Muriṭanya

Iɣ ur igi wad amgrad lli tsiggilt, kcm s tasna n Muritanya bac ad tẓrt akkʷ imgradn nna dar illa yism zun d wad !

Muritanya nɣ d Mawritanya tga yism n yat tgldit tamaziɣt tkka-tt-inn ɣ mad izrin ɣ ugafa utrim n udɣar nna mu nttini ɣilad ism n Tamazɣa. Tuckad zɣ talatint Mauretania nɣ d Mauritania. Dar igrikiyn iqburn tkka-tt-inn tga s yism Murusya, Maurusia - Μαυρουσῐ́ᾱ.^[1] Igr arakal lli s tinn tkka tɣʷit ɣ-akud-ann tgldit ad ar itbddal zɣ tasut s tayyaḍ. Ɣ uzmz n ugllid Bukus wis-sin^[2] tkka-tt-inn tgldit ad tɣʷi akal zɣ agaraw anaṭlas ar ugmuḍ n Dzayr. Ttussann ɣ-akud-ann imuriṭanyn dar irumiyn d igrikiyn s yism n Imuriyn (s tanglizt: Mauri).^[3]

Gr Tamawt: Tirra n Muriṭanya s uskkil n "ṭ" ad is naḥyan tagldit tamaziɣt ad af nsawal ɣilad d tmazirt n Muritanya lli illan ɣ iffus n Lmɣrib. Mqqar ṭṭafn s sin-itsn ismawn mrwasnin ur illi gratsn awd yat tazdayt, acku mqqar iwtta n tgldit ad taqburt ur bahra baynn ɣ iffus, micc ur jju lkmn iffus n idrarn n Waṭlas d idɣarn lli ɣ tlla tamdint n Mrrakc ɣilad. Tmazirt n Muritanya n ɣila ɣar ifransawiyn ka ad as-igan ism ann lliɣ tt stɛmrn, micc ɣ mad izrin tkka-tt-inn ttussan s yism n tmazirt n Cngiṭ.

Aẓur n yism

Ikka-d yism ad n Muriṭanya ism alatin lli d sxddmn irumiyn s usint z darsn igrikiyn iqburn, lli tn ikkan ar saghasn tasga n ugafa n Lmɣrib s Murusya (s tagrikt taqburt: Μαυρουσῐ́ᾱ), d imzdaɣ nns s Murusyus (s tagrikt taqburt: Μαυρούσιος) d ɣid ad ikka yism alatin n Muri (Mauri) lli gan i aɣrf n Imuriyn. Llan kraḍ turdawin igjdan imqqurn f aẓur n yismawn ad:

Aẓur Agrik, zɣ Mawrus nɣ Mavrus (μαύρος) lli d ilan anamk n Asggan.^[4]
Aẓur Afuniq, zɣ Muharim, lli isnamkn: Akal lli d illan ɣ utaram nɣ ɣ tigira n umaḍal.^[5]
Aẓuṛ Amaziɣ, zɣ Amur nɣ Tamurt, lli ilan anamk n Tamazirt.^[6]

Isaɣuln

↑ The Geography of Strabo- The Geography of Strabo. Ittuyẓra ass n 27 Jwiyyi 2020.
↑ Phillip C. Naylor (7 May 2015) - Historical Dictionary of Algeria. Rowman & Littlefield Publishers. p. 376. 978-0-8108-7919-5
↑ "Region, North Africa"- Encyclopedia Britannica. August 9, 2007
↑ George Leighton Ditson. The Crescent and French Crusaders (s tanglizt). p. 122
↑ Gabriyil Kamp (2007). Les Berbères (s tanfransist). Babel
↑ Amawal n wantirnit- Asinag Agldan n Tussna Tamaziɣt.

[1] The Geography of Strabo- The Geography of Strabo. Ittuyẓra ass n 27 Jwiyyi 2020.

[2] Phillip C. Naylor (7 May 2015) - Historical Dictionary of Algeria. Rowman & Littlefield Publishers. p. 376. 978-0-8108-7919-5

[3] "Region, North Africa"- Encyclopedia Britannica. August 9, 2007

[4] George Leighton Ditson. The Crescent and French Crusaders (s tanglizt). p. 122

[5] Gabriyil Kamp (2007). Les Berbères (s tanfransist). Babel

[6] Amawal n wantirnit- Asinag Agldan n Tussna Tamaziɣt.

[1]

[2]

[3]

[4]

[5]

[6]