Timskarin n ubuy

Afgan sg umuttuy animan ar amuttuy awngim

Tamɣart tamaziɣt, yat g tnbdadin n tmyurin d tmskar tizaykutin

taffugla n litihal dar imaziʏn n sus

Tga tusna n ku amun,yan usatig amqran g tmagit tadlsant n wamun ad, mk lli tga yan uzwl s tfilawt lli istizan tafgga taɣrmant d tdlsant nns. Aylli yakkan yan umggrgs i tayssi tukmamt d tarkmamt. tizi lli g tga tayssi tadlsant slawan tt tingmi tamdnant, yan igr ifsan ayawan, isɣawsa s tugtt n usnubbc d urzzu afadd ad izzugz kra n tifawt f umttul ad, lli iktarn s tugtt n tmskarin bahra ur ifawn. timskarin ad sɣawsant s usfsi d usfru, ma ad ikka d tazdayt lli illan gr ufgan d tmyurin nns. ḍaṛat n mad tssa tayssi tadlsant tiẓlayin nns g wamun adɣran lli g iddr. ma ad ad igan asrag aylli g as isnflul uwingm amdnan tg yat tɣuni tanimant lli izdin gr tissumsa n iɣrfan d tmyurin nns dg umzruy ar ass ad.

G tsga ad ar nn ntettafa tugt n insayn lli igan yat tfult g tfulin n tayssi tadlsant tarkmamt, slawan tt lli g iga udaw amnsay yan urmmus d yan inaw iẓlin s tɣuriwin tuntṛubbulujyyin. swwurin tugtt n imrzutn d imssɣratn f urmmus n tiriwt ad, ad git sflun tantla n tsɣunt tanamunt, d twingimt, d tdlsant, d wammak n imnsayn lli iskar ufgan ar as sslmadnt tamamkt tagʷmanit i tussna n wamun, ma ad aɣ ittaru kra n isqsitn zund,mad igan insayn? man timyurin timnsayin nskar g tmskar n ubuy? d mad igan taslit unẓaṛ d umiṭuluji nns?

Ig nsɣzn asisn n msmun awal n ṛubiṛ amẓyan (petit robert), gan t tmnsay tugt n tffugliwin lli ittyawskarn g dar uɣrf,anaw ad n tffugliwin nẓḍaṛ ad fllasn t nini mas gant yan usuds azayku i imussutn ad. iddɣ kra n " wallas d tsulant n ilugan lli iswrn timyurin ad bac ad bdda sulnt tmsirin timunanin, d tmitulujin lli d yufa" Cakir Salim ntta ar ittini mas gant kra n "tiṛwin d twwuriwin tizaykutin, darsnt tazdayt d usgd d tḥrgi, tgli tnumi isragn nns, slawan tt lli g d tffɣ g iẓẓi n tudrt n uɣrf amskar nns acku ar tɣaln imzwura mas d timskirin ad ar sdgint ikucn d udwas".

Nẓḍaṛ ad nini mas d timskarin ad gant yan wanaw n usuds d tmyurin lli ittilin g kra n tffugliwin afad add rarn yan wakud azayku ur ifawn, isɣawsa sul s tugt n ufasr d usfru lli yakkan tifawin f tasult n yat tmsirt tamunant ityawssan ar t ssuɣlnt kra n tmskirin timsɣlfin dar iɣrfan nns, aya nn af ar t ltettafa ar ittals g tmyurin d tfugliwin.

