Agʷmmay amaziɣ aɛṛab

Agʷmmay Amaziɣ-Aɛṛab iga yan wanaw n ugʷmmay aɛṛab nna s tt inn kkant tutlayin timaziɣin ar ttyurant zg tasutin timuẓunin g tmizar n tmazɣa, s lawan akkʷ ɣ tmazirt n iclḥiyn ɣ unẓul utrim n lmɣrib.^[1]^[2]

Amzruy

Ḍaṛta n ukcam n lislam d tutlayt taɛṛabt s tamazɣa, ufan nn imaziɣn is fllasn iga ccil ad sslkmn tiɣlaf n usgd i ugdud, aya a f ssntan ar ttaran, ar ssuɣuln s tamaziɣt. Nnig n aya, illa mad yuran i tmntal tisrtanin zun d Ibn Tumrt.^[3]

Iɣ niwi f aylli bdrn kra n isugam imzrayn, rad ig “lqqʷran” n Ṣaliḥ Bn Ṭarif (tuddma n tasuta tis tamt), isr n iburɣwaṭn, adlis amzwaru nna ittyuran s tmaziɣt s ugʷmmay aɛṛab. Lqqʷran ad amaziɣ ur aɣ d zgis lkimnt amr tisuɣal n kra n twinas s tɛṛabt.^[3]

Ar aɣ addran isugam mas tt inn ikka yan yaḍn g tmazirt n Iɣumarn, g tgira n tasuta tis tẓat, iga ism nns Ḥamim Bn Manna, isrs asn ula ntta yan “lqqʷran” s tmaziɣt.

G tasuta tiss snat d mrawt, yara Ibn Tumrt mnnaw idlisn bac ad izuzzr tiwngimin n uẓgʷr nns asrtan gr imṣmudn lli bahra ur issinn i tɛṛabt. Llan ɣ udlis nns lli mi ism “Attawḥid” sa n igzzumn (laḥzab), inna asn ad aqqran yan ugzzum kraygat ass ḍart n tɣri n lḥizb, ilin kra n isugam ar ttalsn is asn inna ad t akkʷ ḥsun aylliɣ darsn yurri zun d lqqʷran. Bdrn daɣ isugam sin idlisn yaḍn, “Alqawaɛid” d “Liama”, sin itsn llan gr ifassn n mddn ɣ wakdu ann, maca ur aɣ d ilkim walu zɣ idlisn n Ibn Tumrt.^[3]

Sg uzgn wis sin n tasuta tis 12 ar tasuta tis 20, tbayn d twrglat n tirra lli mi qqarn “Lmazɣi”. Tawrglat tẓli ɣ umata s usgd, izrfan, id msmun awal isinutlayn, mayd ittyussann g tsnijjit, akud, tsnitrit d usiḍn. Awttas n twrglat ad iga t usutti ddaw n tɣlaf n usgd anslem d ushwn n ulmmud n imḥḍarn, ukan ayann a f gan t ɣ umata tanḍḍamt irxan g uḥssu.^[3]

Tizi tamuẓunt

Ilugnn

G tɣuri n Nico Van Den Boogert (2000),^[4] Imdyatn iqburn akkʷ n usnmarra n tasutin timuẓuninɣ Sus gan zɣ tasuta tis 10 (ḌL), gin imggura akkʷ zɣ tis 14 (ḌL).

Mqqar nẓḍaṛ ad naf kra n inuḥyutn g usmdya n kra n trgalin, da ittɣama usnmarra ad iga armskil. Maya da immal is d willi srsnin angraw ad swingmn gis zwar mzyan bac ad sis sslmadn i imssiwln s tmaziɣt. Arratn iqburn a ɣ ar nttafa tillugna akkʷ imqqurn.

