Ɛabdllah Zagur
| Ɛabdllah Zagur | |
|---|---|
| ⵄⴱⴷⵍⵍⴰⵀ ⵣⴰⴳⵓⵔ | |
 Tawlaft n igllin n Ɛabdllah Zagur. | |
| Talallit | 1885 ɣ Zɣanɣin (Ayt Ɛbla) |
| Adɣar | Idrarn n waṭlas mẓẓiyn, Sus |
| Tamttant | 1972 ɣ Zɣanɣin (Ayt Ɛbla) |
| Amḍl | Tamnaḍt n Tarudant |
| Ddin | Lislam |
| Aẓur | Asusiy Aclḥiy |
| Tawuri taɛṣkṛit | |
| Tawuri | Amɣnas asusi mgal usdurri |
| Imnɣitn | Imnɣi n Ayt Ɛblla 1932 |
Iga Ɛabdllah Zagur u Ɛbl (ittussan ɣ tmazirt nns s Amɣar ggu Ɛblla) yan umɣnas d unzbay asusiy amaziɣ mgal n usdurri afransis ɣ Lmɣrib. Ilul ɣ usggʷas n 1885, immut ɣ usggwas n 1972[1]. Imnɣi n Ayt Ɛblla nna ɣ tt inn ikka iga amɣar, ikka tt inn iga yan zɣ imnɣitn akkʷ stawhmmanin ɣ uzmz n tnzbayt tamɣribit. Ig bab n twinst "Itmma lqṛṭaṣ, itmma wawal" lli bahra ittussann dar isusiyn.
Tudrt nns
[ssnfl | Snfl asagm]Ilul Ɛabdllah Zagur ɣ usggʷas n 1885 ɣ yan udwwaṛ ism nns Zɣanɣin ɣ tqbilt n Ayt Ɛblla ɣ idrarn n waṭlas mẓẓiyn, iwala udwwaṛ nns i tmdint n Iɣrm, tasga n Trudant. Ttussann idɣarn ann s lfuqha d id bu tussna nna f isawl umara imqqurn Lmuxtar Ssusi ɣ udlis nns Lmɛsul. Tzzri tqbilt nns yan uzmz iktarn s tmunag d tbḥliyin, biddn mgal n usdurru afṛansis. Ɛabdllah Zagur ad igan amɣar nnsn ɣ akud ann, ar isfttu tanzbayt ɣ yidrarn n Sus, zun d inzbayn yaḍnin s umdya Ccix Malɛaynayn, Aḥmad Lhiba, Zayd u Ḥmad, Ɛssu u Baslam, Muḥa Ḥmmu Aẓayyi d wiyyaḍ. Immaɣ usdurri mgal Zagur s aynna mi yufa n udwas d tsrdast, mac ur t isslkim unck ann s uwttas nns. Immatti ilmma s ussmrs n tmdayin d usnnulfu n tkrkas, d uzuzzr n lkʷrh gr mddn, s yimɣḍaṛn d ussmrs n txndallast, lliɣ tnna fṛansa i mddn mas ur tri abla ad asn n tṛẓm iɣarasn, ad asn taws, tzuzzr tayri d laman gratsn, macc amɣar, yugi ɣaylli s tra ad tn tsḍmmɛa irar fllasn s tmaziɣt ar iḍssa “aɣaras aɣaras ad ikkan akal”, tfrk ɣ akud ann fṛansa, mas ur dars illi awd kra ufssay yaḍni mgal unmɣur amẓẓiḍṛ amr s tiylalin n tsrdast[2].
Tẓli fṛansa 18 n taylalin afad ad txlu aḍwwar lli ɣ tlla tgmmi nns, tbḍu tnt f ṣḍiṣ idilan, xʷlant ilmmadin iḍuran ggutnin, gn ukan sul isagurn nnsn tugga f ccqawt n usbumbarḍi n yicnga lli d ittkkan ignwan, aylliɣ ar akkʷ ffaln middn tigʷmma nnsn ar kllan ɣ bṛṛa, ur ar tturruyn ar iḍ f wudm n wutci d tirmt
Tkmml tammaɣt tamsrdast ɣ usggʷas n 1926 ɣ ugafa, ɣmk lli tkmml tin unẓul ɣ usggʷas n 1934, d lliɣ imkkn usdurri ifassn nns ɣ tmnaḍt n ayt Ɛbdlla ibda ar ittamẓ imjhadiyn ar tn inn ittqqn ɣ yibniqn, ɣʷin tn s yiskraf n wuzzal ɣ yifassn nnsn, fln tn inn i laẓ d irifi.
Tamttant nns
[ssnfl | Snfl asagm]
|
Ẓṛ uggar
[ssnfl | Snfl asagm]
- ↑ أحمد, الحدري (16 يوليو 2014). "فسحة رمضانية رودانية :الحلقة(18)من أعلام تارودانت مع المجاهد عبد الله زاكور"
- ↑ عن صاحب القولة الكفاحية الشهيرة : (إيتما القرطاس … إيتما واوال !!؟)…