Timskarin n ubuy

Tga tumant tasgdant yat g tumanin tidlsanin d tsɣanin lli bdda imunn d ufgan sg tizwiri n tilit nns,ad ur nttu masd afgan is iga amɣnaw amusnaw unigl, s yat twal, amgal n imɣnaw aḍnin, aylli t isslkmn ad isnflul g tudrt, aylli yujjan afgan ad ar isaka isqsitn n tilit g unnli ns yiri ad irms tilit d ugama lli g iddr,macc afad ad irms tilit d ugama lli g iddr, macc afad ad yaf ufgan ad timrarutin i isqsitn nns. iṣka tungint nns s tugtt n tmskirin d insayn, lli g nn isgudi tirmiwin nns tinccinin nns, d tinimanin nns, mk lli innuṛẓm f tirmiwinn wiyyaḍ d usgd nnsn. ma ad ad imsasan d lmɣrib ula timizar n iẓẓlmḍ n ifriqya s umatta, isayrurn ad lli dar yan usbɣr g mad iẓlin s tmskar d tmyurin iggudin sg tasutin n umzruy g dar wamann ad.

Tlla tmust ad yat tilalat istawhmman g tsilalt n uswingm asgdan dar imzdaɣn n lmɣrib, aylli nn nẓṛṛa g tugt n tmyurin nnsn zun d timyurin n ubuy lli iga n sg tmẓlitin tidlsanin lli d urunt tasutin n uzmz amunan lli g ittyafa mas d imɣribiyn darsn yat tzdayt idusn d tayssi tamadnant taqburt n id tima nnsn imaziɣn. Ma ann as nẓḍaṛ ad t nini f tmskarin n ubuy yat g tmzlayin n tussna nnɣ lli mu izri uẓuṛ nns tasutin, aylli itrran awingm n imɣribiyn ad imṣawaḍ d tfras tigamanin d tnnumɣrt nns.

Aylli isddid Muḥmmad Usus g udlis nns Kukra g tusna tamaziɣt lli g inna mas d gant tmskarin d insayn d twila n usfuẓr lli sul iddrn ar ass ad kra n isagurn n twalit n ufgan azayku aylli g tt nn kkan imaziɣn izaykutn ar skuḍan tafukt d wayyur d takat d kra n imudar, ṣkun as isumɣa fulkinin mklli flsn s uḥrgi d tdusi nns s yat tɣarast izwarn afls s tilit n ikucn dar ufgan afriqi s umatta.

Gant tmskarin tuḥrgin mad d izwarn s unli n ufgan ur ta issn issaɣn n wakuc, aylli yujjan afgan ad ar isiggil timskarin mad itmunn d ussnfl n tudrt nns. Timskarin n ubuy gant yan wanaw n tmyurin iddrn g tffugiwin n ubuy lli g ar izzgar ufgan yat tfrkt g tudrt nns af ad ad izri s tayyaḍ, zun d timskarin n utrrf d tin irw, d littihal d tmttant. Mk lli inna Fan Ganab "ar izray g kṛaḍ izmaz, amzwaru iga t uzmz n tstut, wissin iga t uzmz n ussizwir, d umggaru iga t uzmz amrgal, mklli nẓḍaṛ ad as nssaɣ angiri ngr uzmz izwir s wad t iḍfaṛn, nɣd alkam n waddad amaynu", tifrkiwin ad ur akkʷ zraynt s tmskarin g ugns n kra n tffugliwin.

Timskarin n irw

Akud nna d tlul tazzant dar imaziɣn, ar sffuglun s ugudi n tɣarasin, iḥwacn d tmyurin d tugt n tmskarin, ar tettili yat tffugla mqqurn wiss sa ussan, ar gis qqrsn i izimmr nɣd akkʷ mnnaw izammarn, ar d ttasin kra n ixsan nns ar tn mṭṭln g ddu wakal, afad ad yaws maya nn i ixsan n tazzant g ddu tmrniwt d udwas, amma tifyyi nttat ar tt ssnwan d tammnt bac ad timim tazzant, ass ann nit ar tbbin yat tkyuḍt g wazzar n tazzant ar tstaln takyuḍt ad unck nna tstl ar ittgga tarragin n urɣ, mklli isffuglu iẓẓlmḍ n lmɣrib s yat tɣarast yaḍn.

