Arratn imaziɣn iqburn
Arratn imaziɣn iqburn gan arratn ittyuran s tutlayin timaziɣin ɣ uzmz anslm ɣ tmizar n tfrqit n ugafa s ugʷmmay amaziɣ aɛṛab lli d itturḍaln zɣ tɛṛabt. Amata n warratn ad zdin d usgd, aslmd d tsrtit. Tugt n warratn ad ttyuran ɣ ugzzum utrim n tmazɣa, slawan akkʷ ɣ tmazirt n Sus.[1] Mqqar bdrn iɣbula imzrayn kra n idlisn dat n wad, arra aqbur akkʷ ittyussann ar ɣil d Kitab Al-Barbariya lli iẓḍaṛn ad ittyura g tasuta tis 10. G utaram n tmazɣa, arra aqbur akkʷ d "Kitab Al-asmaa" n Ibn Tunart lli ittyuran g tasuta tis 12.
Amzruy[ssnfl | Snfl asagm]
Ḍart n ukcam n lislam d tutlayt taɛṛabt s tamazɣa, ufan nn imaziɣn is fllasn iga ccil ad sslkmn tiɣlaf n usgd i ugdud, aya a f ssntan ar ttaran, ar ssuɣuln s tamaziɣt. Nnig n aya, illa mad yuran i tmntal tisrtanin zun d Bn Tumrt, limam n imuwaḥḥidn[2].
Iɣ niwi f aylli bdrn kra n isugam imzrayn, rad ig “lqqʷran” n Ṣaliḥ Bn Ṭarif (tuddma n tasuta tis tamt), 'amazan' n iburɣwaṭn, adlis amzwaru nna ittyuran s tmaziɣt s ugʷmmay aɛṛab.[3][4][5] Lqqʷran ad amaziɣ ur aɣ d zgis lkimnt amr tisuɣal n kra n twinas s tɛṛabt.[2] Ar aɣ addran isugam mas tt inn ikka yan yaḍn g tmazirt n Iɣumarn, ɣ tgira n tasuta tis tẓat, iga ism nns Ḥamim Bn Manna, isrs asn dɣ nttan yan “lqqʷran” s tmaziɣt.[6]
G tasuta tis snat d mrawt, yara Bn Tumrt mnnaw idlisn bac ad izuzzr tiwngimin n uẓgʷr nns asrtan gr imṣmudn lli bahra ur issinn i tɛṛabt. Llan ɣ udlis nns lli mi ism “Attawḥid” sa n igzzumn (laḥzab), inna asn ad aqqran yan ugzzum kraygat ass ḍart n tɣri n lḥizb, ilin kra n isugam ar ttalsn is asn inna ad t akkʷ ḥsun aylliɣ darsn yurri zun d lqqʷran, wanna t ur iḥsin zun iɣ ikfr. Bdrn daɣ isugam sin idlisn yaḍnin, “Alqawaɛid” d “Liama”;[7][8] sin itsn llan gr ifassn n mddn ɣ wakud ann, maca ur aɣ d ilkim walu zɣ idlisn ad.[2]
Lmazɣi[ssnfl | Snfl asagm]
Sɣ uzgn wis sin n tasuta tis 12 ar tasuta tis 20, tbayn d twrglat n tirra lli mi aqqran “Lmazɣi”. Tawrglat ad tẓli ɣ umata s usgd, izrfan, id msmun awal isinutlayn, mad ittyussann g tsnijjit, akud, tsnitrit d usiḍn. Awttas n twrglat ad iga t usutti ddaw n tɣlaf n usgd anslm d ushwn n ulmmud n imḥḍarn d wid ur iɣrin (lɛawamm), ukan ayann a f gan ɣ umata tanḍḍamt irxan i uḥssu.[9]
Yan zɣ lfqha lli tt inn ikkan da ittnɛaṛ f wanaw ad n tirra, Brahim Bn Ɛbdllah Aẓnag, yura maya g udlis nns "lmazɣi":[2]
- Mani x swa yan issnn kra d yan ijhlni
- Ur swa yazal d yiḍ; lɛilm iga nnuṛi
- Yan ur izḍarn i lɛaṛabi ad tn ifhmi
- Iɣr lmazɣi lɛwam; illa gisn lbayani
Ilin g yat tizi kra n middn gan mgal n maya, irar fllasn Brahim Aẓnag s mk ad:[2]
- Mani ɣ illa ɣ lktab innan ur izri i yan
- ad iml ddin n ṛbbi i laqwam s lmazɣi
- Is ur iṭṭaf rasulu llah ttṛjman
- Willi ttbyannin aɣaras i ladamyyin
- Ku yan mlin as aɣaras s wawal da sa
- Isawal ur as nnin mḥtum n lɛṛbya
Ilin imdyatn zɣ warratn ad nna immaln awttas nnsn:
Al-Madani Ben Mohammed At-Tuɣmawi:[10]
- A lbari taɛla, ɛawn iyi; riɣ ad d nawi
- Awal lli inḍm ibnu ɛacir daɣ(i)
- S wawal , tclḥiyt, ad nit gis ifhm yan(i)
- Igan lummi, ad akkʷ daɣ ur ijhl ddin(i)
Aḥmad at-Tamil:[11]
- Yan ur issinn taɛṛabt ad srs ifhm ɣ lqqʷran(i)
- Ula lḥadit, ar yaqqra lktub n imaziɣn(i)
- Zun d amaziɣ n Sidi Mḥmmd U Ɛli akʷbil(i)
Tigrummawin titrarin[ssnfl | Snfl asagm]
Ssntan imrzzutn imẓrmaziɣn ar ttggan iɣf nnsn ɣ warratn imaziɣn zɣ tasuta tiss 19,[12] lliɣ yad ibda usdurri afṛansis. Sɣin imrzzutn zun d J.D. Delaporte d H. Stumme d wiyyaḍ arratn i tsdlisin n tsdawiyin nnsn, aya ad aɣ ifkan mmnawt tgrummawin n warratn imaziɣn ass ad, nẓḍaṛ ad zgisnt nbdr tid:
- Tagrumma n "Le Fonds Roux" g tmdint n Aix-en-provence;[13] ismun tt Arsène Roux lliɣ izdɣ g Lmɣrib (1920-1956).
