Intan
| Intan هنتاتة | |
|---|---|
| Yan umqqun n tqbilin | |
| Taytnit | Imaziɣn (Imẓmudn) |
| Demonym |
Inti (asuf) Intan (amagut) |
| Tisḍwin | Iɣiɣayn, Ayt Lmzdur, Ayt Tagʷrtant, Ayt Tlkawwutin, Ayt Tlurit, Ayt Tumsidin, Ayt Wawzgit, Ayt Yiɣz, Ayt Amzal, Imsfiwn |
Intan (s tɛṛabt: هنتاتة) kkan tt inn gan yan umqqun n tqbilin timaziɣin, yamu umqqun ad ɣ iqbiln n Imẓmudn n Udrar n Drn ɣ Lmɣrib. Ttyussann ɣ umzruy f tdusi tasrtant lli yadda lan ɣ tsga n Mṛṛakc gr tasut tis 12 d 16. Acku uwsn i imuwḥḥidn ad ɣʷlin s tnbaḍt, ɣaman bdda Intan akmurn i igldan Imuwḥḥidn. Ɣ uzmz n uwank n Ayt Mrin, umẓn yat tsga, ar as ttinin Adrar n Intan (جبل هنتاتة) ɣ Udrar n Drn, tsul tnbaḍt nns tẓli sisn ar tuddma n tasut tis 16. Gan Ayt Faṣka (Iḥfṣiyn) da nbḍnin Tuns ayyawn n Intan.
Tiṣḍwin?[ssnfl | Snfl asagm]
Ikka tt inn uqbil n Yintan ila tẓat tṣḍwin, ad tn igan d Iɣiɣayn, Ayt Lmzdur, Ayt Tagʷrtant, Ayt Tlkawwutin, Ayt Tlurit, Ayt Tumsidin, Ayt Wawzgit, Ayt Yiɣz, Ayt Amzal, Imsfiwn.
Azmz amuwḥḥid[ssnfl | Snfl asagm]
Kcmn intan asays n umzruy ɣ tuddma n tasut tis 12 lliɣ bddn Imɣarn nnsn mqqurnin, Wanudin U Yansilt, Namir U Dawd, Abu Magalifa d Faṣka U Mzal d Lmhdi u Tumrt amuwḥḥid zɣ 1123. Isbadl ilmma ism n umggaru, Faṣka, s ism n yan ɣ ismunn ttyussanin n isr/umazan anslm Muḥmmad, yaws i trnawt n imuwḥḥidn ddaw yism ad amaynu lli igan Abu Ḥafṣ Ɛumar Bn Yaḥya, yamẓ kra n trsutin stawhmmanin ɣ tnbaḍt nnsn, ig amawas akkʷ yaẓn i lxlift Ɛbdlmumn aylliɣ immut ɣ 1181. Amɣar ad n Intan, Bu Ḥafṣ Ɛumar, ad igan daddas n Iḥafṣiyn (Ayt Faṣka)—Ayyaw nns Abu Zakariyya Yaḥya ad isrsn tirsal n uwank nnsn, ig anbbaḍ n Tuns zɣ 1224, lli ɣ ɣaman am uwank ilan tasimant nns zɣ 1229 ar 1573.