Ḍaṛat n tɣrsi ar mṭṭln kra g tixsi g wakal, amma kra n usunn ar ssnwan ṛṛba amnid n txsi ur ar t sngaran d ixsan agzzum ad ar t cttan imarawn, agln ilmmad ixsan nns g tduli n tgmmi, amma agayyu n tixsi d ilm nns gan taɣamt n tmssarut, amma g mad iẓlin s usgurm, ar ffaln yan kṛaṭṭ tkuṭṭaṣ yat g umnid n ugayu, d snat g tsggʷin taffugla yad n usgrm tusi tugtt d tmatarin izdin d usɣn amzwaru n wamun nnɣ, ma ann af tga taffugla tafuẓaṛt,ar git skarnt id matsn n tazzanin tilḥrzin, ar ttyigiln t g imggṛaḍ nɣd tifassin n tazzant bac ad tn tari g gar tiṭṭ,ḍaṛat n mad d ifaɣ g usirw amḥraz n mas, s tudrt lli g illa mad ifulkin d mad ihrcn, ma ann af d iqqan ad yarud iɣus ibxxr s kra n iḥclafn, msln tafgga nns s lḥnna irksn d tglay fad ad as sgurmmn, agln ilmmad takyuḍt nns g uzqqur n taddagt inaẓn i tgmm nnsn. Amma g kra n tsggwin aḍn kra n tkaḍuṛin g twingmt tamdnant ma ann af ar d tggan tisnt g ddu ils n tfaska, ma ann akkʷ ar ittaws i tazzant ad izgr yat tfrkt g tudrt nns.

taskra dar izaykutn

Timskar n imtrag

Gan idamn n islilan yat tmatart mqqurn dar tfruxt ar tmmal, mas tga tamtrugt, aylli dar tawaft g mad iẓlin d uswir amunan f yan umutti n tutmt s yan uswir usmir f ussnti ablills, ma ann ar itgga tumrt slawan tt akkʷ lli g tlla g uzmz n iwl d tẓḍaṛ ad tskr takat nns ( tawja nns), ma ad ar itettr kra n tugguẓt af ad ad t ur isli kra n uhrac slawan tt akkʷ lli g yusi assaɣ n waddur n tawja,ɣid ar git itmattay tnglit n tfgga d tin idamn sg yan ufṛḍiṣ agamay, s yan ufṛḍiṣ inigil izdin d waddur n tawja, g tsga yad ar tggan idamn yat tmatart n usffuẓr asgdan d umunan. tizi nna tlkm tfruxt tifrkt ad, ḍfaṛn tst tugtt n tmskar ad tnt tskr, zun d tissi n ukʷfay, d ad srs tssird udm nns, tɣm lḥnna, tg nn taẓult, tls tugtt n ikʷlan i tfgga nns, bac ad tskr yat tnnuṛẓmt i tfrkt n iwl.

Taskra dɣ nttat tṭṭaf timyurin nns d inawn n isffuglutn nns, tga tskra (taẓallit) n drrit, yat tfrist g tudrt tamunant n lmɣrib uslim, sg tmyurin n tffugla yad, ad iḥiyl babas n ufrux i umussu ad tiɣrsi d tiram bahra ifulkin, ɣrn i inbgiwn d tawja nnsn akkʷ ad disn sffuglun, ass ann ar git tmunan inbgiwn ḥucn, gin acnyal umlil iggi n tgmmi nnsn bac ad nn irar gar iman d gar tiṭṭ, ar ittini ḥasan lwzzan " tga tffugla yat g tmyurin nnsn tizi n tskra n ufrux g wiss sa ussan iggi n tlalit nns, s tmlda yad ar yaqqra babas n ufrux i imddukkʷal nns d unrmas, tizi nna ccan, ar yakka ku yan gisn tagrict ar snat nɣ akkʷ uggar ad gnt tarragt, ar tnt sluɣn g udm n wazzan, ar ilmma yaqra s wassaɣ n butarragt isnimmrt, ḍffir ma ad itẓalla uzyyan i warraw yili ilmmad uḥwac d tɣrit dar tmɣarin".