Iɣritn

Ɣ umata n warratn, tiguriwin da tggant tigaɣranin akkʷ nɣ. Da isnuḥyu usnmarra gr kkuẓ iɣritn: ‘’a’’, ‘’i’’, ‘’u’’ d ‘’e’’ (aɣri afssas nɣ acfa). Iɣritn ‘’a’’, ‘’i’’ d ‘’u’’ da ttyuran s Ḥurūf al-madd (حروف المدّ), imdyatn:


	Alatin/Tifinaɣ
تاسافت	tasaft
تيزنيرت	tiznirt
تولوليت	tululit

Ɣ usnmarra arimɣr, aɣri anammas e (aɣri afssas) ur ar ittyura ɣ tuẓẓumt n tguri. Yiẓḍiṛ uɣri afssas ula ad yili ɣ tfirin ṛẓmnin:


	Alatin/Tifinaɣ
تامماشت	tamemmact
تاسلت	tasselt
يلودى	yeludi

Ɣ usnmarra imɣr, aɣri afssas ar bahra ittyura s Fatḥa. G kra n warratn yaḍn s Kasra.

Iɣritn n tuddma n tguri

Kra n idlisn tettyura gisn i- d u- s alif-mamduda nna tḍfṛ yāʼ nɣ wāw. Amsli a- g tuddma n tguri da ittyura s alif-mamduda nna iḍfṛn hamza ittyagaln, imdyatn:


	Alatin/Tifinaɣ
ءآيت ورسانن	Ayt Wersanen
آيفشتالن	Ifectalen
آوغزافن	Uɣzafen

Arratn yaḍn gisn ɣar yan umdya n uɣri n tuddma n tguri a-, ittyura gis s alif-mamduda:

	Alatin/Tifinaɣ
آوداد	udad

G twilatin timɣrin g kraygat mani nɣ g kra n igzzumn ka, zun d arra Kitab Al-Asma n Ibn Tunart, da tettyura a- n tuddma s alif-mamduda nɣ alif mamduda d yat hamza nna tt izwarn:


	Alatin/Tifinaɣ
آمكراز	amekraz
ءآدرار	adrar
ءآغاز	aɣaz

Ɣ twilatin timɣrin, Ar ittara Ibn Tunart i- n tuddma s alif ilan yat lhmza ddaws, tiḍfuṛ tt yā’:

	Alatin/Tifinaɣ
إيردن	irden

Ɣ tuddma, u- da tettyura s alif d hmza ittyuzmmamn g tuẓẓumt nns, tiḍfuṛ tt wāw:

	Alatin/Tifinaɣ
أوماد	ummad

Aɣri afssas n tuddma n tguri da ittyura s alif (s Fatḥa tamattuyt imẓẓiyn g uḍṛiṣ imɣr):

	Alatin
افسوا	efsu
انس	ennes
وار الاغ	war elleɣ

G warratn yaḍnin, tiguriwin timaziɣin da ttyaflnt gant tirimɣrin. Kud nna tettyura kra n tguri bla agaɣri, da ittyura a- n tuddma n tguri s walif, ttyuran i- d u- n tuddma s alif nna iḍfṛ ḥarf al-madd nna dids yuckan:

	Alatin/Tifinaɣ
ادمام	admam
ايغرى	iɣrey
اوكان	ukkan

Iɣ ur ittyuzmmam ugaɣri, iẓḍaṛ alif-waw ad ig u- nɣ aw-, tiẓḍir alif-yā’ ad tg i- nɣ ay-:


	Alatin/Tifinaɣ
اوماد	ummad
اوسرغينت	awserɣint
ايزرى	izrey
ايرنى	ayerni

Iɣritn n tgira n tguri

Ɣ tgira n tguri, da bdda ittyura -a s alif. Kra n tkkal s alif maqṣura (ألف مقصورة) nɣ s hā’ (هاء)

Ɣ tgira n tguri, wāw (الواو) da igzza aɣri -u nɣ aznaɣri -w. G kigan n tkkal da t iḍffṛ yan walif lli igan ɣar imis awnɣan:

	Alatin/Tifinaɣ
وايللوا	waylellu
خيزوا	xizzu
افرسيوا	afersiw
تيلفاوا	tilfaw

Tirgalin

Amata n trgalin ur illi umukris g tirra nnsnt:


ب	b	ايباون	ibawen
ت	t	تيبيتاس	tibitast
خ	x	تيزخت	tizext
د	d	امراد	amrad
ر	r	ارماس	armas
ز	z	ازنزوا	azenzu
س	s	اساسنو	asasnu
ش	c	تاشنتيت	tacentit
غ	ɣ	تاغيغيت	taɣeyɣeyt
ف	f	تيفاف	tifaf
ك	k	ايكيكر	ikiker
ل	l	اليلى	alili
م	m	ادمام	admam
ن	n	انلى	anli
ه	h	ترهلا	terrehla
و	w	وامسا	wamsa
ى	y	تاريال	taryal

Tilli ur illin ɣ uskkil aɛṛab dḥint imaziɣn ad stin askkil akkʷ yaẓn i yimsli lli tgzza.

