Talɣa:Amgrad ifulkin/4
Lmɣrib (s tutlayt tɛrabt : « المغرب », al-Maɣrib ; s ugmmay n tfinaɣ : « ⵍⵎⵖⵔⵉⴱ », Lmɣrib) nɣ s yism nns amaddud Tagldit n Lmɣrib (s tɛrabt: « المَمْلَكَةُ المَغْرِبِيَّة », al-Mamlaka al-Maɣribiya ; s ugmmay n tfinaɣ : « ⵜⴰⴳⵍⴷⵉⵜ ⵏ ⵍⵎⵖⵔⵉⴱ », Tagldit n Lmɣrib) tga yat tmazirt, ig yan wawnk agldan, tlla ɣ ugafa utrim n tafriqt, tg yat zɣ tmizar n tmazɣa. Tmaẓunt nns tga tt Rrbaṭ, d tiɣrmt da akkʷ gis imqqurn tga tt Tgmmi Tumlilt.
Timdinin nns imqqurn gan-tnt Fas, Mṛṛakc, Sla, Mknas, Agadir, Asfi, Ṭanja, Tiṭṭawn, Wujda, Lɛyun, Lḥusima, Bni Mllal, Lqnḍrt, Warzazat d Ddaxla. Iḥudda-tt-id zɣ ugafa ill agrakal, zɣ unẓul Muriṭanya, zɣ ugmuḍ tamazirt n Dzayer, zɣ utaram iḥudda-tt-id yill Aṭalanti. Tamazirt ad tɣʷi kra n 710.850 km², d zdɣn gi-s kra n 36 id myun n middn iɣ nẓra tqdirat n usggʷas n 2019. Iga Lmɣrib agmam ɣ ammas n Iwunak Munnin zɣ usggʷas n 1956, d iga yan zɣ tmizar lli-d iskrn Tamunt n Lmɣrib Mqqurn ɣ usggʷas n 1989.
Tṭṭaf tmazirt n Lmɣrib yan wanaw n tnbaḍt igan tgldit tadusturant, agllid nns iga t Muḥammad wis-sḍiṣ, nttan ad ittnbaḍn tamazirt zɣ usggʷas n 1999 lliɣ immut babas Ḥasan Wis Sin. tṭṭaf tmazirt ad ula yan udustur ar sis tswuri zɣ usggʷas n 2011, nttan a f ṣwwṭn tugt n inmuran.
Anssixf nɣ amawas amzwaru lli illan ɣil-ad iga-t Ɛaziz Axnnuc, lli igan anssixf n Ugraw Anamur i Insimann.