tawtmt tamtrugt

Mk lli d tiwi tmyurt, ad tili tffugla n tskra sg taylgi zikk, ar ilmma sslsan i wazzan fiqya tumlilt tabarawt, sgurmn as ixf nns, ẓuln as tiwallin nns, ɣʷmn as lḥnna g tfassin nns d tḍaṛin nns, agʷln g tgaliḍt nns nɣ d g umggṛḍ nns kra n talḥrzin d kra n iḥclafn, lli rad t iqqil g gar tiṭṭ. tizi nna tsmd tskra ar d tḥyyaln i tazzant ad yat tirmt lli rad as yaws ad d irar tiẓiḍaṛ nns, tirmt ad ar git tilin t sat tglay d yan ugzzum mqqurn n tfyyi, ar ilmma sɣritnt tmɣarin, ar ttalɣn t azzan ann d tawja nns, ar tggan azzan iggi n wayyis ar t id smurruyn ḍfṛn t wazzann imddukkʷal nns d irgazn imddukkʷal n babas ayt usun, tizi nna d urrin ar ilmmad cttan tirmt lli d ḥiylnt tmɣarin, yili mad yaqran i imḥḍaṛn ad ɣṛn lqṛan.

Kra n tsggwin aḍnin ar sfalkayn ayyis lli ittsudu wazzan s ikʷlan aẓẓggʷaɣ d uẓṛwal, ar t ilmma tḍffṛ mas s ucnyal umlil lli rad t iḥrz g gar, mk lli iga maxccay ad nsskti mas llan t tmyurin aḍnin g umskr ad zun d ad rzzfn dar kra n igʷrramn, ssrɣn nn tinirt g ṛṛuṭ gin izujjutn s wanaw n lɛnbṛ d ijjign d waman n ẓhṛ, yili mad ittawin tiɣrsi s dar umḍl n igʷrramn. tannayt lli s nẓḍaṛ ad s tt nfk f tmskar ad, mas d taskra g lmɣrib mqqar git llan kra n inuḥyutn g ifruriyn nns, mac tifras tinmtayin nns gan t yan. mqqar fllas zrin izmaz dranin, timyurin n imɣrabiyn akkʷ mmrwasnt g tɣarast n usffuglu, mk lli tmmrks tmyurt ad d tmyurin n wamunn aḍnin.

Taffugla n littihal

timskarin n ubuy dar imazivn n sus

Issn wamun amɣribi tugt n tmyurin d tmskar iṭṭafn tiẓayin tinamunin, zdin t d tmagit tadlsant nns d tɣrmant, amnaḍ ad, ag gan t tmyurin n iwl yan wanaw ittawssan s kra n twllafin iẓlin zun d tugtt n tmskarin lli yutn s iẓuṛan g ugns n wamun ad, tg yan ugzzum g tayssi nns, g umnaḍ ad ag iga iwl amgraw yan umussu n tumrt ar git tkkusun isyafatn iniman yat tɣmrt yattuyn, ma ad ar t immal mas dd ar d is ur ittyafa ad tsnti tfrkt ad amr iɣ zwar tlla yat trzzift n uskkʷar dar umḍl ad git awin kra lbaraka. amma g mad iẓlin s tffugla ad ( tin iwl) ar ssrɣan kra n tinira uqndil, yili ucnyal umlil nɣ kra uzqqur iggi n tgmmi n usli, ma ad ar itgga tamatart mas d asli d tgmmi ann ɣusn, d illa usli ad g tfrkt n umutti sg tfrkt n tmẓiyt d tɛurma s yat tfrkt n trrukza.

