyur" twssr bahra d tnɣuba gis tɛrma d ufulki dffir mad tiwl, tsawl awd f urgaz n ultmas " lmusṭafa" lli ur iran tifrxin mayann af d iṣḍfṛ tarwa yan tama n wayyaḍ, ur d isntal ad ka af tsawl tmarat tsawl awd f iɛrrimn lli istin ad muddun s urubba s tɣarast turzaft, awd tsti ad yili g ungal nns yat tullist n tayri gr "natir" d "sifaw" lli mi ur irwas uswingm iwtman yaḍn, lli g ifka addur i twtmt ifk as yan watig bahra imqqurn, macc imkkusn n wakuc mk lli sstin assaɣ ad i ixf nnsn tlla darsn tinnayin yaḍn lli g nn unnin mas d tamɣart tga aɛuṛiḍ d yan ucmuti g tudrt ad, mayann af ar gis zznzan ar gis ssaɣn, tamarat Farras tskr yat tgrawla g ungal ad lli g tmmaɣ ad ṭṛẓ iskraf n twtmt tfrn iswingimn lli tssifif allig d tlldi aẓmay n twngmin.
Tamarat tsbuɣla ungal ad nns s tugtt n twlafin lli tsti, tizi lli d naqqra ar n gis nttafa tamimt da k ittajjan ad tmmaɣt ad tsmdt tiɣri nns g ma nn ur yagugn, tzuzzr ɣinn tiguriwin ar tnt gis tkkrz af ad ad tnt immgr imɣri isyafa sisnt.
Mk lli nnsn mas d massa Faḍma Farras tga taglidt n tguriwin, tugm d ils n tmaziɣt n tmazirt nns Iḥaḥan tssngḍ iḍṛiṣn nns g inummak d tguriwin yusin mad iẓḍan n tutlayt tamaziɣt, is d akkʷ tusi kra ɣ iwaliwn lli nttini g tutlayt tamiwant zun d "ffaɣn iḍaṛn nns acwari" d tiyyaḍ .
Tsti tmarat Farras ad tili tullist n ungal ad g kṛaḍ idɣarn, amzwaru gis n timzgid lli g ar tmṣawaḍn imkkusn n wakuc g iggi n wakal, iḍfur t id "asalay" d "tafacga" idɣarn ad af ar bahra tzzigiz tullist n ungal ad macc llan wiyyaḍ zun d "tawrir" lli bahra tḥml "natir" acku iga yan udɣar lli g ar nn ttmigir imiri nns "sifaw" d awd ila udɣar n " tḥanut" illi ɣ ar ttmiggirn ibrgagn n tmazirt, ar gis tiggutn iwnnan f ufgan.
Tẓḍaṛṛ Faḍma Farras ad tsslkm tibratin lli tra s yat tɣarast ifulkin lli ittawin imɣri gr isaffn n tguriwin, tfsr aḍṛis nns s yat tɣarast tamaynut lli iẓḍaṛn ad tskr yat tgrawala ɣ unnli n walli tt yaqqran, ilmma tsti isntal lli nn tunni gan "ṭṭabu" tmmaɣ ad tn tfrn yan s wayyaḍ allig d gis n tldi timukrisin lli g ingḍ umun nnɣ, Faḍma Farras tẓḍaṛ bdda ad tfk i twuri nna tsti d ana tskr yan watig mqqurn s tɣarasin lli d issan g idlisn n umaḍal akkʷ, nẓḍaṛ kran wass ad nẓṛ tamarat Faḍma Farras g uswir ann amaḍlan, macc nniɣ rad bahra tfulki tirra nns tbuɣlu uggar tizi na tbḍa d tmukrisin n tmɣarin g ungaln ann yaḍn lli d yucka n g ma nn ur yaggugn acku tizi na n tettarra g yan usntl is ar didnɣ yaṭṭa imɣri acku nttan ar t bda ittaɣ irifi n tɣri n ma d igan amaynu d ma d nn ur itam g umara.
isawl mass "baha mansub" f massa Faḍma Farras yini fllas:
Smmus n wunglan n tnggalt tamaziɣt Massa Faḍma Farras. Tidyanin n wungaln-nns maṛṛa ttuskant ɣf tmɣarin d imdann d tmariwic nnsnt... Tttgg tmyarut azɣan inmn i tmtti G tttidir S tutlayt tasklant immimn. G tirra nns kigan n tbɣest d "l'audace". Da trddm igʷddimn n sissumga d tlkkawt lli ittidir ufgan amaziɣ... Ungaln nns uklaln ad ttuɣrn, ttugnt ɣifn tzrawin, ittulmd sgsn mamk tttyiri tsrit ittawin tutlayt tamaziɣt ɣr aflla...
Tiẓṛigin[ssnfl | Snfl asagm]
- 2021: ibiw n tarir (ungal)
- 2020 : tiffilla n tmagust (ungal)
- 2018 : igʷntrn d ifaɣrn (ungal) d izwuln n tffuɣla (tawckint n tullisin)
- 2017 : askʷti n tlkkawt (ungal)
- 2016 : uddimn n marur (tawckint n tmdyazt) d tikrkas d uggʷar (tullisin)
- 2015 : ddaw ucḍaḍ n tcaga nnm (ungal)
Isaɣuln[ssnfl | Snfl asagm]
- كتاب جماليات وقضايا في السرد الأمازيغي القصة والرواية، مؤلف جماعي، 2022، منشورات رابطة تبرأ للكتاب الأمازيغي.
- Adlis " tirra n wungal, imsawaln d Ayt ungal s tmaziɣt" 2022, tiẓṛigin n tirra.
- - دراسات في الأدب الأمازيغي الحديث. منشورات رابطة تيرا، 2013.
- قراءات في الرواية الأمازيغية.منشورات رابطة تيرا، 2014.