ⵉⵎⵕⴰⴱⴹⵏ

ⵉⵎⵕⴰⴱⴹⵏ ⵏⵉⵖ ⵜⴰⵡⵙⵉⵜ ⵏ ⵉⵎⵕⴰⴱⴹⵏ (ⵙ ⵜⵄⵕⴰⴱⵜ: **المرابطون**, ⵙ ⵜⵍⴰⵜⵉⵏⵜ: **ⴰⵍ-ⵎⵓⵔāⴱⵉⵟūⵏ**) ⵢⴰⵏ ⵏⵏⵙⵏ ⵉⴳⴰ ⵜⵜ "ⴰⵎⵕⵉⴱⴹ", ⴳⴰⵏ ⵢⴰⵜ ⵜⵎⵏⵓⴽⴷⴰ ⵜⴰⵎⴰⵣⵉⵖⵜ ⵉⵍⴰⵏ ⴰⴷⴰⵙⵉⵍ ⵏⵏⵙ ⵖ ⵜⵓⵥⵥⵓⵎⵜ ⵏ ⵜⴳⵍⴷⴰ ⵏ ⵍⵎⵖⵔⵉⴱ ⵏ ⵡⴰⵙⵙ ⴰⴷ. ⵜⵙⵙⵏⴽⵔ ⵢⴰⵜ ⵜⵎⵏⵓⴽⴰⵍⵜ ⵖ ⵜⴰⵙⵓⵜ ⵜⵉⵙⵙ-11 ⵉⵖⵔⵔⴷⵏ ⴰⵎⵎⴰⵙ ⵏ ⵓⵜⴰⵔⴰⵎ ⵏ ⵜⴼⵔⵉⵇⵜ ⵏ ⵓⴳⴰⴼⴰ ⴷ ⵡⴰⵏⴷⵍⵓⵙ, ⵜⵙⵙⵏⵜⵓ ⵖ ⵢⵉⵙⴳⴳⵯⴰⵙⵏ ⵏ ⵉⴷ 1050 ⵜⵖⴰⵎⴰ ⴰⵢⵍⵍⵉⵖ ⵜⴹⵕ ⴷⴰⵔ ⵢⵉⵎⵓⵡⵃⵃⵉⴷⵏ ⵖ 1147. ⵜⵎⵖⵉ ⴷ ⵜⵡⵙⵉⵜ ⵙⵖ ⵓⵎⵇⵇⵓⵏ ⵏ ⵍⵎⵜⵓⵏⴰ, ⵉⴳⵓⴷⴰⵍⵏ ⴷ ⵎⵙⵙⵓⴼⴰ, ⴽⵔⴰ ⵏ ⵜⵇⴱⵉⵍⵉⵏ ⵏ ⵉⵎⴳⴳⵓⴷⵊⴰ ⵉⵎⴰⵣⵉⵖⵏ ⴷⴰ ⵜⵜⵎⵓⵙⵙⵓⵏⵉⵏ ⵜⵉⵣⵉ ⵏⵏⴰ ⵖ ⵖⴰⵢⵍⵍⵉ ⵉⵜⵜⴳⴳⴰⵏ ⵜⴰⵎⵓⵔⵜ ⵏ ⵎⵓⵕⵉⵟⴰⵏ ⵏ ⵡⴰⵙⵙ ⴰⴷ ⴷ ⵜⵉⵏⵉⵔⵉ ⵜⵓⵜⵔⵉⵎⵜ ⵏ ⵜⴳⵍⴷⵉⵜ ⵜⴰⵎⵖⵉⵔⵉⴱⵉⵜ, ⴰⵔ ⵜⵜⵎⵓⵙⵙⵓⵏ ⵖ ⵜⵎⵏⴰⴹⵜ ⵏ ⴳⵔ ⴹⵕⴰ, ⵏⵉⵊⵔ, ⴰⵔ ⴰⵙⵉⴼ ⵏ ⵙⴰⵏⵉⴳⴰⵍ. ⵖ ⵓⵣⵎⵣ ⵏ ⵓⵏⵖⴰⵍ ⵏⵏⵙⵏ ⵖⵔ ⵜⴼⵔⵉⵇⵜ ⵏ ⵓⴳⴰⴼⴰ, ⵙⵔⵙⵏ ⵢⵉⵎⵕⴰⴱⴹⵏ ⵜⵉⵔⵙⴰⵍ ⵏ ⵜⵎⴷⵉⵏⵜ ⵏ ⵎⵕⵕⴰⴽⵛ ⴳⵉⵏ ⵜⵜ ⴷ ⵜⴰⵎⴰⵥⵓⵏⵜ ⵏ ⵜⴳⵍⴷⵉⵜ ⵏⵏⵙⵏ, ⵖ ⵡⴰⵜⵜⴰⵢⵏ ⵏ 1070.