- Tagrumma n tsdawit n Leiden.[14][15].
- Tagrumma n tsdlist tanamurt ɣ bariz.[16]
- Tagrumma n tsdlist tamatayt g ṛṛbaṭ.[17]
- Tagrumma n tmrslt n ugllid Ɛbd Lɛziz Al Sɛud (مؤسسة الملك عبد العزيز آل سعود) g tgmmi tumlilt.[18]
Ilint tiyyaḍ illan ɣ tilit tusligt.
Isaɣuln[ssnfl | Snfl asagm]
- ↑ Saadouni, Mohamed, et Harry Stroomer. « Tashelhiyt berber manuscripts in Arabic characters: an update », Études et Documents Berbères, vol. 42, no. 2, 2019, pp. 193-200.
- ↑ 2,0 2,1 2,2 2,3 et 2,4 الوافي نوحي، "لمحات عن الرصيد الأمازيغي المکتوب. التراث الأمازيغي المخطوط بالمغرب: نظرات في النشأة والتطور"، مجلة المناهل، العدد 100 (2020): 46-21.
- ↑ أبو عبيد الله بن عبد العزيز البكري الأندلسي، المغرب في ذكر بلاد إفريقيا والمغرب، نشر البارون دوسلان (الجزائر: مطبعة الحكومة العامة، 1857)، 141-134.
- ↑ أحمد الطاهري، المغرب الأقصى ومملكة بني طريف البرغواطية خلال القرون الهجرية الأربع الأولى (الدار البيضاء: مطبعة النجاح الجديدة، 2005).
- ↑ إبراهيم حركات، "برغواطة"، معلمة المغرب الجزء 4 (الرباط: الجمعية المغربية للتأليف والترجمة والنشر مطابع - سلا، 1991)، 1165-1170.
- ↑ البكري، المغرب، 100.
- ↑ مجهول، الحلل الموشية، 109-110.
- ↑ ابن الطان المراكشي، نظم الجمان لترتيب ما سلف من أخبار الزمان، تحقيق محمود علي مكي (بيروت: دار الغرب الإسلامي، 1990)، 129.
- ↑ Elmedlaoui, Mohamed. « La tradition ‘almazghi’ dans le Sous (Maroc) : caractéristiques linguistiques et fonctions socioculturelles du code », Études et Documents Berbères, vol. 35-36, no. 1-2, 2016, pp. 243-262.
- ↑ Boogert, N. and Hawzālī, M., 1997. The Berber literary tradition of the souls. Leiden: Nederlands Instituut voor het Nabije Oosten, p.48.
- ↑ Boogert, N. and Hawzālī, M., 1997. The Berber literary tradition of the souls. Leiden: Nederlands Instituut voor het Nabije Oosten, p.41.
- ↑ Ali Amahan, Notes Bibliographiques Sur Les Manuscrits En Langue Tamazight Écrits En Caracrtères Arabe
- ↑ Boogert, N., 1995. Catalogue des manuscrits arabes et berbères du Fonds Roux (Aix-en-Provence). Aix-en-Provence: IREMAM.
- ↑ Boogert, N. (2002). Catalogue of Berber Manuscripts in the Library of Leiden University. Amsterdam University Press.
- ↑ El Mounadi, Ahmed. « Les manuscrits amazighes non catalogués dans la bibliothèque de l’université de Leiden [*] », Études et Documents Berbères, vol. 35-36, no. 1-2, 2016, pp. 217-241.
- ↑ Galand-Pernet P., 1973 – « Notes sur les manuscrits à poèmes chleuhs du Fonds berbère de la Bibliothèque Nationale de Paris », in Revue des Etudes islamiques XLI/2, p. 283-296.
- ↑ Galand-Pernet P., 1972 – « Notes sur les manuscrits à poèmes chleuhs de la Bibliothèque Générale de Rabat », in Journal Asiatique, p. 299-316.
- ↑ Qādirī, M., Āyit Bilʻayd, A. and Qībāl, ʻ., 2005. Fihris al-mah̲ṭūṭāt al-ʻarabiyyaẗ wa-al-amāzīġiyyaẗ. Al-Dār al-bayḍāʼ: Muʼassasaẗ al-malik ʻAbd al-ʻAzīz.