Aslag n Imḥḍaṛn n tsnijjit d tsasfrt 2023

Aslag iṛẓmn n imḥḍaṛn n tsnijjit d tsasfrt n 2023 ɣ uwank n Lmɣrib iga yan wanaw n imussutn iɣnsann da ssnkrn imḥḍaṛn n snat talatin ad n tsnijjit d tsasfrt, ig yan ngr islagn lli akkʷ ɣzzifnin ɣ umzruy atrar ɣ umaḍal.

Issnti uslag ad ɣ wass n 16 Dujambir 2023 d nttni ad t iglin d tsqqimt tanamurt n Imḥḍaṛn n tsnijjit d tsasfrt d tsnijjit n wuxsan, yucka d uslag ad ɣ yat tmrarut i uɣtas n luzir n ulmmud yattuyn d usiggl amassan Ɛbdllṭif Lmiṛawi afad ad issidrus ɣ wuṭṭun n isggʷasn n tɣri sɣ sa isggʷasn ar ṣḍiṣ, ig tiɣʷrdin n dɣ ayad sɣ mad inna Luzir n tdusi d irni ɣ wuṭṭun n imffɣn n iḍbibn ɣ kra iga tt asggʷas afad ad msln tawssart illan ɣ tsga ad n iḍbibn, yili akkʷ ma ittinin is t skrn bac ad gis skrn yan iẓiki i uzwag n iḍbibn s tmizar n bṛṛa.

Issugga yad uslag ad yan mnnaw imussutn d issɣlitn, istfal nit s yat tskant inmalan tama n ubṛlaman ass n Ukwas 7 Dujambir 2023 ɣ tɣrmt n Ṛṛbaṭ trmn as d imḥḍaṛn sɣ tɣiwanin akkʷ n uwank, iggʷra d ilmma s yan waray (abbay) amakan iṛẓmn i tɣudiwin timiẓiṛn d isunan imsgnafn, fkan fllas imḥḍaṛn yan usdaw asutran smunn gis tutriwin nnsn akkʷ.

Tiɣʷrdin n uslag

Asgzl n tasult n ulmmud

Isawl d luzir Ɛbdllṭif Lmirawi s tnfust n Hisbris ɣ wass n 18 Bṛayṛ 2022 inna is d tanila n uwank ad isɣi addal adusan i Imɣrabiyn akkʷ ad igan maxx aylliɣ d iqqan ad ssgzln tasult n tɣri ɣ tɣiwanin n tsnijjit ɣ Lmɣrib.

Izmmim daɣ Lmirawi is issnkd inbdadn n tɣiwanin ad bac ad zzugzn aɣtas ad nns s usqqul n wuṭṭun yudan n islmadn d ibarazn lli d swalnin (ujadnin) i usnfl ad. Issisfiw d sul mas d bac ad yili yan waddal adusan i imɣrabiyn akkʷ d ulkkum n uwttas ad nns isɣawsa nit yan wuṭṭun imqquṛn n Iḍbibn d Ifrmliyn.

Tamrarut n Imḥḍaṛn

Mnadn ukan imḥḍarn aɣtas ad win yan usanuḍ zun d yan ussurf ifawn i turmit 11 n ugamma n umcacka ngr tsqqimt n imḥḍaṛn n tsnijjit d tsasfrt d tsnijjit n wuxsan d luzirt n tdusi d tin ulmmud yattuyn ɣ usggʷas 2015 d dɣ walli ittinin:

11. Ad yili ussdru n tsqqimt tanamurt n Imḥḍaṛn ɣ usnm nna izdin d talatin n tsnijjit d tsasfrt d tsnijjit n wuxsan.

Tiẓṛi n tsqqimt tanamurt n imḥḍaṛn n tsnijjit d tsasfrt d tsnijjit n wuxsan (ittgzln s "Lknim")

Mqqar iga usatti n tsqqimt ɣ uzzugz n wan aɣtas ad kra isnukman imḥḍaṛn maccan ur as fkin yat tmrarut d ulggud (d lḥin) usin anaruz ad d yack yan uḍṛiṣ icwan, iẓḍaṛ ad issmurwu (issṛḍu) afnatn akkʷ.