Ar ssntayn imḥiyyln n tmɣra g uɣuri n inbgiwn ttam ussan, ass amggaru ar ttazn ku tigmi axmmas nns s dar iẓiḍ bac ad d iẓḍ irdn d tmẓin, ḍaṛat n mad mun t tmɣarin f ufran n imndi ad, agraw ad ar git tilin tugt n iḥwacn ar gitn addrn asli d tslit. tifrkt ad tga yat sg tmyurin timzwura n tmskrt ad, ar tid ilmma iḍffṛ uḥiyl n wass n lḥnna, timskrt ad ar aɣ d tsskʷtay g kra n tmskar illan g ifriqya lli g ar mssln t tslatin irris acku iga yan wanaw n usɣus n tfgga g gar, d ar nn tsitti mad ixcn, slawan tt lli g iga lḥnna uẓu n ljnt..

timskarin n ukris

Ad ukan ilkm wass n lḥnna, ar ssrɣan t istmas n usli takat g kra n tsga bṛṛa n tgmmi, ssun t agrtil g tama nns ar d ttikturnt yan ufcku s lḥnna ar srs msslnt ifassn n usli ar ttirirntn, tizi nna smdnt ar itsutul isli i uzrg g iggi n tgrtilt, tamyurt ad ar tt tskar awd tslit mac s yat tɣarast yaḍn, as tt igan d iɣ srsnt taslit g tuẓẓumt n usarag ar as akkʷ zɣarn t lḥnna bac ad ḥiyln t ad s tt awin t s usarud ad s tt d sɣusnt. azkka, iga ass n tɣmit, ass ad ar git ttaḍṛ tnggaft lḥnna d lḥamḍ, lli rad tɣm i tslit ngr tawja nns d tmddukkʷal nns lli as itsutuln, ar as tḥucnt ar ssngifnt.amma tanggaft ar tɣmma unuɣn s lḥnna, ass ann nit ar trzaf tawja n usli ddu imsli n iḥwacn d tnggifin s tgmmi n darsn n tslit ar ttawin tarragt d ukris.

Nafuzkka yann ar tzzfnt tmɣarin n usun f wazzar n tslatin timaynutin lli mi tbbin irgazn nnsn t imik g wazzar nnsnt, urta d inwi sksu ikra iga tt tayyuga n islan ad,llan kra n isnuḥyutn g tmyurt ad ngr tsgwin n lmɣrib zun d aylli nn ntettafa g kra n tsgwin lli ittawintaslit ar d s tt nn fln g tgmmi n usli, tizi nna nn lkmn ar d fllasn sukfusn timqqa n waman, timqqa ad gan t tamatart n ublulls d yan usflilli n tmiṭulujit n "tslit n unẓaṛ" mk lli nn srusn i inbgiwn nnsn iṛwan d ar d fllasn tluḥn kra n waqqayn n wargan d irdn g iggi uzur.

assngf n tmʏra

Ar d ilmma itggiz usli ad iṛẓm aggur ntta d mas d yat g istmas, ar ilmmad takka mas n usli akʷfay i tslit kraḍt twal, macc illa fllas af tgʷmm kra git g imi nns ar d tinn tffi g ddu tgrtilt g tɣmrt n uḥanu lli g rad fllas ikcm usli iḍ ann, mac ur ta tkcm tslit, ad tt ittasi gʷmas ar d s tt nn isrs g uḥanu nns, ar disn ttmun twssart lli dar tirmit g ma ad, ar dis tettasi tagrtilt n uẓmay ar tt tfssr g uḥanu n islan, ar ilmmad tgawar d tslit ar as tmmal mar ad tskr g iḍ ann, amma asli urta nn ikcm ar d zwar ittawi awd ntta timsirin nns dar umtrug ixalḍn g ma ann.

Timskarin ad akkʷ gan t yan wanaw n tmatart f umuttuy n usli sg tfrkt n tɛurma s tin trrukza, d umuttuy n tslit sg lli g tga tafruxt s lli g rad tg tamɣart ismdn tifaddiwin n ublulls, aylli t n issanun f iman n tmasayt d tmrist afad ad kcmn s tfrkt n utrag tanamunt.

