Lalla Ɛziza

Lalla Ɛziza tasksiwit niɣ d Lalla Ɛziza tagʷrramt tga Ɛziza ult Brahim yat tgʷrramt ssɣ idrarn n isksawan ɣ udrar n Drn, sɣ takat n ayt Ɛli, yat twja Tasusit ɣ laṣl nns, ur bdrn iɣbula mad iga usggʷas n tlalit nns, macc mcuckan d is tddr ɣ uzmz n tnbaḍt n Imariniyn, ɣ tasut tis 13 n tlalit, akud lli issn udrar n Drn kra n isnfal dranin ḍfṛ taḍuṛi n uwank Amuḥdi. Ttyawssan tmɣart ad is d nttat ad iwafqn gr Bu Ɛamir Inti lli iswuriyn ddu uknyal Amarini d ugllid nns BuƐnan Amarini, d ugllid Ɛbdllah Asksiwi.

Tudrt nns

Ɣ yat tizi ɣ tudrt nns, tmmudda Lalla Ɛziza s ugmmuḍ n tmazirt nns s tutra n tawssna, tlkm ɣ umuddu nns tiɣrmt n Tlmsan, tamẓ gis tawssna d tṣufit ɣ ufus n waggag Abu Madyan Al-Ɣawt (509-594z). Tiwrri d ilmma s tmazirt nns tg gis taggagt d tṣufawt ar d ɣinn tssfrak middn, slawan akkʷ taytcin, ar tettrra f wastann nnsn s ussnẓu d tfrsi. Ar fllas ttmunan mddn afad ad dars ttagmn, awin d asnimmr nns d tajjult (lḥkma) nns, d ussfsi n imukrisn d taẓit nnsn. Ar ttalsn iɣbula f usnimmr nns ittyawssann, slawan akkʷ ɣ tɣawsiwin n tfsasayt, is akkʷ d tssufɣ aman sɣ umadl n udrar lliɣ fllas smummin mddn irifi d tadrsi n unẓaṛ. Ismun Ibn Qunfud Al-Qusanṭini irfsan akkʷ n Lalla ɛziza tagʷrramt.

Ẓṛiɣ gisn ɣ Lmɣrib ɣ imisi n Isksawan d yuckan ɣ udrar n Drn ɣ yan wansa mi ismn Taqihrat (tga yat tɣrmt ittyawṣkan ɣ usggʷas n 754 Z / 1353 L ɣ idis n Iludjan ɣ Isksawan), tagʷrramt Ɛaziza Tasksawit, ssutrɣ asnimmr nns, giwrɣ dids, tftu ad tssmsasa gr snat tgrummawin mqqurnin. Tla imḍfaṛn ɣ irgzan ula ɣ taytcin. Kraygat tarabbut tsniri tt s udmar d tissumga. Ittyawskar as yan ugiṭun ɣ tuẓẓumt ɣ tama n yat tgrumma n taytcin. Ur illi ma ittmussun aysladd s wanaḍ nns. Iɣ tgawr d mddn, ar fllas tzafl s yan unsraf, ur ar tettajja maɣ ad tettyawmnad. Tg nit yat tdiwant ɣ tmrarutin nns ɣ ussfrk nns ɣ wanaḍn nns. Ẓṛiɣ mddn ar fllas ttmdurrin. Ur ẓṛiɣ ma ilggʷaɣn f wawal nns ɣ usqsi f waddad. Tla yat tikki ttywassanin. Issuda s dars unmɣur ittyawssann bab n Mṛṛakuc Ɛamir u Muḥmmad Inti. Ikka dids ma iggutn, inna yyi,

Tikkiwin nns

Yuls Brahim u Bihi yan unmɣur n Ugdmt ɣ tsga n wasif lmal, is d tagurramt ad tẓḍṛ i ingmarn d id mafawal (inḍḍamn), wanna iran ad ilmd urarn d umarg ar ittddu s tizaɣct (lqbt) nns, ar gis yaqrus i igimi nɣ d abukir iḍlan.

Ar inssa tama n tmḍlt n tgʷrramt, ar isrus tallunt niɣ d rribab ɣ iggi nns, ar gis ictta zzbib, ar tn ittasi s ixfawn n tsmit, iɣ as tfka tgʷrramt amarg issyafa s kra ar as ittnukkul ɣ taqqayt nns zun d tuṭfin, iɣ iffu uzmz tṣifḍt tgʷrramt iga anḍḍam, imma ingmarn ar srusn iburiyn nnsn ɣmklli skarn inḍḍamn.

Ɣ tmḍlt n Lalla Ɛziza ar skarn mddn tamyurt n udbni.

Ism n lalla Ɛziza ar t addran tfqqirin, "A Lalla Ɛziza!" Iɣ ẓṛant kra n tɣawsa issbhaḍn.