Adbni
Adbni (Amagut: Idbnan) iga yan wanaw n ismḍal ittyawssan dar imaziɣn slawan dar Itwargin lliɣ d ur ta yucki Lislam, ɣwid naḥya tn inn d ismḍal n imuslmn, acku umẓn talɣa n uṣkka niɣ d tin twarayt (agudi n iẓṛan) da ittrusn ɣ iggi wakal afad ad d ldin taynit n mddn, zlmn tn.
Ɣ dar Ihggarn ism n idbnan iwats yat twrirt niɣ d yan wanfa imẓẓiyn.[1]
Isnubbucn n wanaw ad n iṣmḍal mqqar d tidrsi nnsn sniln tawngimt n tqbuṛi n idbnan, ukan bbin awal is ar d ttiwrrin s uzmz yaggugn lli izwarn Lislam, kra gisn aḍun akkʷ ar akud n 3100 zwar n tlalit zun d ɣwalli n wansa n Lunniy, yili daɣ win Ulbṛj n Badji Mxtaṛ ɣ Ddzayr d ittaḍun s usggʷas 2800 zwar n tlalit, ilin akkʷ wida ur bahra maṭlnin.[1]
Adbni ɣ taflst Tamaziɣt[ssnfl | Snfl asagm]
Idbnan zdin d kra n tmyurin n tqddact dar imaziɣn n zikk, zun d tamyurt n usguṭṭi lliɣ tt inn kkan ar ggann ɣ iggi n idbnan-ad niɣ ar ggann ɣ tama nnsn afad ad asn ittqafa ma rad ijṛu ɣ imal ɣ twargiwin nnsn, ukan mayad ibdr tt Iṛuḍutt lliɣ isawl f yat tamtti Talibiyt ism as "Inasamunn" inna fllatsn awal ad: "Bac ad salan taqddact, ar ttddun s dar tuṣkiwin n imzwura nnsn, gnn fllatsn kiɣ nnan kra n iri, ssadmrn i ɣaylli ẓṛan ɣ twargit". [1]
kkuẓt n tasutin f Iṛuḍutt, Bumbunyus Mila rad ibdr tamyurt ann nit dar taqbilt Talibiyt n Wawgila illan ɣ ugafay utrim n tmazirt n Libya (Ar sawaln Tamaziɣt ar ɣass ad nit sul) .
Tamyurt ad tɣama ur tnfil dar Itwargiyn.[1]