Timskirin n ufccad d umḍl

Gant tmskarin n ufccad d umḍl yan udm g udmawan n twalit tasɣant g lmɣrib azayku, mac iɣ rad nfk yan usisn s tmskar ad nẓḍaṛ ad nini mas gant inawn n ugd d imttinn g tsga ad nit, smurfnt tɣuriwin n ununc g ismḍal s wanaw nns imzarayn tugt n tɣarasin n umḍl llis ttyawssan imaziɣn, slawan tt lli g awr sɣzan yat tɣarast ka, mac ku imttin ar t mṭṭln s yat tɣarast zun d tiɣarasin lli rad ngr g izrirgn ad n dat.

addadn n umḑl dar izaykutn

ḑḑḑ

Addad amɣrḍ

Anaw ad n umḍl, ar nn git srasn imttin f tsga tafasit nɣ taẓlmaḍt nɣ f tadawt nns, ad tg tfgga nns tamɣṛṛḍt mac taɣarast ad idrus unɣal nns, ama udm n imttin ar t swalan s tsga tagmmuḍt nɣ s tagut, mk lli nn ntettafa iḍaṛn n tfkka nnuḍan, ilin isuliln jlljn ar ittari agayyu d idmarn n imttin, aya nn af isawl unmzray ayunani hirudut iẓdi tt d usffuẓr n timḍlt n imaziɣn izaykutn.

addad amʏr̩r̩d

Addad annuḍu

Taɣarast ad ar gis mṭṭln imttin zun d azzan g uḥlig n mas, nɣ d mami nẓḍaṛ ays nssaɣ amḍl n usiraw acku ar nn mṭṭln imttin f tsga tafasit nɣ tazlmaḍt mac tafkka ar tnuḍu ur ar tgga tamɣrdt d iqqan d ad ur ggrn iffaddn i uḥlig, d ifassn awr lkmn udm, anaw ad n tmḍlt ittyafa g arfud d sidi msɛud mklli tlla tɣarast n umḍl amgru, ar nn git mṭṭlntawja akkʷ s umatta afad ad ur tngiri tamunt nnsn d tawja nnsn mqqar gan imttinn,ma ann ar immal mas dd yusi tugt n inumak g tmkʷtit tamunant nnsn ad ur nttu yat tmyurt aḍn ad s tt igan d, lliɣ tt nn kkan imɣribiyn izaykutn ar sskmḍn tafkka n imttin nnsn lli tt nn ikkan zdɣn g bṛṛa n tɣrmt nnsn tizi nna tnsa takat ann ar nn tffin tummaẓt n wakal f iɣd n imttin ann bac ad ig tamatart f umḍl nns. Acku takat d wakal g tmskrt ad darsn yan wanamk inigl n tɣusi d urud.

addad anuḑu

asmḑl amgraw dar izaykutn

Timskar n unẓaṛ d tccaḥuṛt

Imgradn lli sis iẓlin : Taɣnja

timskarin n blʏnja

Tlɣnja nɣ Blɣnja iga yat tmskrt ityawssan g iẓẓlmḍ n ifriqya nɣd taslit n unẓaṛ,amskir ad iga sg tmskirin n timsswit, awttas nnsn igat ad ssumrn agllid n unẓaṛ bac ad tbuɣlu tayyirza tili tfsut.issmnid imil lawst g yan warra s wassaɣ n " tiguriwin d tɣawsiwin timaziɣin" lli g d iẓli g yan ugzzum taɣarast lli sar tyiwskir blɣnja g tugt n tmizar g iẓẓlmḍ n ifriqya, ma ad nit aɣ rad nfk yan usgzl lli g rad nsbnd tifras timazar gr tmskar ad, d tmitar nns d usnubc f inumak nns d tmitulujit lli dis izdin. ar turruyn iẓuṛan n unsay n tslit n unẓaṛ s tullist lli ittinin mas d yan wass tswa ddunit s unẓaṛ tfsu tudrt, tddu nit yat tfalkayt( tafruxt bahra ifulkin) ad d tcuccf g yan wasif, imil tanni nn akuc "anẓaṛ" ittr git ad tg tasmunt nns d tmirit nns, mac tafruxt ann ur tri, tnna as uhu, aylli tt yujjan ad s tt gis igmi, iggal as ar d gisn ifru, aylli tt yujjan ad issafu awal nns g ussan ann n dat, isɣr akkʷ isafn d iglmamn, lli g tuls tfruxt ann i tawja nns mad illan, ttrn git ad tyyih asutr n wakuc afad ad tn d inil, ma ann nit ad tskr trbat ann imil turri d tfsut s mklli s tt nn tkka.

