Biylmawn
Biylmawn, Bilmawn, Buylmawn, Hrrma, imɛcaṛ nɣ awkk Biylmawn buwdmawn iga tfugla tamaziɣt ar ittili ɣ kra n tsgiwin ɣ Lmɣrib slawann akkʷ ɣ tsga n Sus-Massa, tga Dcayra tamdint lli akkʷ sis ittussan. Ar tettuskar tmyurt n Buylmawn kraygat usggʷas ɣ tfugla n tfaska. Ar lssan ifrxan d iɛrrimn ilmawn n tfaska d ar sis tḍwarn ɣ tmdint nɣ udwar.
Askka n wass n tfaska, ar ttili ɣ tmizar n Sus Amqqran yat tmyurt lli ittwassann s Buylmawn. Iknna ɣrsn middn, Ar smunant tazzanin ilmawn n waɣaḍ nɣ win izimmr. Kra igan smmus ilmawn ar akkan yat tmlsit. Ar tt ilssa buylmawn, ig zund kra n waɣaḍ nɣ izimmr, maca ur da ifttu f kkuẓ n iḍaṛn zun d imudar. Da ttmunan d buylmawn kkuẓ n ismunn. Yan, ar as ttinin tamaccut, ar ikllu udm nns s ikʷfsan n takat ar kiɣ iga asggan. Wiss sin, ar ilssa kra n tmlsit irwasn tin kra n inmmtri, yasi yan wawlk imqqurn. wiss kṛaḍ, ar ilssa timlsit n tmɣart. Amggaru, ar ittgga argaz n tmɣart.
Ar ittffɣ buylmawn d ismunn nns ɣ tzdwit, ar ttkkan tigʷmma d idɣarn. Ar tettrn iqaṛiḍn. Ɣ uɣaras, ar ittazzal buylmawn f tarwa, yut s tiqqrt nns wanna ur irin ad as ifk kra. Iɣ smdn tawada nnsn iɣzzifn, ar ttddun s usays lliɣ a skarn kra n tmzgunt isawaln f tmukrisin n iɣrm nnsn. Llid Askka nns, ar skarn imnsi s aynna smunn dar middn, yili uḥwac ar kiɣ d tɣli tafukt.[1]
Anmuggar
[ssnfl | Snfl asagm]
Ar ittadda unmuggar ɣ wass amzwaru n lɛid mqqurn, d ar gis ittili 3 wussan bɛd lɛid ɣ idwarn, d izḍar ad akk izri imalass ɣ kran tmdinin. Ɣ tfugla ad, tuggt n middn d ifrxan ar lssan ilmawn n izammarn n tfaska, ar tsbaɣn idmawn nnsn, nɣ ar lssan lmask, Ar disn ttasin iḍarn n izimr ɣ ifassn nnsn, d ar sisn slayn middn lli disn iḥtafln. Ar disn ttili lbɛḍ n twal yat trabbut n umarg. Awttas n tfugla ad tga tt ad fjjijn middn ilin d lxwaṭr nnsn.
Ɣ tfugla ad, ar ttilin ɣayd n middn nna d yakkan iqariḍn ar sisn tbrraɛn fad ad skrn inmuggarn nna ɣ tḥaḍarn tuggt n middn ku-yan d mani d yucka. Anmuggar lli akk imqqurn n Bilmawn iga s yism " Bilmawn Bidmawn " ar ittili ɣ tmdint n Dcayra, ɣ Inzggan-Ayt Mllul.
Aẓuṛ n wassaɣ
[ssnfl | Snfl asagm]Taguri "Bilmawn" tuma snat tguriwin:
- Bi: tga assmẓi n tguri "bu" igan taguri n tilit, ar tt nswwray akud nna nra ad nini mas kra n yan ila (tlla dars) kra n tɣawsa.
- ilmawn : amagut n "ilm".
Aẓuṛ n tfugla
[ssnfl | Snfl asagm]Anmuggar ad izdi d tamiṭulujit tamaziɣt taqburt
Isaɣuln
[ssnfl | Snfl asagm]- ↑ Tifawin a Tamaziɣt - Aswir wis 3 n uslmd amnzu, tasna. 78 [Ɣr ɣ wantirnit]