Ayt Ṣwab
Tiqbilin n Ayt Ṣwab gant yan mnnaw n tqbilin tisusiyin munin ddu ism n Tmunt n Tqbilin n Ayt Ṣwab, Tamunt ad tetabɛa ula nttat i Tiqbilin n udrar lli illan ɣ Tmunt n Tqbilin n Wactukn Imqqurn. Ɣ iwtta n tqbilt ad ɣ ugmuḍ ar nttafa taqbilt n Ida Ugniḍif d tqbilt n Ammln, ɣ ugafa ar nttafa taqbilt n Ayt Tidli, ɣ umalu ar nttafa taqbilt n Ayt Ḥmad d taqbilt n Ida Ursmuk, ɣ iffus ar nttafa taqbilt n Ida Usmlal.[1]
Illa ma ittinin mas d Ayt Ṣwab gan aqbil yumyn mnnawt tqbilin. Yili ma issmrasn ism n "macyaxa" (مشيخة) i tqbilin ad igan ɣ Ayt Ṣwab. ism n "fraction" ɣd ntta ittwasmrs lliɣ tt nn kkan Ayt Ṣwab ddu tnbaḍt n Fṛansa.
Iskr yan ufṛansis ism nns Jean Podeur yan udlis s taclḥit d tafransist isman gis imikk n tskla tamiwant n Ayt ṣwab. Adlis ad iga s ism "Textes berbères des Aït Souab (Iḍrisn Imaziɣn n Ayt Ṣwab) "
Tiqbilin n Ayt ṣwab
[ssnfl | Snfl asagm]
Tqbilin n Ayt ṣwab gan:
- Taqbilt n Isaggn
- Taqbilt n Tudma
- Taqbilt n Ayt Ɛin
- Taqbilt n Ayt Wikman
- Taqbilt n Ayt Yaḥya
- Taqbilt n Ayt Uɣan
- Taqbilt n Tiwazwin
- Taqbilt n Imdiwn
- Taqbilt n Imkwin
- Taqbilt n Ayt Baḥman
- Taqbilt n Inḍrifn
Taskla
[ssnfl | Snfl asagm]Tinfusin
[ssnfl | Snfl asagm]Aclḥiy d waɛrab
[ssnfl | Snfl asagm]Gmrn yan uclḥi d yan waɛrab, amzn yat tskkurt d yan waɣuct. Lliɣ tn umzn, inna waɛrab lli uclhi : « Bḍu yanɣ tagwmrt-ad. » Inna yas uclḥi : « Ssgrfɣ ak : ad asiɣ taskkurt, tasit kiyyi waɣcut, nɣ d at tasit waɣcut, asiɣ taskkurt, aynna trit. » Ar ittals i wawal-ann, aylliɣ inna-yas waɛrab-lli : « Ac ka tgul a had lqrufi ? Wllah, mul had ccttab a ma nddih ! »
Imikr d bab n tgmmi
[ssnfl | Snfl asagm]Idda yan imikr ikcm s tgmmi n yan urgaz ɣ yid. Ur gis illi ma ittakr abla tumzin. Bab n tgmmi izr at lliɣ n ikcm s tgmmi. Ifss, ur as-inni yat. Ikks imikr aqccab nns, iɛmmr-t s tumzin, isrs t. Iddu ar ittmurruy ɣ tgmmi is ra yaf kra n tɣawsa yadnin. Bab n tgmmi yusi aqccab n imikr lli iɛmmr s tmzin, ihḍu-t ɣ yan lmakan. Lliɣ d yuḍa imikr ur d yufi yat, yaf d aqccab lli lah-t. Iddu a iffuɣ ɣ imi. Inna yas d bab n tgmmi : « Iɣ tffuɣt, tqqnt imi. » Inna yas imikr : « Skar asn ɣikad, ad akk ur tqqnt imi. »
Hgglɣ ak ttin
[ssnfl | Snfl asagm]- Tjiyyr ur tli imi : Taglayt
- Iɣ idda ag afqir, iɣ d yuda ig aɛzri : Ayddid
- Krad krad ar ihahan : Inkan
- Ar ttshkuk, tɣli d ignna : Taknarit
- Sin ismgan bksn bdda : Agdur t tsksut
- Iɣzzif ur ittif asklu : Aɣaras
- Turu tn tg tn ɣ wukris : Tissit
- Turu tarwa, tg tn ɣ ijjbirn : Ikrmudn
- Iɣzzif, tugwrt tzuknnit : Aɣaras
- Yussi taskimt, ar izzigiz : Iɣirḍm
Nnan willi zrinin
[ssnfl | Snfl asagm]- Wanna iɣran i waḍu ur a yalla i walim.
- Wanna iran tinɣdin izzl asnt iḍarn.
- Ur ak ikwmz inna k iccan, abla afus nnk.
- Wanna iɣwra i ṭṭelba iɣr i sslukt ur a ismummuy s ugwns n tmklit.
- Takat ur a ttasi tayyaḍ.
- Tamart ur a ttjara i tayyaḍ.
- Wanna iran tid mmimnin iṣbr i tid rẓagnin.
- Aynna ɣ isbr yan, ifulki gis.
- Wanna ur irin a iṣbr, ira yzbr.
- Afhim ifhm, aɣyul ifrd alim.
Ilinkn yaḍn
[ssnfl | Snfl asagm]- Fuṛum ayt ṣwab, yan fuṛum ibdan ɣ 2007 (irwas), ar yadlli git ttmyawaḍn ayt ṣwab, illan ɣ tmazirt wala ɣ bṛṛa nns. ɣilad ur sul bahra gis illi umussu.
Idlisn
[ssnfl | Snfl asagm]- Yasmin Lbaz, Tiram n Tmazirt - Taqbilt n Ayt Ṣwab
- Jean Podeur, Textes berbères des Aït Souab (iḍrisn imaziɣn n ayt ṣwab)
Isaɣuln
[ssnfl | Snfl asagm]- ↑ Tiqbilin n Sus : https://web.archive.org/web/20200803230136/http://www.tribus-de-souss.tk/2008/11/blog-post_4286.html
- Taskla - iwalian ddrin n Ayt swab (Alink nns)
- Taskla - hgglgh ak ttin n Ayt swab (Alink nns)
- Taskla - Contes n Ayt swab (Alink nns)
- Jean Podeur, Textes berbères des Aït Souab (iḍrisn imaziɣn n ayt ṣwab)