Taysi nnɣ tarakmamt addur ur ilin iwtta
illa g tgldit n lmɣrib yat taysi tadlsant, tarakmamt inmnawayn, iga akkʷ timitar, imiẓṛitn n ussfugl, d tmyurin immaln aẓuṛ d isaɣuln n taysi ad d isagʷmn nns.
taysi ad s umuddir nns iẓlin isuln g kra iga tt azmz d udɣar, izdin kra n tikkal d umiyn, d uzdduy nns akd imiẓṛitn ilan tirsal g tmskirin tinamunin, tsul i wanna iran ad as issakud g isnfluln isliẓiṛn , d isarutn untimn, lli ismkilin tumant gr tumanin ggutnin nttafa g tdlsa tarakmamt g lmɣrib.
fkant tnmmalin tigldanin timatayin yat tawit iẓlin i taysi tadlsant tarakmamt, ḥma ad as ittwafka atig mqqurn, i ufrag n ibaynutn n tdlsa tamɣribit tamaziɣt d uzdduy nns akd tisaɣulin nns, d tmskirin nns, g tmdyazt d inccadn d imdyazn, akd umarg d ṛṛwayṣ d uḥwac d ismgan, d usnulf n tudrt s urrkz agrawan issiwiln xf tumrt, tafsut, tayri, tanaka, asyfa s iman, d ussiwl xf waddur amaziɣ g tmɣriwin d tfugliwin, asmrg s tudrt g twlaft nns bahra iẓiln, alli inzzin akd ca n tmskirin nns d imiẓṛitn n usfuglu aɛṛab illan g tsaɣulin nniḍn, d ca n tmyurin nniḍn zund tagnawit, ɛisawa, taẓuṛi n umlḥun, d uẓwan awndalus, d lḥlqt d umallas.
tbɣur tgldit n lmɣrib s taysi tadlsant tarakmamt tanmnawayt ilan iẓuṛan f umzruy, imun g tmazirt n lmɣrib yan uḥṭṭu iggutn g twila n ussiwl aẓuṛan d taysin nna immaln accar gr taysi tadlsant tarakmamt ad nini tamagit tanamurt.
tga tgldit n lmɣrib yan umdya n ugrbrid i taysa d wayda d tẓlayin tidlsanin d tutlayin nna ittwaskarn s umyaɣ n akkʷ ifdirsn iwɛṛabn d iwslamn d unzrufn d iwfriqn d iwandalusn d udayn d inammasn, yujja unmnaway ad adlsan yunisku ad as tfk yan uzwl i usmdya n taysa tarakmamt.
ar dɣi, illa g lmɣrib 12 n ufrdis g tlgamt n yunisku i taysi tarakmamt, sgisn asayrar adlsan n usarag n jamɛ lfna, anmuggar n ṭanṭan ( ittwakcm 2008) , asmstɣ lli igan yat taysi tanafgant iddrn ( ittwakcm 2010) , anmuggar n urdlim g ṣfṛu ( 2012), argan d tsmkirin sis iẓlin ( 2014) , iẓnagn d tussiniwin d ifuksn d tmyurin d tmskirin sis iẓlin, taysi n tgnawit ( 2019), tussniwin d tmskirin iẓlin s usyfu d usumr n ksksu ( ittwakcm 2020) , ttburida d tirra tawɛṛabt nna ikcmn 2021.
awd arkz n ‘taskiwin’, arkz anmnɣi n imaziɣn n waṭlaṣ amqqran n utram , nna ikcmn asggʷas n 2017 am taysi tanafgant tarakmamt nna s d iqqan ad ittwaḥḍu g uɣawl.
ikcm awd ubruɣ amɣribi g tlgamt n taysi tadlsant tarakmamt n tmaddast n tmtta imunn i usgmi d tmassanin d tdlsa ( yunisku) , am afrdis amaynu ittusadfn i tglamt n wansatn lli s iẓḍaṛ lmɣrib ad t izmmim. talgamt ad urta tsmd, rad sul sis ttwadfnt tɣawsiwin nniḍn slawantt ig nẓṛa abɣr d unmnaway n tiẓiḍḍaṛ n tmazirt nnɣ g taysi tarakmamt gis illan.