Aya a f ar nttafa 'ḍ' ittyura s ṭā’ (طاء) acku asusru n ض ɣ wakud ann naḥya t d win tɛṛabt tanawayt tatrart, imdyatn:

	Alatin/Tifinaɣ
انلكوط	anelkuḍ
تيكيطا	tikiḍa

Targalt ẓ da tettuzmmem s zāy (زاي) nɣ s ṣād (الصاد)

	Alatin/Tifinaɣ
تافرزيزت	taferẓiẓt
اصوكا	aẓuka

Ɣ kra n imdyatn idrusn, askkil ṣād (الصاد) da igzza ṣ:

	Alatin/Tifinaɣ
تيبينصرت	tibinṣert
اصغر	aṣɣer

Targalt g da tettuzmmam s ǧīm nɣ kāf nɣ qāf:

	Alatin/Tifinaɣ
ايدجل	idgel
انكارف	angaref
امزقور	amezgur

Targalt j da tettuzmmam ǧīm nɣ cīn:

	Alatin/Tifinaɣ
اناشل	anajel
تونجيفين	tunjifin

Targalt tussidt ǧǧ da bdda tettuzmmam s ǧīm:

	Alatin/Tifinaɣ
ازجيج	azeǧǧig
تازجاشت	tazeǧǧact

Agancuc

Ar ittuzmmam ugancuc n trglin tulɣiwanin g tirra timɣrt s tmatart ḍamma (الضمة), f uskkil nna nit ilan agancuc nɣ walli t izwarn.

Tisaɣulin

↑ برونياتيلّي, فيرموندو (2020). "مُختاراتٌ لمخطوطاتٍ بالأمازيغيةِ الليبيَّةِ والتونسيَّةِ مِن حقبٍ مختلفة - وصف وتعليق". مجلة المناهل: لمحات عن الرصيد الأمازيغي المکتوب (100): 47–54.
↑ Saadouni, Mohamed; Stroomer, Harry (2019). "Tashelhiyt berber manuscripts in Arabic characters: an update". Études et Documents Berbères (s tutlayt ⵜⴰⵏⴳⵍⵉⵣⵜ). 42 (2): 193–200. doi:10.3917/edb.042.0193. ISSN 0295-5245.
↑ ^a ^b ^c et ^d نوحي, الوافي (2020). "التراث الأمازيغي المخطوط بالمغرب: نظرات في النشأة والتطور". مجلة المناهل (100).
↑ Boogert, Nico van den (2000). Chaker, Salem; Zaborski, Andrzej (eds.). "Medieval Berber orthography". Études berbères et chamito-sémitiques. Mélanges offerts à Karl-G. Prasse. Paris & Louvain: Peeters. ISBN 9789042908260.

[1] برونياتيلّي, فيرموندو (2020). "مُختاراتٌ لمخطوطاتٍ بالأمازيغيةِ الليبيَّةِ والتونسيَّةِ مِن حقبٍ مختلفة - وصف وتعليق". مجلة المناهل: لمحات عن الرصيد الأمازيغي المکتوب (100): 47–54.

[2] Saadouni, Mohamed; Stroomer, Harry (2019). "Tashelhiyt berber manuscripts in Arabic characters: an update". Études et Documents Berbères (s tutlayt ⵜⴰⵏⴳⵍⵉⵣⵜ). 42 (2): 193–200. doi:10.3917/edb.042.0193. ISSN 0295-5245.

[:0-3] t ^d نوحي, الوافي (2020). "التراث الأمازيغي المخطوط بالمغرب: نظرات في النشأة والتطور". مجلة المناهل (100).

[4] Boogert, Nico van den (2000). Chaker, Salem; Zaborski, Andrzej (eds.). "Medieval Berber orthography". Études berbères et chamito-sémitiques. Mélanges offerts à Karl-G. Prasse. Paris & Louvain: Peeters. ISBN 9789042908260.

[1]

[2]

[3]

[4]