Ayt Yaflman

Ayt Yaflman (s Tfinaɣ : ⴰⵢⵜ ⵢⴰⴼⵍⵎⴰⵏ ayt ɣwalli yufan laman), gan yan umqqun Amaziɣ da ittamẓn attayn n Waṭlas imqqurn n usammr d kra n tsgiwin tama n Tfilalt. Tamaẓunt nnsn tga tt Imlcil.

Tutlayt nnsn d tamaziɣt n wammas n Lmɣrib. Amqqun n Ayt Yaflman ibḍa s kkuẓ iɣsan: Ayt Ḥdiddu d Ayt Mrɣad d Ayt Izdg d Ayt Iḥya. Ar ttinin f iguyya nnsn is gan Iẓnagn.

Amzruy

Lliɣ ur ta illi umqqun

Ayt Yaflman kkan ma izwarn tasut tis 16 ɣ iffus n Waṭlas Amqqur n usammr, ɣ Tudɣa d Ɣiɣis d wasif n Dads d Imdɣas d tugg Ziz. Sɣ tasut tis 16, ssurfn izilaln n udrar n Uɛyaci d win Mɛṣkṛ afad ad azzrn ɣ tmazirt iflin da ɣ llan ɣikkad.

Tilit n umqqun n Ayt Yaflman

Ayt Izdg d Ayt Mrɣad d Ayt Ḥdiddu d Ayt Yaḥya lkmn ɣ 1645-1646 ad skrn ɣ wagns n zzawit n igʷrramn n Wassul, yan igmrbbi n turfa gr Ayt Yaflman. Ikka tt inn iga yan umqqun ɣ fkant tqbilin tamasayt n waray i igʷrramn n Wassul lli ganin tarwa n Sidi Bu Iɛqub. Arra ad, ɣmklli s inna Lɛrbi Mzzin, isrs tiwisi n Ayt Ḥdiddu ɣ ixf n tqbilin n umqqun ad. Tili ddu unzal n igʷrramn n Iɛalawiyn n Tfilalt, turfa ad tettyawskar afad ad tzbdr i unɣal n zzawit tadilawt ɣ yat tsga, tjmjdawl nit anɣal n Ayt Ɛṭṭa sɣ yat tsga yaḍnin lli d mmaɣn Ayt Izdg tasut tis 18 ula tis 19.

Iwtta

Tiwisi ad n ayt Yaflman tsɣummr mnnawt tqbilin yaḍnin ad tnt igan d:

• Ayt Ɛṭṭa ɣ Lqblt,
• Ayt Sxman ɣ tagut,
• Ayt Mgild ɣ iẓẓlmḍ,
• Ayt Yusi d Ayt Lḥajj ɣ iẓẓlmḍ n ugmmuḍ
• Ayt Sɣruccn ɣ ugmmuḍ

Imnɣi n Tzizawt

Lliɣ kcmn isrdasn n Fransa s tmntilt n tarayt d tutra n ugllid, ɣ Tunfit, yan ugudi n imknasn sɣ mnnawt tqbilin zun d: Ayt Sidi Yaḥya U Yusf d Ayt Sidi Ɛli, Icqirn, Ayt Ihand, Ayt Ɛmr, Ayt Sidi Ḥsayn (Aɣbala), Ayt Ḥnini (Tikajwiin) d Ayt Ḥmmu Ayt Ɛica, Ayt iḥya d Ayt Suxman d Ayt Ḥdiddu da d igli ugrram n Sidi Amhawc, ffuɣn s udrar n Tzgzawt ɣ urggal n wayyur ɣuct 1932 ɣ imisiwn n ulmu n idgl. Imnɣitn cddanin kkan kraḍ imalasn, d uzbdr ittyalaɣn n imaziɣn rad ifḍḍu assf n 13 Cutambir 1932 tigira n imnɣi n tzgzawt da iḍfṛn tiṛẓi n Umhawc.