Tamamkt n tmskrt n tlɣnja

Ar d tasint tmɣarin aɣnja ar tsfalkaynt, lsint as iqcucn d tmlsit iẓiln, ɣmint as tiwallin nns, ar d ig zun d taslit ar tt tasint tmɣarin d tfrxin ḍfṛnt n t tiyyaḍ ar tggant agdud ar ssngifnt ar tḥucnt ar ttinin t g sus " atlɣnja numn s ṛbbi, walli izgan ad aɣ iɣit", ar d akkʷ ssutlnt i usun d dar idbnan,ar ilmma ttirirnt ar tettrnt bab n unẓaṛ ad d ig anẓaṛ, ar d fllasn sukfusn ayt usun aman sg iggi uzur, ma ad iga yat tmatart n wallas n uzmz amituluji azayku. tizi nna smdn t asutl n usun, ar smunant tikutin dar ayt usun bac ad skrn t yan imtci lli igan s wassaɣ "lmɛruf", imtci ad ar ittili tama n wasif nɣ kra n ungay, nɣd aflla n kra n wafa yattuyn lli igan afuẓaṛ.

Mk ad, ad tgga tmyurt ad g ufris nns mac ad ur nttu mas llan kra inuḥyutn g tɣarast n tffugla ad ngr timnaḍin aḍn, zun d timizar n tagut n ifriqya, lli g ar skarn itwargin timskrt ad s tɣarast nit lli nbdr mac tizi lli g ar tkkan t usun ar asn dd akkan middn tiɣrsi mmi isggan izbl zun d uɣa d iɣjdn isggan, tizi nna lkmn t dar umḍl ar jddrn t lbxur sukfsnt lḥnna f iɣrban n umḍl,bḍunt ilmma d tarwint - lbsis g sus- f inḍfaṛn nnsnt, ar ilmma itbddad ukabar g tama n umḍl n ugrram ar git tettrnt mad itggan azgn n tusdadt, ɣrsn ilmma i ufunas lli iwin bḍun tifyyi nns f tgʷmma, ku tigmmi ar tssnwa sksu i inbgiwn nns d imẓlaḍ n usun.

Timyurin ad, gant anaw n tffugla s wakuc n unẓaṛ d tslit nns ma ann af ar tggan akabar dar tmɣra tiniglt ad afad ad issn wakuc is nit bahra srs mmrn mddn d mmrn s tmɣra nns, bac ad d fllasn izuzzr anẓaṛ lli s sɣawsan ayt wakal, lli iskarn tugt f ad tmurs tffugla ad s tdrawt n tmɣarin d tazzanin d wid mqqurnin f wakal ar t cttan msln srs tafgga nns s tallaɣt, akud nna akkʷ skrn ma ad ur d idṛ unẓaṛ.

Tizi nna nrar asmmaql s tmyurin d tmskar nnɣ, ar nttakz tiɣbi n uswingm amunan nnɣ d man igran aɣd yugm, mk lli yakka yat tifawt f tfilusuft tawngimt n wamur ad d tmamkt lli s ar iẓṛa tudrt ar srs issfru tumant nna iẓṛa afgan izayku g uzmz nns,ma ann ar t nlkkm nkkʷni tarwa wass ad s tzmmar nnɣ d tuggas lli nbiks afad ad nals tiɣri d urmas g tussna nnɣ d wamun nnɣ akkʷ.