Amyawaḍ war tikṛḍi
Amyawaḍ war tikṛḍi (ar as ttinin ula amṣawaḍ n umyawas nɣ amṣawaḍ n ufra) iga yat tɣarast n umyawaḍ lli isrs Maṛcal Ruznbrg g tizwiri tis sḍiṣ n tasut n simrawt[1]. Tbdd tɣarast ad f kṛaḍt tsgiwin n umyawaḍ : tayri tayimant (lli ittawssann mas tga yan ufrak anfcad iɣzzn g turimt n ugnsu taẓilalt), d tayri tanfcadt ( lli ittawssann mas tga yan ufrak s wul lli iẓṛṛan afalki g wiyyaḍ). d umssini ayiman iɣʷẓann (lli ittawssann mas iga yan umssini ayiman lli bahra g tlla tidt d ussɣẓn s yat tɣarast isdrawn tayri d uncfad d wiyyaḍ).
Llant tirsal n umyawaḍ war tikṛḍi f yat twngimt n mas ẓḍaṛn middn akkʷ ad zgisn tffaɣ tayri d tmlla ngaran zɣ tikṛḍi d aylli rad ig amalad i wiyyaḍ, iɣ ur ssnn tastṛatijit ɣ tlla tyafut lli s rad myawaḍn gratsn. Afgan ar ittlmad timyurin n uswingm d ufrak d tɣarasin n umyawaḍ lli ittawin s tikṛḍi (win tadawt d win iman) d ttṛaḍ d imaɣn zɣ dar tussna n kul amun).
Tiẓiṛt n umyawaḍ war tikṛḍi ar ttannay timskarin akkʷ n ufgan ar ttɣawalnt ad afnt tinyafin n inmrann infgann. Macc inmrann ad ur llin g umnzaɣ. Amnzaɣ ar ittili iɣ mnaggarnt tistṛatijin n wid iran ad lkmn inmrann.
Tmla tɣarast n tiẓiṛt n umyawaḍ war tikṛḍi mas d middn iɣ swuttan inmrann nnsn d inmrann n wiyyaḍ, frkn i isyafatn lli issutln i inmrann ad, tizi ann rad msasan middn grasn bla illa ttṛaḍ grasn.
Irimn[ssnfl | Snfl asagm]
Itturm umyawaḍ war tikṛḍi g tmrsal d tmssurin, ɣ usgmi d uslmd, d tngrin, d usujji ayiman, d uḥttu n tdusi, d ifssayn n imukrisn n utci, d ibniqn, ig tirsal n idlisn uslmd n wazzan, d kigan n tsgiwin n tudrt n ufgan. Inna Ruznbrg mas yurm amyawaḍ war tikṛḍi g iɣawasn n ufra g kigan n tmizar ɣ illa imnɣi, zun d Ṛwanda, Buṛundi, Nijirya, Maliẓya, Andunisya, Sirilanka, Kulumbya, Ṣiṛbya, Kṛwatya, Iṛlanda d iming n waɛṛabn zgisn Filaṣtin[2].