Brahim Axyyaḍ
Iga Brahim Axyyaḍ (1941 - 2018) yan unbdad n umussu amsmun amaziɣ igan u Sus.[1]
Talalit nns[ssnfl | Snfl asagm]
ilul bṛahim axyyaṭ ɣ usggʷas 1941 ɣ ayt baha da yaẓn i tɣrmt n Ugadir ɣ Lmɣrib. immatti imẓẓi nit sul s ṛṛbaṭ, iḍfṛ gis tiɣri nns sɣ uslmd amnzu ar aslmd amsdaw.[1]
Asmuttg nns[ssnfl | Snfl asagm]
Issnti uxyyaṭ tudrt nns tazzulant s uslmd n tusnakt ɣ lqniṭṛa d ṛṛbaṭ, ɣinn a ɣ idwl amsmussu amaziɣ. ɣ usggʷas n 1967, idra ɣ usbddi n "tmsmunt tamɣribit i urzzu d usnfl adlsan" ɣ ṛṛbaṭ, tg yat tmaddast tadlsant tamaziɣt, nnan mas tga" asati amzwaru amsmun nna intayn s umzaɣ xf tdlsa tamaziɣt, ɣ yan umnaḍ asrtan anamur d usgawan ittyawssann s tɣllabit n uswingm amɣalac. Ɣ tama n ɛbdllah bunfur d ḥmad akwaw d ɛumaṛ lxlfawi d ɛli ljawi. iga anflus amatay n tmsmunt aylliɣ immut. ikka tt inn uxyyaṭ yili daɣ ɣ usqqim n tmssugurt n usinag agldan n tussna tamaziɣt ɣ usggʷas n 2002. ig awd yan sɣ imsrsal n tmsmunt n tsdawit n unbdu tamaziɣt ɣ Ugadir asggʷas 1979, ig anssixf n tsqqimt tasmattagt n tsutlin nns s kkuẓt 1980 - 1982 - 1988 - 1991. mklli isbdd tarabbut n uẓawan tatrart tamaziɣt tamzwarut "usman" asggʷas 1974. ikk tt inn d amzday amzwaru anamur n tsmunin timaziɣin ɣ lmɣrib 1993 - 1996, d unssixf n tilal n lkungṛis amaḍlan amaziɣ ittusnmalan ɣ tɣrmt n lyun ɣ fṛansa. mklli iswala kra ɣ tmsmunin ad sgmḍnt " tanttamt n ugadir" ismal s mayann asbddi amaddud n umussu adlsan amaziɣ, ig yan umussu izdin s tdlsa d tmagit d izrfan d trwakt da tettili tama n taggalin iwatsn tuṣka n lmɣrib adimqṛaṭi. inna fllas umrzu ɣ tussna tamaziɣt Lḥusayn ayt baḥsin: "axyyaṭ dars imnadn d tmaddutin ḥma ad yaɣul watig i tmaziɣt, d tnkra nns, aylliɣ t akkʷ ssnn tugt n imɣrabiyn, slawan akkʷ wid ttmussunin ɣ yigr asrtan d udlsan izdin s uskkin Amaziɣ. Ɣmklli ibdr ayt baḥsin tadrawt nns (axyyaṭ) ɣ tsntayt n usrus n umawal iccarn gr tantlayin timaziɣin. inna fllas unbdad n usinag agldan n tussna tamaziɣt mas iga "amsrsl n tidt" n umussu amaziɣ, iɣ nẓṛa taskʷflt n ultaɣ nns ɣ imussutn imnnawn, d idru dis tannayt ad, anssixf n usaḍuf amaziɣ n izrfan d tdrfin ḥmad ɛaṣid. isnumml t s mas iga awd yan sɣ isaturn n umussu amaziɣ, d yan ɣ izaykutn nns.[1]
Tamttant nns[ssnfl | Snfl asagm]
Immut mass axyyaṭ ɣ 07 Bṛayṛ 2018, isnmala usinag agldan n tussna tamaziɣt yan wass azrawan, ig assmɣr i yiman nns ass n usimwas 30 Maṛṣ 2018, ɣ usɣim n usinag. ismal yiwis s udbddi n tmrslt n bṛahim axyyaṭ i umyanaw adlsan, afad ad tg asdal n yan ugzzum sɣ usaka n tudrt nns. ɣmklli ismal s usmnid n tmrslt i tsmɣurt n Bṛahim Axyyaṭ i tdlsa, d usnmili n tinawin d tilal tidlsanin.[1]
idlisn nns[ssnfl | Snfl asagm]
- axyyaṭ, bṛahim (1992) tabrat
- axyyaṭ, bṛahim (1994) maxx tamaziɣt?
- axyyaṭ, bṛahim (2004) irgazn n tigawt tamaziɣt: wid gisn mmutnin.
- axyyaṭ, bṛahim (2207) tamaziɣt tamagut nnɣ tanamurt.
Tisuɣal[ssnfl | Snfl asagm]
- ↑ 1,0 1,1 1,2 et 1,3 Sɣ dar Amaḍal Amaziɣ (uṭṭun 273), assuɣl n Ɛbdlwaḥid butbaɣa.