ⵣⵣⵔⵉⵏ ⵢⵉⵎⵕⴰⴱⴹⵏ ⵢⴰⵜ ⵜⵉⵍⴰⵍⵜ ⵉⵍⴰⵏ ⵢⴰⵏ ⵓⴷⴷⵓⵔ ⴰⵅⴰⵜⴰⵔ ⵖ ⵓⵎⵣⴰⵖ ⵎⴳⴰⵍ ⵏ ⵜⴹⵓⵕⵉ ⵏ ⵡⴰⵏⴷⴰⵍⵓⵙ (ⵜⵉⵏⵏⵓⴱⴹⴰ ⵜⴰⵎⵓⵙⵍⵎⵜ ⵖ ⵢⵉⴱⵉⵔⵢⴰ) ⵖ ⵢⵉⴼⴰⵙⵙⵏ ⵏ ⵜⴳⵍⴷⴰⵢ ⵜⵉⵎⴰⵙⵉⵃⵉⵢⵉⵏ ⵏ ⵢⵉⴱⵉⵔⵢⴰ, ⵍⵍⵉⵖ ⵏⵏⵔⴰⵏ ⵢⴰⵏ ⵓⵎⵓⵍⵍⵉ ⵏ ⵜⵙⵔⴷⴰⵙⵉⵏ ⴷ ⵉⴽⴽⴰⵏ ⴰⵢⵜ ⴽⴰⵙⵜⵉⵍⵢⴰ ⴷ ⵡⴰⵔⴰⴳⵓⵏ ⴰⵎⵎⴰⵙ ⵏ ⵢⵉⵎⵏⵖⵉ ⵉⵜⵜⵓⵙⵙⴰⵏⵏ ⵙ ⵣⵣⴰⵍⴰⵇⴰ ⵖ 1086. ⵢⵓⵊⵊⴰ ⵜⵏ ⵓⵢⴰⴷ ⴰⴷ ⴼⵙⵔⵏ ⵜⴰⵏⴱⴰⴹⵜ ⵏⵏⵙⵏ ⵖⴼ ⵢⴰⵜ ⵜⵢⵎⴱⵕⴰⵟⵓⵔⵉⵜ ⵢⵓⵜⵏ ⵙ 3,000 ⵉⴽⵉⵍⵓⵎⵉⵜⵔⵏ ⵙⵖ ⵢⵉⴼⴼⵓⵙ ⵏⵏⵙ ⴰⵔ ⴰⴳⴰⴼⴰ ⵏⵏⵙ. ⵉⵏⴱⴱⴰⴹⵏ ⵏⵏⵙ, ⵓⵔ ⵊⵊⵓ ⴳⵉⵏ ⴰⵙⵙⴰⵖ ⵏ ⵅⴰⵍⵉⴼ ⴷ ⵡⵉⵏⵏⵙⵏ, ⵟⵟⴼⵏ ⵖ ⵓⴷⵖⴰⵔ ⵏⵏⵙ ⵖ ⵡⴰⵙⵙⴰⵖ ⵏ "ⴰⴳⵍⴷⵓⵏ ⵏ ⵢⵉⵎⵓⵙⵍⵎⵏ" ("*ⴰⵎⵉⵔ ⴰⵍ-ⵎⵓⵙⵍⵉⵎīⵏ"),* ⴰⵔ ⵜⵜⴳⴳⴰⵏ ⵖ ⵓⵙⴳⴰ ⵢⴰⴹⵏ ⵉⵄⴱⴱⴰⵙⵉⵢⵏ ⴰⵎⵎⴰⵙ ⵏ ⴱⴰⵖⴷⴰⴷ ⴷ ⵉⴱⵔⴳⵍⵍⵉⴷⵏ ⴷ ⵢⵉⵅⴰⵍⵉⴼⵏ ⵏ ⵜⵎⵜⵜⵉ ⵏ ⵢⵉⵎⵓⵙⵍⵎⵏ ⵙ ⵡⵓⴷⵎ ⴰⵎⴰⴷⴷⵓⴷ. ⵡⴰⵅⵅⴰ ⵎⴽⴰⵏⵏ, ⵉⴽⴽⴰ ⵜⵜ ⵉⵏⵏ ⵡⴰⴽⵓⴷ ⵏ ⵜⵏⴱⴰⴹⵜ ⵏ ⵜⵡⵙⵉⵜ ⵏⵏⵙⵏ ⵉⴳⵣⵣⵓⵍ. ⴹⵕⵏ ⵢⵉⵎⵕⴰⴱⴹⵏⵉⵍⵉⵏ ⵏⵉⵜ ⵖ ⵜⴰⵜⵜⵓⵢⵜ ⵏ ⵓⴷⵡⴰⵙ ⵏⵏⵙⵏ ⵖ ⵓⵣⵎⵣ ⴰⵏⵏ ⵍⵍⵉⵖ ⵓⵔ ⵎⵓⵔⵉⵙⵏ ⴰⴷ ⵙⵉⴷⴷⵏ ⵜⴰⵖⵡⵡⴰⵖⵜ ⵏ ⵢⵉⵎⵚⵎⵓⴹⵏ ⵙ ⵜⵏⵙⵙⵉⵅⴼⵜ ⵏ ⵉⴱⵏ ⵜⵓⵎⵔⵜ. ⵖⵎⴽⴰⴷ, ⵉⴽⴽⴰ ⵜⵜ ⵉⵏⵏ ⵓⴳⵍⵍⵉⴷ ⵏⵏⵙⵏ ⴰⵏⴳⴳⴰⵔⵓ ⵉⵙⵃⴰⵇ ⵉⴱⵏ ⵄⵍⵉ ⵉⵜⵜⵓⵏⵖⴰ ⵖ ⵎⵕⵕⴰⴽⵛ ⵖ ⵢⵉⴱⵔⵉⵍ ⵏ ⵓⵙⴳⴳⵯⴰⵙ ⵏ 1147 ⴷⴰⵔ ⵉⵎⵓⵡⵃⵃⵉⴷⵏ, ⵏⵏⴰ ⵉⵡⵉⵏ ⴰⴷⵖⴰⵔ ⵏⵏⵙⵏ ⴰⵎⵎ ⵢⴰⵜ ⵜⵡⵙⵉⵜ ⵉⴳⴰⵏ ⵜⴰⵏⴱⴱⴰⴹⵜ ⵖⴼ ⵍⵎⵖⵔⵉⴱ ⴰⵎⵇⵇⵔⴰⵏ ⴷ ⵡⴰⵏⴷⴰⵍⵓⵙ.