da ittili usgdz akalan s ugzd n mad ɣurnɣ n uytli akmam d arakmam, ur d s usgmi d tasit n mad ṭṭfn wiyyaḍ d usbzzizz nns xf wamun, ira gitnɣ usgdz ad nissan mas ttwassnn igran nnɣ g imkunn nna idrus is ttwaẓṛan, ḥma ad gn timitar d iqqan ad sgdzn ttwassannt g igran ikalann, ad sisn yack umaḍal iẓṛ tn yaf tn am taysi tanfgant iɣudan, ur llin imkunn nnɣ ass a amr g idɣarn g llan imaziɣn, nsiṭṭn gis timrawin, nfk i ugzzum amzwaru 8 ibaynutn, gan :
1- tadlsa n wargan :
ur tgi taddagt n wargan ɣas yat taddagt idrusn yujjan sus azdduɣ nns, ur d ɣas azatim ittwassann g ugmmuḍ ula atram g tiram d tsnmalin n usfalki, maca tga tadlsa isnulfan azatim n wurɣ, azatim n wargan, maṛṛa n tguriwin izdin d wargan gant asnflul adɣran amaziɣ amzdag, zdint akdis timyurin d unagraw iɣudan, awd adɣar nns amaddur iga anmnaway abyuluji iẓlin ismunn anawn n ibxxuyn d imudar.
tga taddagt n wargan taddagt tamyiwnt g umaḍal nna yumẓn 3 tusnitin tigraɣalin : g umzwaru am timḥḍit tagraɣlant , tiss snat asissn s tdlsa nns d mad dids imunn g wafulki n taysi tarakmamt tamaḍlant, tiss kṛaḍt asfuglu nns s uẓlay n 10 mayyu g kra igat asggʷas am ass amaḍlan ( timtta imunn)
2- tinuma n igidar igrawann ganin akkʷ izaykutn g umzruy
d tanafut tasusit, illan bahra g idurar n waṭlaṣ amẓẓyan, tettwaɣcd, tettu, tettyakar. ɣurs taska d utwal iẓiln, tlla tasutin a ad, yili ɣurs awd tazzulin ggitnin g uḍuf d uḥṭṭu d imnɣin d uswuddu d usgudr. tga tamntilt nna yujjan tiwsitin ad zdɣnt qqimnt mrniwint , ttwasrasn i igudar ca n tnumitin d izrfan ilan assuds d tdimuqṛaṭit, tssuti s izrfan nns d tnumitin igran isusin, tiws xf ufsr d ubṭṭu n twisi d tdimuqṛaṭit d tdlsa g tsutin izrin.
3- tadlsa n tmḥḍit n lɣranga tamjjuḍt
ism as awd lkriɛa d tutlayt tadɣrant, d ‘ ibis’ s tutlayt tafṛanṣiṣt, acku idrus yili ɣurs yan watig mqqurn, yafuḍ g umaḍal amr sus, slawantt g tamri d ddwira d sidi bulfḍayl, gan 600 n ugḍiḍ, ittwasdiddin s wafuḍ, da sis ttackan imallayn sg tmizar ḥma ad t ẓṛn, ḥma ad ittwaḥḍu, tettwaska as yat tmḥḍit g sus masst, tga sg tmḥḍitin mqqurnin g lmɣrib, tumẓ sg unafar n wasif n sus g inzggan ar aglu g tznit, tlla g udɣar ad yat tdlsa d yat taysi inmnawayn nna idrusn is tlla g mani yaḍn.
