Garhu Muḥammad

Amara Garhou Mohmed ilul ɣ usun n tlilit illan ɣ tqqbilt n idawknsus iḍfrn i tɣiwant n iɣrem, adɣar a ittyawssan s tudrt tamaziɣt yutn s izuran ɣ umzruy, middn n tmazirt ad ar ass n tirra n umgrad a, ar ukan sul ttkusn lmdn sslmdn taskla tamaziɣt s imzgan, saswa tamdyazt ula tullist mk ann d inzatn, ɣ igwrḍan n takatin d ixwrbicn d igadazn d inna ɣ ttggan tiwiziw zun d innrarn d isulfn n tumrtin d tguḍiwin.

Uggar

Ɣ udlis nns amzwaru « irẓag yimim » amara Garhou Med lli ilmdn s imzgan nns taskla tamazirt, zund kullu ayt udrar, yiwi-d gis yat d mrawt n tullist ɣ isawl f wanawn n isntal izdin d tussna n umaziɣ.asnflul n mas Garhou dars taḍfi n umiyyn tad nn ilddin imɣri, acku yura t s yat tɣarast ur yunfn i mk lli s nssfld dar id matnɣ d id lallatnɣ i tnfusin sawlnin f ufgan d imudar d taɣwznin d unamir.

Rad d awiɣ yan iẓri f yat tullist illan ɣ ddaw n uzwl « mas n waman », d ur rad iniɣ is rad nn kullu ggrɣ i aylli gis iwats umara.

Igr n tullist iga yat tẓuri ɣ tẓuriwin n wallas atrar iTtfn mnnawt tmitar zund asgzl d tanẓzi n imyagn d usiwl f tufrayt d umun n tarmt d uskkir…taẓuri n tullist tiwn s aflla d dars yan waddur ɣ imal n tmaziɣt.

1-ar aɣ ittals umara f yan urba ism nns hmmu ar ittili dar mas zayn tamqqrant(mas n mas), tad lli igan tabukaḍt tkṣud as ad nn iḍr ɣ ifrḍ n waman illan ɣ imi n tgmmi ar t tssiwid s yat tɣawsa is tlla ɣ uggwns n waman rad t in tamẓ iɣ ar tn inn ittaggwa tssaɣ as « mas n waman », kra ikka ɣ tmzki nns ad ikṣud ɣ ifrḍ, lliɣ yukz tiɣawsiwin yimɣur yaɣul s udɣar ɣ itturar ur nn yufi mas zayn ula mas n waman.

2- ɣ tsga tanllawt : amara issugga-d ɣ uḍris tamimt n umiyyn n mas zayn(taqqayin), , taɣart n uɣbalu n tussna ( ur sul llin waman ɣ ifrḍ d mas zayn lli immutn) .

ɣ tsga timanit : tarula n hmmu d tkssaḍ nns ɣ yat tɣawsa ur illin(mas n waman), tagrzawt n umaziɣ f ufuḍ n iɣbula n tussna nns(ifrḍ d mas zayn).

3-timsarin n tullist :-asnuml n tudrt tamaziɣt (ifrḍ ar isaylal igḍad, ijddign, ar itturar, taqqayin mmimnin, taɣwrit…)- amara yuts ad isduy anugga n imaziɣn ad tt awin ɣ tussna (manzakm a immi zayn..manzakm a mas n waman !).

4-asku n uḍris d tfras nns:

• Anaw n usku :aḍris inti s tzwart ɣ isnuml tudrt n hmmu, iswala as tamukrist lli ilkmn akyuḍ azmz lli as inna “cc ixf nnm taḍut ɣ ufud nnm.”, iskr as afssay s taɣart n ifrḍ d lmut n mas zayn.
• Allas: -arusrid ad iḍfr umara ɣ tullist ad nns, iskfs as amsawal lli nssfru s twila tamiwant n tussna ɣ tmazirt n hmmu.tullist ad yuls tt s tɣarast irxan ifawn immaln tazdgi n tmzki.
• Akud n wallas:imyagn ɣ usmid as yuls, wad lli dar timitar n tnẓzi d tfssi nns d umsad n tufrayin…
• Anmallas:isawl umara ɣ uḍris nns s imqqim n “nttan”
• Asnuml:issisfiw sis isyafatn d tufrayin n uwrik“hmmu”, issigzal t issrxu t ɣ uswulf “ ifrḍ ar isaylal igḍad”.
• Tutlayt:ttusmrasnt tguriwin rxanin d talɣiwin ttmmsawalnin aẓnin i tudrt takuyasst ɣ ur illi ukras, tiwinas ɣzzifnt mnawaynt d wallas.

5- imassn n tutlayt d tanumi n uḍris:

Imassn lli d yiwin tanmila n uḍris:-gis tazdayt ingr twinas d talɣiwin s usmrs n imqqimn d tzlɣatin d tullsa n kra n tguriwin (ifrd, aman, mmimnt….)

Tullist ad isslkm gis umara Garhou Med tawngimt nns s yat twila tanẓurit irxan iskan f wallas iddzn d yumzn ɣ umun n usntl d tmsirt d wakud, ismrs gis tutlayt irxan s tɣarast n umiyyn s ittrmas ku yan tumayt n tullist.