Talɣa:Amgrad ifulkin
Tuṛuft niɣ d Uṛubba (s Tinglizit: Europe, s Tɛrabt: أوروبا) tga yat ɣ sat Tmnẓiwin n umaḍal. Nttat ad kullu gisnt illan ɣ uzgn agafay n twjja tanakalt, tili taggat nns ɣ uzgn n iming. Igli tt ɣ ugafa ugaru Arkti, ɣ utaram Agaru Anaṭlaṣ, ɣ iffus illa as yilel Agrakal, d tmnẓawt n Wasya ɣ iming. Tssar Tuṛuft d Wasya yat tskka n wakal mi ismn Uṛasya, tili daɣ ɣ Afṛu-Urasya d Ifriqya d Asya. Ar ttinin is tbḍa d Asya s idrarn n Uṛal d iɣzr n Ural, d Ilell n Qzwin d idrarn n Quqaz d Ilell Asggan d igṛḍan n Turkya.[1]
Tɣʷi Tuṛuft kra n 10,186,000 km² n isimna, niɣ d 2% sɣ isimna n wakal, ɣayad ad gis iskrn tamnẓawt tis snat s tmẓi. Ɣ igr n tsrtit, tbḍa tmnẓawt ad f 50 n tmizar. Rusya ad akkʷ gisnt imqquṛn, teṭṭaf 39% sɣ isimna n tmnẓawt, d 15% sɣ imzdaɣn nns. Ilkm wuṭṭun n imzdaɣn n Tuṛuft kra n 745 mlyun ɣ 2021 (ini 10% iɣ imzdaɣn n umaḍal); tucka d ɣ wis kraḍ n idawn tiɣrdin Asya d Tafriqt.