Asinag agldan n tussna tamaziɣt d yat tmrslt g igr n tẓṛigt g lmɣrib

inna unmhal n wammas n tzrawin tiẓuṛanin d win tskla d ufars n uslli ẓṛ, mass ḥmad lmunadi g wass n usinas g usinag agldan n tussna tamaziɣt, mas iga usinag ddx yat tmrslt ibuɣlan g igr n tẓṛigt d udlis g tmazirt nnɣ .

issɣẓn mass lmunadi, g twisi nns g tinawt nnag ttusgmaḍn sin idlisn imaynutn, g usati n tssutlt tiss 27 n usfsr agraɣlan n tẓṛigt d udlis, yini masd asinag agldan n tussna tamaziɣt dars yan waddur ibuɣlan g igr n tẓṛigt n idlisn nna d dar tazdayt s tuẓlayt nns, aynna igan tussna d tutlayt d tdlsa tamaziɣt .

inna daɣ masd tuẓlayin n usinag agldan n tussna tamaziɣt tstawhmma s igran ar skarn kigan n tnafutin i usbuɣlu n tussna d tdlsa tamaziɣt g igran n tutlayt nɣd tanṭṛubulujit nɣd tasusyulujit d awd igran n tskla d tẓuṛi d usuɣl d usgmu d usmuttg awd nttan .

izayd mass lmunadi mas llan kigan n idlisn nna d iffaɣn nna igan yan uɣbalu n imrzutn d islmadn d imzrawn nna istawhmman gin uẓlayn g tdlsa tamaziɣt d winna akk° iran ad issann kigan xf igran n tussna d tdlsa timaziɣin .

g aynna izdin d snat tẓṛigin timggura n usinag, g igr n tskla iffa ɣd udlis xf tullist tamaziɣt tatrart , g ugṭṭum nns amzwaru, nna igan kigan n imagradn nna skrn kigan n imẓlayn g igr n tullist tamaziɣt, rad d iffaɣ ugṭṭum nns wiss sin g mad d yaẓḍn .

g mad iẓlin s tẓṛigt tiss snat, inna mass lmunadi mas tẓli s yat tzrawt n ufran d tskla nna izdin d tullist n ḥmmu namir,nna igan yat tullist sg ukus n taysi tamaziɣt .

g tsga nns, inna umrzu g tdlsa tamaziɣt mass ḥmad ɛaṣiḍ masd ammasn n usinag nna ganin sa ard ssfaɣn kun asggʷas kigan n idlisn d tzrawin nna izdin d tussna d tdlsa d tsnilst tamaziɣt, ẓlin s mad ittggan 400 n tẓrigt g igr ad .