4- anmuggar n taddagt n ujgal g ayt ḥmd
tga yat taddagt illan ɣas g lmɣrib d laṣbbalmaṣ , g lmɣrib tlla ɣas g sus g tawsit n ayt ḥmd, tga yat taddagt n tfust n tdrasinant, da ttusmrasn ifggagn nns g uswdf n tzizwa, tettwasdidi s wafuḍ, ufan tt ibṛṛanin tg dɣi tamatart n tmnaḍt, da as ittuskar anmuggar ku asggʷas, mmaɣn imzdaɣn ad fllas frgn minzi tiws g usgdz akalan n tmazirt nnsn, tiws awd g usku n tuṣkiwin isnbgayn imallayn ibṛṛanin, tg dɣi yan ufrdis adslan n ungraw n tawsit n tgrawt n ayt ḥmad.
5- anagraw n taddart n ugrram, taddart n tzzwa mqqurn g iẓẓlmḍ n ifriqqya :
tga taddart n ugrram n ugadir n tammnt, tga taddart mqqurn n tzzwa g umaḍal, da gis tettusyafa tammnt n tzuknnit, lli ittwassann g tmnaḍt, tammnt tamyuft g sus d lmɣrib, ɣurs yan unagraw iẓlin ig yan ugzzum adslan g tmnaḍt, ttwasrasn as kra n tmyurin am ayafu amzwaru rad ittwafka takuti i imḥḍaṛn n tinml tazaykut g tmnaḍt, agʷrram awmṛabṭ ad izwarn iska tt, ttun tt dɣi, awd taɣart tujja tt ad yurri waddur nns.
6- anmuggar n lalla taɛllat, agraw amqran n wid iḥsan lqṛan
tamɣart s tmiḍi n urgaz, tamɣart talqqit d tmhiwct, da ittuskar agraw amaḍlan i wid iḥsan kqran s tmlda n ukttuy n tmattant nns, tiws g tudrt nns g ufsr n tmassant d ulmmud s ussẓṛf n imḥḍaṛn, ar asn takka utci d inna s sɣawsan, llig tmmut s 40 n usggʷas , s usufu n yiman nns ittwaskar as agraw amqqran akkʷ g umaḍal n wid iḥsan lqran, gr mraw ifḍn ar smmus d mraw ifḍn n wid iḥsan lqran da nn ttmunn g unmuggar nns asgʷsan ittilin g wammas n maṛṣ n ku asggʷas, agraw ikka 200 n usggʷas , idra gis uggar n 160 n tinml tazaykut nna nn ittackan g akkʷ tmdinin timɣribin.
7- tifilin tisusin
gant tfilin n sus abaynu ur ilin atig, ddrnt d tmrniwt n imassn n tirra, tmmatti sg tirra g ifggagn n waddagn ar tifrtin ittwaḥḍan g ugʷns n iɣanimn, ar idlisn ittyaran, maṛṛa nnsnt ɣudant g tirra d tbridt n ulssi d tutlayin n tirra gr tɛṛabt d tmaziɣt d tɛibrit d isntal d twilawin d ikʷlan, ttyakarnt ijjlu kra digsnt, llant g isalayn d tsdlisin n ayt ugmmuḍ d tsdlisin tusligin d tmatayin g lmɣrib, gis g tzwir ɣas ilugann issudusn amun d middn, zund tinumitin d tmyurin n uswuddu n igudar igrawann d ubṭṭu n waman d uswuddu n igran n tmgra d tiyssa, allig tlkm tussniwin d tẓuṛiwin.
8- tinmal tizaykutin
gant tinmal tizaykutin g sus asila n wamun d trlst n tuwsit, ammas n tmassant d tẓuṛiwin d usgmi d tigurrmt d tmhiwct ussan n ufra, gnt ammas asrdas i tmaɣt ussan n imnɣi, tg awd timzgida d tsdawit d tmuzrt tasrdast, dars yan uswir mqqurn g ulmmud, da gis aqqran ḥsun tussunt d tussna d tskla, ilint digs tinmal iẓlin s yan wanaw n tussunt d tskla d tmdyazt d uẓyaṛ, ɣurs azdday d unagraw idus, da ttiwznt tuwsitin xf ussẓrf nns s utci d tissi ku asggʷas s tkutin d isfka , digs taysa d tdlsa d taska iẓiln.