Timqqit da iffin aga d lliɣ bahra tmaṭl luzirt ad tsrs yan uḍṛiṣ isnmalan imir wis kṛaḍ ɣ tifawt n ifl n usggʷas wis sa ɣ ulmmud, slawan akkʷ is d almkkud (2024-2025) rad issn alkkum n ugalfu amzwaru f rad izri "ungraw ad amaynu" ɣ tifawt n usgudi n imir wis kṛaḍ ɣ yan usggʷas ka.

D dɣ ayda as akkʷ igan agʷri d tasrtit n irni n wuṭṭun n inkcumn imaynutn bla kkatn asqqul i tfasa n tumayt n ubaraz amsnijji saw ɣ tɣiwanin ula ɣ isgnafn, ittyawssan yadda is rad nit dars tili yat tirart ixʷcn f tcwi n ulmmud ɣ yan igr uddir zun d tasnijjit.

Gɣ tifawin n mad ittyawbdarn d mnid i yat luzirt igan taḍṛḍuṛt i tutriwin n imḥḍaṛn, ur ufin dɣ wid amr ad ɣnsn f izrfan nnsn, fkan i iguyya nnsn tifawt tazgzawt ad as stin asaka n yan uslag iṛẓmn, irin ukan ad ttaddn i tnbaḍt ad taf kra n ufssay igan amggaru i tmukrisin ad ɣ man ur yaggugn.

Isrsr n tɣnsa n Imḥḍaṛn

Imussutn idɣrann:

Irɣa zwar unḍggʷig ad n tɣnsa ɣar s yat talɣa igan tadɣrant, ku taɣiwant waḥdu tt, kcmn gis islagn ɣ kra n wussan luzzanin f tɣudiwin d isunan s usifl n tiḍaf n ḍyiḍ d uzal sɣ kiɣ issnti usggʷas n tɣri 2022-2023, ittyasay uɣtas ad n imḥḍaṛn s tanilt n usifs (lbalaɣ) n tsqqimt tanamurt n Imḥḍaṛn n tsnijjit da isrsn aggʷa n uzawar f iɣariwn n tnbaḍt acku ur disn tssufi awal nns, tssgzl isggʷasn n ulmmud bla kra n usisfiw i ma illan ɣ imir wis kṛaḍ n tɣri tamsnijjit, d dɣ ayda d icckmn kigan n tkṣṣaḍ d isastann (isqsitn) ɣ wulawn n imḥḍaṛn f imal n talat ad d imal n twada nnsn gis.

Azzugz anamur izwurn:

Tɣra tsqqimt tanamurt ad yili yan uzzugz anamur ɣ yat tiddi taɣnsant mnid n ubṛlaman tmun d yan waray amakan i tɣudiwin d isunan d tiḍaf ɣ sin wussan 7 d 8 n Dujambir 2023, ɣ yan uẓmmuẓẓl imlan ar mani gucrn imḥḍaṛn f tɣnnant ad da tsala luzirt, imil nttat ur asn tfki kra igan tamrarut, tfl asn yan umzzuɣ iḍḍṛḍṛn d ur asn tṣifḍ ula kra n tɣri i ussfld d umsawal.

Akccum n Imḥḍaṛn ɣ yan uslag iṛẓmn

Ɣtsn ilmma imḥḍaṛn n tsnijjit d tsasfrt ad akkʷ kcmn ɣ wass n usiḍyas 13 Dujambir s yan uslag amakan yili gis ula waray n irimn, ɣaln is d dɣ ayad ad igan afssay da asn d yagurn s uẓuẓḍ ad afn yan asn isllan. Tffuɣ daɣ tsqqimt s yat tnmmalt ittinin is d aẓmmuẓẓl ad da ẓimẓn imḥḍaṛn yucka d ɣ yan wasif n unttaw f tcwi n usmuttg n ulmmud. Srsn tamstggart n ukucm ad ittaɣn tiɣwanin n tsnijjit f iɣariwn n uwank.